O le toe fa’aauau ai o le tautua a se tasi o Vaega pito taua a le Matagaluega o le Puipuiga o le Saogalemu, le Vaega e taulimaina mataupu e fa’atatau i Fualaau Fa’asaina i le atunu’u (Vice & Narcotics Tactical Unit), ua tu’uina atu le avanoa i ali’i ma tama’ita’i Leoleo uma e fia tautua i lea Vaega ina ia fa’afeso’ota’i le Ofisa o le Komesina o Leoleo ia le silia ma le aso 16 Iuni 2017.

O se tusi sa sainia ma tu’uina atu e le tofa Le’i Sonny Thompson i Leoleo uma lava o lo o galulue i totonu o le Matagaluega, sa ia fa’amanino atili ai le agaga ua mafua ai ona a’e se tofa e toe fa’aauau le tautua a lenei Vaega taua a le matagaluega.

Na taua e Le’i e fa’apea, o le toe fa’alauteleina o le tautua o le Vaega a le “Vice & Narcotics Tactical Unit”, o le itu lea o lo o ave i ai le fa’amuamua ina ia mafai ai ona latou fa’afetaia’i le malosi ua i ai tulaga o fualaau fa’asaina i totonu o le atunu’u.

I le amataga o le tausaga nei e pei ona saunoa Le’i, na fa’atula’i ai e le afioga i le ali’i kovana se Vaega Faapitoa (Taskforce for Domestic Security) latou te sailia ni auala e mafai ai ona foia le fa’atupulaia o vaega o fualaau fa’asaina i totonu o le atunu’u, ona ua tele ina a’afia ai soifua o tagata lautele.

“Ina ia manuia lenei taumafaiga, ua ou manatu ai ina ia tatou galulue fa’atasi ma le Ofisa o Mataupu Tau Samoa, atoa ai ma le galulue fa’atasi ma Faalapotopotoga Tumaoti i le atunu’u ma le malo, ina ia tutu fa’atasi ma le Ofisa o Leoleo mo le faia o gaioiga uma e aveese mai ai fualaau fa’asaina mai le a’afia ai o le soifua manuia o a tatou fanau ma aiga”, o se vaega lea o le tusi a Le’i.

“A o fa’aauau ai la tatou taumafaiga ina ia toe fa’alautele lenei auaunaga i totonu o le Matagaluega, ua ou tu’uina atu ai lenei tusi i Leoleo uma lava ua mae’a ona fa’atauto ma o lo o tautua i totonu o le Matagaluega o Leoleo, o i latou o lo o i ai le fa’anaunauga e fia tautua i lenei Vaega Fa’apitoa, ina ia fa’atulaga se taimi e aga’i mai ai e vaai le Komesina i lona Ofisa ia le silia ma le aso 16 Iuni 2017, mo le fa’atalatalanoaina o fa’amatalaga taua e uiga i lenei mataupu”.

Ua fautuaina fo’i ali’i ma tama’ita’i Leoleo Ta’ita’i ina ia mautinoa e silafia uma e ali’i ma tama’ita’i Leoleo lenei fa’aaliga taua.

E pei ona taua e le afioga i le ali’i Komesina i se fa’atalatalanoaga ma le Samoa News i le masina na te’a nei, le ave o le fa’amuamua a le Ofisa o Leoleo i le taumafai lea e foia le fa’afitauli o fualaau faasaina ua vaaia le saoasaoa i le atunu’u.

O ni isi o gaioiga na taua e Le’i ua fuafua le Matagaluega o Leoleo e fa’ataunu’u, o le tofia mai lea o ni Leoleo se to’a 8 mai le Vasega lona 25 a Leoleo lea ua fa’amoemoe e fa’au’uina i le vaiaso fou, e tiute i totonu o aoga i le atunu’u mo le mata’ituina lava o tulaga i fualaau fa’asaina.

E ese mai i lea, ua mae’a fo’i ona talia e le Ofisa o Leoleo a Honolulu se talosaga sa tu’uina atu i ai, ina ia fesoasoani mai mo le faia o ni aoaoga mo ali’i ma tama’ita’i Leoleo a le atunu’u, i auala e fa’alautele ai lo latou silafia i le sailia lea o i latou o lo o umia fualaau fa’asaina, aemaise ai nofoaga o lo o gaosi ma fa’a failele ai lenei fualaau oona.

O se tasi o tulaga ua unaia ai lava le Matagaluega o Leoleo e faia lenei tulaga, ona o le fa’alavelave lea na tulai mai i se tasi o aoga maualuga i le atunu’u, ina ua maua i ni isi o fanau aoga vaega o fualaau fa’asaina o le aisa.

Na taua e Le’i i le Samoa News e fa’apea, afai e le vave gaioiga e foia ai lenei fa’afitauli, e ono toe tulioso atu le malo ma le atunu’u ae ua tele se afaina o tupulaga talavou i tulaga o fualaau fa’asaina.