O le vaiaso na te’a nei na fa’alauiloa aloaia mai ai e le Loia Sili a le malo ia Talauega Eleasalo Ale ni isi o tofiga fou i totonu o lona Ofisa, e pei o le filifilia lea o le tama’ita’i loia ia Loralei Meredith Fanene e avea ma Loia Sili lagolago (deputy attorney general), atoa ai ma le tofiaina o le susuga i le ali’i Loia Sili liagolago ia Aitofele Sunia, e fa’auluulu i ai le Vaega e Su’esu’eina mataupu Savaili (Civil Division) i totonu o le Ofisa o le Loia Sili.

I se pepa o fa’amatalaga sa tu’uina mai e le afioga a Talauega i le vaiaso na te’a nei, sa ia fa’amanino aloaia mai ai le agaga atoa o lenei taumafaiga, ina ia fa’aauau pea le tautua a le Ofisa a le Loia Sili i le malo ma le atunu’u.

O le tama’ita’i loia ia Meredith-Fanene sa fa’au’u mai i le aoga faa loia a le BYU Law School atoa ai ma le Kolisi a le BYU, ma o ia o se loia ua mae’a ona laisene e galue i le setete of Utah i Amerika faapea ai ma Amerika Samoa nei.

Ua 4 nei tausaga talu ona galue o ia i le Ofisa o le Loia Sili, ma o le tausaga na te’a nei na filifilia ai o ia na te tauaveina le tulaga o le avea ma taitai o le Civil Division. I lona tofiga fou, ua sui tulaga ai Meredith-Fanene ia Mitzie Jessop-Taase, lea ua avea nei o ia ma Loia Fautua mo le Fono Faitulafono i le vaega a le Senate.

O Meredith-Fanene, o se alo lea e fa’asino i le afioga a Mataia Daniel ma le faletua ia Gwendolyn Ho Ching Meredith o Nu’uuli, Nua & Se’etaga fa’apea ai ma le afioaga o Faleapuna i Samoa, ma o lo o fa’aipoipo atu o ia i le ssuga a Malaeimi Siufaga Fa’anene o le afioga o Nu’uuli.

O le susuga i le ali’i loia ia Sunia lea ua filifilia e avea ma Fa’auluuluga o le vaega a le Civil Division a le Ofisa o le Loia Sili, e sui tulaga i le tama’ita’i loia ia Meredith-Fanene. Na fa’au’u mai le ali’i loia ia Sunia i le aoga fa’aloia a le William S. Richardson School of Law i le Iunivesite o Hawai’i i Manoa. E i ai fo’i lona fa’ailoga o le BA i le Igilisi mai le Iunivesite lava a Hawaii i Manoa.

Ao le i galue Sunia i le Ofisa o le Loia Sili a le malo o Amerika Samoa, sa galue o ia i le Ofisa a le afioga i le ali’i Fa’amasino ia Fa’au’uga To’oto’o (Circuit Judge) i le setete o Hawai’i.

O le tausaga e 2014 na amata ai lana tautua mo le ofisa o le loia sili a le malo o Amerika Samoa, o se tasi o loia e su’esu’eina ma failaina mataupu tau solitulafono mamafa (criminal division), ae o le tausaga na sosoo ai 2015, na suia ai loa le vaega e tautua ai o ia i le vaega e su’esu’eina mataupu savili (civil divison), lea sa aofia ai o ia i le su’esu’eina o ni isi o mataupu tetele e fai ai ma sui o Amerika Samoa, e aofia ai le mataupu o le LVPA e pei ona taoto ai nei i luma o le fa’amasinoga feterale i le setete o Hawaii.

O le susuga i le ali’i loia ia Sunia, o se alo lea e fa’asino i le afioga i le Ali’i Fa’alagia ia Faoa A. Sunia ma le faletua ia Elisapeta Iuli Nikolao mai le afioaga i Ofu, Leone, Fagatogo ma Utulei.