Ua toe sola nei fo’i le ‘au malosi a le Mosiula mai Masefau ma le siamupini o le Liki Kirikiti o le Mosooi o lenei tausaga, ina ua manumalo i le la ta’aloga ma le ‘au o le Meaese mai Alofau i le aso Toona’i na te’a nei.

O le 4 ai lenei o tausaga sosoo o manumalo pea le Mosiula i le Liki Kirikiti Fa’a Samoa o le Mosooi, talu ona amataina lenei ta’amilosaga i le tausaga e 2013, e pei ona fa’amaonia mai e sui o le Komiti o lo o latou fa’afoeina lenei ta’amilosaga.

Na faiaina le Mosiula i le Meaese i le la ulua’i ta’aloga o le ta’amilosaga i le 2 vaiaso talu ai, a o lea ua manumalo i le la ta’aloga lona lua, o le ta’aloga pito sili fo’i lea ona taua, lea na sailia ai le siamupini o lenei tausaga.

E 3 ‘au sa latou sailia le siamupinio le Mosooi o lenei tausaga, o le ‘au a La’u Samoa, o le Meaese ma le Mosiula.

Na ta’aalo le Mosiula ma le La’u Samoa i le aso Tofi na te’a nei e saili mai ai se ‘au e manumalo e ta’aalo ma le Meaese e su’e ai le siamupini, ma manumalo ai le Mosiula i le La’u Samoa, ina ua le maua e le La’u Samoa ‘ai na tuli.

E 138 ‘ai a le Mosiula ae 14 pe, ae faia loa le fa’aiuga a le komiti e taofi le ta’aloga ae se’i tuli ‘ai pe maua, afai ae maua, ona toe fa’aauau lea ona tata o le Mosiula, peita’i o se tulaga fa’anoanoa ina ua mae’a pe e 19 a le La’u Samoa ae fa’atoa 93 a latou ‘ai na maua.

Na to’atele lava le mamalu o le atunu’u na fa’amalo’ulo’u atu latou te fia molimauina taualumaga o le ta’aloga, ina ua muamua tata Masefau ae talitua’a Alofau.

E 128 ‘ai a Masefau na maua ae atoa loa a latou pe 19, ma sauni atu ai loa le Meaese mo le tuliina o ‘ai, peita’i e na o le 69 ‘ai a Alofau na maua ae mae’a loa a latou pe e 19.

E ui i le lelei toe malolosi tau’au o fa’ate’a a le Meaese, peita’i e le i tu’u mamaina e le au tata a le Mosiula lea tulaga, ae sa na o le togi atu lava o le sumu ma maua lelei i le pate ma oso ai le 2 ‘ai aga’i i le sami poo luga fo’i o le auala.

Na i ai le manatu o le a faigofie i le Meaese ona latou tuliina ‘ai a le Mosiula, e ala lea i le fa’aaogaina o le lelei o le latou tata, peita’i na ese fo’i le tulaga sa i ai le ta’aloga i le aso, ina ua o gatasi uma le lelei ma le sa’o o fa’ate’a a le Mosiula atoa ai ma le mata’ala o le au talitua’a, ma fesoasoani ai i le televave o le alu o pe a le Meaese, ma le mafai ai ona latou maua ‘ai sa latou tuliina.

Na taua e le Komiti sa fa’afoeina lenei fa’amoemoe le agaga fa’afetai i le lagolago atu o afioaga uma sa auai a latou au mo lenei ta’amilosaga, aemaise ai o le lagolago atu o le atunu’u e ala i le maimoaina o le latou ta’amilosaga mo le Mosooi i lenei tausaga.

O le vaiaso na te’a nei na toe fo’i ai i fanua le ‘au o le Tanifa o le Vao mai Sili, Savai’i, fa’apea ai ma le ‘au a le Tama o le Malaka mai Niu Sila, ina ua mae’a le ta’amilosaga e na o le ta’itasi a laua malo sa maua ae ta’i 4 faiaina.