Ads by Google Ads by Google

Toe fa’amalosia Kovana tulafono i teugafupe a le matagaluega taitasi


Ni isi o sui o le Kapeneta a le ali’i kovana ia Lolo Matalasi Moliga. [ata AF]
ausage@samoanews.com

Ua sainia nei e le afioga i le ali’i kovana ia Lolo Matalasi Moliga sana poloaiga, e toe fa’amalosia ai le tulafono sa tu’uina mai i tausaga ua mavae i lana Kapeneta, e fautuaina ai le tapunia o teugatupe uma a matagaluega eseese a le malo o loo i ai, a ia teu tasi uma teugatupe i lalo o le teugatupe tele o loo vaavaaia e le Teutupe a le malo.

 

“Sa i ai se fa’atonuga sa tu’uina atu i ni tausaga ua mavae, e fa’atonu ai Fa’atonusili uma lava ina ia tapunia teugatupe uma a ofisa o loo i ai, peitai o fa’amatalaga ua oo mai ia te a’u, o loo i ai pea lava ni isi o outou e le o usitaia lea fa’atonuga”, o le saunoaga lea a le ali’i kovana.

 

“O le taimi nei, ua toe tuuina atu lenei poloaiga e fautuaina ai le tapunia uma o teugatupe a ofisa eseese o loo i ai. E leai se matagaluega e sao mai i lenei tulafono”.

 

“E tasi lava le Teutupe a le malo o Amerika Samoa o loo fa’ataga mai i lalo o le tulafono na te vaavaaia ma teuina teugatupe uma a le malo”.

 

Ua fautuaina afioga i Fa’atonusili ina ia fa’ao’o uma atu i le Teutupe le aofa’i o teugatupe a ofisa taitasi o loo i ai, ina ia mautinoa e malu puipuia le teuina o meatotino a ofisa taitasi ma le malo atoa.

 

O le aso 28 Fepuari, 2017 lea ua tu’uina atu e le kovana e tapunia uma ai loa teugatupe e pei ona fautuaina, ina ia mautinoa e tausisia tulafono a le malo ae tu’u tasi atu le teuina o tupe i lalo o le vaavaaiga a le Teutupe a le malo.