O le ali’i mai Samoa lea sa fa’amatalaina e molimau i luma o le Fa’amasinoga Maualuga i le vaiaso na te’a nei o se ali’i Kerisiano e fiafia e fesoasoani i soo se tasi, ua fa’atonu e le Fa’amasino sili ia Michael Kruse ina ia toe fa’afo’i i Samoa, ina ua ta’usala o ia i lona faia o uiga mataga i tama’ita’i e 15 tausaga le matua.

O le vaiaso na te’a nei na lau ai le fa’asalaga a le ali’i o Peniamina Fa’ataulevao, ina ua ta’usala o ia i le moliaga o lona tagofia lea o itutinosa o se tama’ita’i e talavou i lalo o le tulafono.

O Fa’ataulevao, o se totino o le Ekalesia Assembly of God i Nua ma Seetaga. Na molimau lana Faifeau ma ia taua i le Fa’amasinoga uiga lelei o lenei ali’i sa ia maitauina, talu mai le la mafutaga i le 3 tausaga ua mavae. E le gata o se ali’i Kerisiano fa’amaoni, ae loto alofa ma fiafia e auauna i soo se taimi. O ia fo’i o se totino o le Autalavou ma le Aufaipese.

Na fa’atoese Fa’ataulevao i le faaamasinoga e tusa ai o lana solitulafono, ma ia talosagaina ai se avanoa mo ia e toe fo’i atu ai i lona aiga, aemaise ai le toe fa’aauauina o lana auaunaga i le Atua e ala i le Ekalesia o lo o galue ai.

Na finau le loia a le ali’i ua molia ia Douglasi Fiaui i le Fa’amasinoga mo se fa’asalaga fa’anofovaavaaia, ina ia maua ai le avanoa o le ua molia e toe fo’i atu ai i tua e fa’aauau le mafutaga ma le aiga. Na taua atili e Fiaui e fa’apea, o Faataulevao na aga’i mai i Amerika Samoa e saili sona lumana’i manuia, peita’i ua ia fa’aaoga sese le avanoa sa ia maua ma i’u ina a’afia ai o ia i le tulafono i le la mafutaga ma le tama’ita’i na a’afia i lenei mataupu.

Na lagolagoina e le loia a le malo ia Christy Dunn le talosaga ina ia fa’asala le ua molia i se fa’asalaga faanofovaavaaia, e aofia ai le maua o le avanoa e fo’i ai i tua i lona aiga e toe fa’asa’o vaega o lona olaga ua fa’aletonu.

Ae na saunoa Kruse e fa’apea, e foliga mai i le vaavaai a le Fa’amasinoga, o le ali’i o Fa’ataulevao, o le isi lea e a’afia i ituaiga tupulaga talavou mai Samoa na o ese mai loa mai pulega a ali’i ma faipule a latou afioaga, atoa ai ma le fa’amalumaluga a matua sa malosi ai le olaga pulea ma le ola a’oa’oina, osofa’i loa e le Tiapolo ma a’afia ai i uiga mataga.

E ui i fa’afinauga o Faataulevao o se ali’i Kerisiano e amio lelei toe fiafia e tautua le Ekalesia, peita’i na saunoa Kruse e fa’apea, o le silasila a le Fa’amasinoga, o le ua molia o se tagata e le lelei lana amio, e fiafia e alu e tuiltuli tama’ita’i ina ia faia i ai uiga mataga ma fa’amalie ai tu’inanauga o le tino.

Na ioe le Fa’amasinoga e tatau ona fa’asala le ua molia i se fa’asalaga faanofovaavaaia, e le gata o lea faatoa tausala o ia i se solitulafono, ae o ia fo’i o se tagata e talavou lona olaga. Pau le itu na fa’amanino e Kruse, o le fa’asalaga o le a tuuina tau ia Faataulevao, o le a le toe maua ai e ia le avanoa e fealua’i sa’oloto ai i laufanua o Amerika Samoa, ae o le a toe fa’afo’i atu o ia i lona aiga na malaga mai ai.

O ni isi o tuutuuga o le nofovaavaaia e 7 tausaga a le ua molia, o lona tuliina lea o masina e 28 i le toese i Tafuna, peita’i ua manatu le fa’amasinoga ua lava masina e 9 lea na taofia ai le ua molia i le toese e fai ma ana fa’asalaga i lenei mataupu, ae o le a fa’afo’i loa o ia i lona atunu’u na malaga mai ai, ma aumau ai mo le umi o lana nofovaavaaia.

O le vaiaso nei lea ua fa’atulaga e toe fo’i atu ai le ua molia i Samoa, ma ua faatonuina fo’i e le fa’amasinoga le malo ina ia fa’aaoga le tupe o le Pone na totogi e le ua molia i le taimi na talosaga ai ana pepa nofomau, e totogi ai lona pasese e toe fo’i atu ai i Samoa.