Ads by Google Ads by Google

Toe filifilia Fetu Fetui Jr avea ma Sui Fofoga Fetalai o le Maota o Sui


Le afioga i le ali’i faipule mai le itumalo o Manu’a #1, Fetu Fetui Jr lea ua toe filifilia e avea ma Sui Fofoga Fetalai o le maota o sui, o ia fo’i lea o le Ta’ita’i o le Komiti o Tulafono a le maota o sui. [ata AF]

Lulu aao le afioga i le Fofoga Fetalai ma sui mamalu o le maota o sui, i le mae’a ai o galuega fa’atino a le maota i le taeao ananafi. [ata AF]
ausage@samoanews.com

O le pasia ai e le Maota o Sui o le lisi o Komiti Tumau a le maota mo le fa’atinoina o a latou galuega mo le nofoaiga fou lenei ua tatalaina e 35, ua tula’i mai ai le toe filifilia o le afioga i le ali’i Faipule mai le itumalo o Manu’a #1 ia Fetu Fetui Jr, e avea ma Sui Fofoga Fetalai o le Maota o Sui, o ia fo’i lea o le Ta’ita’i o le Komiti o Tulafono a le maota, ae sui ta’ita’i ai le afioga i le ali’i faipule ia Vaetasi Tu’umolimoli Saena Moliga.

 

A o le i pasia e le maota o sui i le taeao ananafi le lisi o ana komiti ta’itasi, na taua e le afioga i le Fofoga Fetalai ia Savali Talavou Ale i lana saunoaga, le leai o se suiga tele ua faia i Komiti eseese sa galulue mai ai le maota i le nofoaiga ua mavae atu, ma tofiga ua faia mo Komiti fou e pei ona pasiaina nei.

 

“Pau suiga laiti ua faia, o le tu’u fa’atasia lea o le Komiti o Mataupu Tau Fa’amasinoga fa’apea ai ma le Komiti o Mataupu tau Tulafono, ina ia fa’a faigofie ai ona fa’atinoina galuega a lea Komiti i mataupu e fesoota’i ma mataupu tau tulafono”, o le saunoaga lea a Savali.

 

O le Komiti o Mataupu Tau Fa’amasinoga a le maota o sui, sa Ta’ita’i Komiti ai le afioga i le ali’i Faipule ia Toeaina Faufano Autele, ae o le Komiti o Mataupu tau Fa’amasinoga sa Ta’ita’i Komiti ai le afiogai le Tama’ita’i Faipule ia Vui Florence Saulo, ae talu ai o lea ua tu’u fa’atasi Komiti ia e lua, ma ua tu’u atu i lalo o le ta’ita’iga a le afioga a Toeaina, ua tofia ai loa Vui e avea ma Ta’ita’i o le Komiti o Galuega Lautele a le malo.

 

Mai Komiti Tumau e 19 a le maota o sui ua mae’a ona pasia i le taeao ananafi, e na o le to’atasi lava le faipule e le o i ai se komiti o avea ai o ia ma ta’ita’i, e na o le afioga i le faipule ia Gafatasi Afalava, o se tasi o sui fou mo le nofoaiga lona 35 lenei a le Fono Faitulafono, e ui o ia o se tasi o sui sa tautua muamua i le nofoa o le itumalo i ni isi o nofoaiga ua mavae atu.

 

E 7 komiti eseese o loo avea ai Gafatasi ma totino, e aofia ai ma komiti e 2 lea o loo avea ai o ia ma sui ta’ita’i komiti, le Komiti o Mataupu Tau Fa’amasinoga/Tulafono, fa’apea ai ma le Komiti o Galuega Lautele a le malo.

 

O sui faipule fou e to’a 6 mo le nofoaiga lenei a le Fono Faitulafono, o lo o tofia uma i latou e avea ma Ta’ita’i o ni isi o Komiti Tumau a le maota.

 

O le afioga ia Vailiuama Steve Leasiolagi, ua tofia o ia e avea ma Ta’ita’i o le Komiti o le Paketi, le komiti sa avea ai fo’i o ia ma ta’ita’i i le ulua’i taimi na ia nofoia ai le nofoa a le afioaga i Fagatogo i tausaga ua mavae, ae o le afioga i le ali’i faipule ia Timusa Tini Lam Yuen sa avea ma ta’ita’i o lea komiti, ua tofia o ia e avea ma ta’ita’i o le Komiti o le Pulega o le Eletise ma le Suavai a Amerika Samoa (ASPA).

 

O le afioga i le ali’i faipule ia Kitara Vaiau, ua filifilia nei o ia e avea ma Ta’ita’i o le Komiti o le Pulega o Uafu ma Malaeva’alele, o le afioga i le ali’i faipule ia Samuelu Ioka A. Meleisea lea ua avea ma Ta’ita’i o le Komiti o Fefa’atauaiga ma Alamanuia, o le afioga i le ali’i faipule ia Sataua Dr. Mataese Samuelu lea ua filifilia e avea ma Ta’ita’i o le Komiti o le Malo Fa’alotoifale/TAOA ma le Ofisa o Palota, ma le afioga ia Fagaotaua Dorian T. Salavea lea ua avea ma Ta’ita’i o le Komiti o Tautua ma Auaunaga Lautele fa’apea ai Tupulaga Talavou.

 

Mo sui tuai a le maota o sui, ua toe filifilia le afioga a Lavea Legae’e Mauga e avea ma Ta’ita’i o le Komiti o le Sailiga o le Tamaoaiga o le malo, o le afioga ia Faimealelei Anthony Fu’e Allen lea ua toe filifilia e avea ma ta’ita’i o le Komiti o le Fa’agaoioina o le malo, o le afioga a Vaetasi Tuumolimoli Saena Moliga lea ua toe filifilia e avea ma Taitai o le Komiti o Aoga, o le afioga a Manumaua Wayne Wilson lea ua toe filifilia e avea ma Ta’ita’i o le Komiti o le Puipuiga o le Saogalemu Lautele, o le afioga a Vesi Talalelei Fautanu Jr lea ua toe filifilia e avea ma Ta’ita’i o le Komiti o le Soifua Maloloina, o le afioga a Puleleiite Tufele Li’amatua Jr lea ua toe filifilia e avea ma Ta’ita’i o le Komiti o Feso’otaiga, o le afioga a Vailoata E. Amituana’i lea ua toe filifilia e avea ma Ta’ita’i o le Komiti o le Litaea, ma le afioga a Su’a Alex Eli Jennings lea ua toe filifilia e avea ma Fa’atonusili o le Komiti o Fa’atoaga a le malo.

 

O le afioga i le ali’i faipule ia Veevalu Meauta Mageo lea ua filifilia e avea ma Ta’ita’i o le Komiti o le Puipuiga o le Saogalemu Lotoifale, ma le afioga a Matagi David Sialega Mauga ua filifilia e avea ma Ta’ita’i o le Komiti o Paka ma Malaetaalo a le malo.