Ads by Google Ads by Google

TOEAINA: Tele tupe a le malo o lo o alu le aoga

ausage@samoanews.com

Na fa’ailoa e le Faipule mai Manu’a, afioga Toeaina Faufano Autele i sui o le Komiti Saili Tupe a le malo, lea o lo o galulue e saili auala eseese e maua ai alaga tupe fa’aopoopo mo le malo, e tele naua tupe a le malo o lo o maua ae o lo o fa’aalu le aoga.

 

Sa ia fa’atepa le Komiti Saili Tupe a le malo i tausaga e tele ua mavae ina ua fa’atoa ia ulufale atu i le Fono Faitulafono, a o i ai le lafoga o oloa na fa’atula’i e le faigamalo i lena vaitaimi. Ae ona o ni isi o tulaga fa’aletonu e pei ona tula’i mai, na mafua ai ona toe taofia lea lafoga, ae sa molimauina lava tulaga manuia o le faigamalo i lena vaitau.

 

Na fa’ailoa atili e Toeaina i le Komiti Saili Tupe a le malo e fa’apea, o le latou tiute o le sailiili lea o alaga tupe e manuia ai le malo, ae i lona taofi, e i ai vaega taua e tatau i le malo ona silasila toto’a i ai.

 

“I lo’u talitonuga i tulaga o faigamalo ma le tamaoaiga, e moni ai le upu ua masani ai le to’atele, afai e le o ta’e, aua le faia fua. O le uiga o la’u fa’amatalaga, e i ai lo’u taofi o lo o tulaga lelei lava tupe a le malo o lo o maua mai, ae mafua ona tula’i mai le mana’omia o tupe, ona e i ai vaega e tatau ona fa’aleleia. Afai la e le tapunia e le malo le mama o lo o tafe i ai tupe ia, e tupu pea lava le manaoga mo ni isi tupe fa’aopoopo,” o le saunoaga lea a Toeaina.

 

“E i ai lo’u talitonuga e to’atele naua tagata faigaluega a le malo e na o le ta’i 4 itula o lo o galulue ai, ae o lo o fa’aopoopo pea a latou livi tausaga. Ou te taofi fo’i e le tatau ona aveesea le lafoga o totogi e 2%, ae fa’atumau pea ina ia fesoasoani ai i tupe maua a le malo.”

 

“Silasila i le Ofisa o Mataupu Tau Samoa, e le o se galuega a tagata totogi lafoga le totogi o Pulenu’u. E malamalama uma lava tatou e ese lava le Faigamalo Fa’alotoifale ese le Faigamalo Fa’asetete. Afai lava e mana’o se afioaga e fa’a 2 a latou pulenu’u, o le latou faitalia lena, ae saili fo’i e latou tupe e totogi ai pulenu’u. Tele naua galuega a Pulenu’u ua fai e le malo, e pei o le tigaina o tagata faigaluega a le malo e fa’amama tafatafa o le alatele ma afioaga i taimi faigaluega a le malo, ae o lo o nofonofo Pulenu’u. I lo’u taofi, e tasi lava le tagata o le Ofisa o Mataupu Tau Samoa e tatau ona totogi e le malo, e na o le Failautusi.”

 

O le iloiloga a le Komiti o le Paketi ma le Tupe Fa’asoasoa a le maota o sui i le vaiaso nei, na mafai ai ona oo atu sui o le Komiti Saili Tupe a le malo e molimau i le lafoga o oloa e 7%.

 

I le iloiloga atoa, na atagia mai ai le eseese uma o taofi fa’aalia o afioga i Faipule e fa’atatau i lenei tulafono.

 

O ni isi o i latou sa lagolagoina le tatau lea ona fa’aee le lafoga o oloa e 7% i le atunu’u, ina ia mafai ai ona tali atu i le manaoga tau tupe o lo o fetaia’i ma le malo, ae o isi o lo o atugalu o latou taofi i le tulaga pagatia o le a oo i ai le atunu’u lautele, ona o le maualuga tele o le lafoga ua fuafua le malo e fa’aee.

 

Na fesili le afioga i le Fofoga Fetalai, tofa Savali Talavou Ale, ma le afioga i le ali’i faipule ia Veevalu Meauta Lauoti Mageo i le Komiti Saili tupe a le malo, pe i ai se fa’aletonu pe a sui e le maota o sui pasene o le lafoga, ina ia tuutuu mai ai i lalo, ae fa’atumau pea lafoga i luga o le uafu ina ia fesoasoani ai i tupe maua a le malo.

 

O atugaluga e pei ona saunoa Savali, ina nei aveese uma le lafoga i luga o le uafu, ae tula’i mai se fa’aletonu i le lafoga o le tau o oloa ma a’afia ai tupe maua a le malo, ona sili ai loa lea ona matuia le tulaga e tula’i mai i le lumana’i.

 

Ae na saunoa Mageo e fa’apea, o lona popolega o lo o i ai, ina nei pasia le lafoga o oloa e 7%, a o lea fo’i o lo o i ai pea le lafoga i luga o le uafu e 5%, ona maualuga lea o le lafoga e totogi e tagata i le tausaga fou pe a pasia ma fa’amalosia lenei tulafono.

 

O le finagalo fo’i lea o le afioga ia Amituana’i na fa’aali, afai ae pasia le lafoga e 7%, ae o lo o i ai pea le lafoga e 5% i luga o le uafu, o le a totogi e tagata le lafoga e 12%.

 

Ae na saunoa le Teutupe a le malo, o le isi fo’i lea totino o le Komiti Saili Tupe, Ueligitone Tonumaipe’a e fa’apea, na iloilo toto’a uma e le Komiti le maualuga o le pasene e tatau ona i ai le lafoga o oloa, ma fa’amautuina ai loa le 7%, ina ia mafai ai ona maua le tupe e $10 miliona i le masina o lo o naunau le malo e maua, e fa’atino ai ana galuega fai.

 

O tausaga uma lava e pei ona saunoa le Teutupe, e le ausia ai lava e le malo tupe lotoifale e fa’atino ai lana tautua i le atunu’u.

 

Na fesili Mageo i le Komiti Saili Tupe pe latou te le i silasila lava i isi ituaiga lafoga e ono mafai ai ona fesoasoani i le malo, ae na tali le Teutupe, e tele ituaiga lafoga sa latou vaavaai ma iloilo, peita’i o le lafoga sili lava lea ona lelei ma faigofie mo Amerika Samoa.

 

Saunoa Faimealelei Anthony Fu’e Allen e fa’apea, e tatau i le maota ona silasila toto’a i le tagi mai fo’i a le aufai pisinisi, i le tulaga fa’aletonu o le a o o i ai a latou taumafaiga ona o le tele o lafoga ua fuafua le malo e fa’ae’e.

 

Ae na saunoa Vaetasi Tuumolimoli Saena Moliga e fa’apea, afai ae sui e le Fono pasene o le lafoga e pei ona fuafuaina e le malo, o le a le maua e le malo le tupe o lo o fa’amoemoe e fa’atupe ai ana auaunaga, ma tula’i mai ai se tulaga pagatia i le malo ma le atunu’u atoa.

 

Na fesili le afioga i le Sui Fofoga Fetalai ia Fetui Fetu Jr i le Komiti, pe le mafai ona faia se lafoga e 25% mo tagata faigaluega, nai lo le fa’ae’e o nei mau lafoga, ua mamafa ma ua taugata tele mo le atunu’u, ae na saunoa Iulogologo J. Pereira e fa’apea, e taugofie atu ai lava le lafoga o oloa nai lo le faia o se isi lava lafoga.