Totogi le silia i le $40,000 poo le falepuipui mo le 7 tausaga

ausage@samoanews.com

E 6 masina lea ua tu’u atu e le fa’amasinoga maualuga i le Tina ia Lega Oa-Viliamu e toe manatunatu lelei ai i folafolaga ia ua mae’a ona ia tu’uina atu i luma o le fa’amasinoga, i lona totogiina lea o le silia i le $40,000 lea ua poloaina o ia e le fa’amasinoga e toe totogi i le kamupani sa ia galue muamua ai, po o le taofia lea o ia i le falepuipui mo le 7 tausaga i lona le tausisi i ana folafolaga.

 

O le aso Faraile na te’a nei na fa’atulaga e tu’uina atu ai se fa’aiuga a le fa’amasinoga maualuga fa’asaga ia Oa-Viliamu, ina ua fa’amaonia tu’uaiga o lona le usitaia lea o poloaiga o lana nofovaavaaia sa tu’uina atu i le tausaga e 2013, ae i le mae’a ai ona fa’afofoga o ali’i fa’amasino i le talosaga a lenei Tina atoa ai ma fautuaga mai ali’i Loia, na toe tafa ai loa le finagalo o le Fa’amasinoga e talia le talosaga a lenei Tina ma lana loia, e tu’u atu se isi taimi e amata ai one totogi le tupe sa poloaina o ia e totogi.

 

Na taua e Oa-Viliamu i luga o le nofoa molimau, talu ai e le o mafai ona maua sana galuega i le taimi nei e totogi ai lana salatupe atoa ai ma le toe totogiina o le tupe sa poloa’i le fa’amasinoga maualuga na te toe totogi, o lea ua malilie ai lona aiga e fesoasoani i le totogiina o le nei vaega tupe.

 

Na fa’ailoa atili e lenei Tina i le fa’amasinoga lona naunau e saili se galuega e totogi ai lana sala, ae ua faigata ona o le solitulafono lea ua ta’usala ai o ia e le fa’amasinoga, ua mafua ai ona faigata le sailiina o se galuega e totogi ai lana sala ma tausi ai lana fanau e to’a 3 o lo o i ai, aemaise ai le isi pepe fou mo le la aiga ma lona to’alua mai lona ma’itaga e 6 masina lea ua i ai.

 

Ae mo le toe totogiina atu o le tupe e pei ona poloaina ai o ia e le fa’amasinoga, e $800 i le masina le tupe ua folafola e Oa-Viliamu e mafai ona ia totogiina atu, lea e aofia ai le tupe e tipi mai i le siaki a lona to’alua, o lona tuagane, atoa ai ma le 2/3 o le tupe e maua mai e lona Tina mai lana penefiti o le Saogalemu, o i latou uma ia ua sauni e fesoasoani i le totogiina o lana sala.

 

Na talosaga le loia a Oa-Viliamu ia Douglas Fiaui i le fa’amasinoga, ina ia tu’u atu se avanoa se tasi mo lenei Tina e taumafai mai ai e totogi le tupe lea ua mae’a ona poloa’i o ia e totogi.

 

Na umi se taimi o iloilo e ali’i fa’amasino sa latou fa’aiuga e tusa ai o lenei mataupu, ae i le lata ai i le 20 minute o malolo le fa’amasinoga mo le tau iloiloina o se fa’aiuga, na fofogaina ai loa e le afioga i le ali’i fa’amasino ia Elvis P. Patea le fa’aiuga ua latou malilie i ai ma ana Fa’amasino Lagolago, aemaise ai le toe fa’ailoaina o itu uma sa o o i ai le silasila a le fa’amasinoga.

 

Saunoa Patea e fa’apea, e 7 tausaga na manatu le fa’amasinoga e fa’asala ai lenei Tina i le falepuipui, ina ua tu’uina atu le fa’aiuga a le fa’amasinoga maualuga i le aso 15 Fepuari 2013, i le mae’a ai lea ona ta’usala o ia i le moliaga mamafa o lona ave fa’agaoi lea o tupe sa tu’uina atu i lalo o lana vaavaaiga.

 

Ae i le mae’a ai ona iloilo e le fa’amasinoga maualuga o mau faamaonia uma atoa ai ma fa’afinauga mai loia e tusa ai o lenei mataupu, na filifili ai loa ali’i fa’amasino e fa’amalumalu le tu’uina atu o lenei Tina i le toese mo le 7 tausaga, ae o le a fa’anofovaavaaia o ia mo le 5 tausaga i lalo o poloaiga e ao ona ia usita’i i ai.

 

O ni isi o ia poloaiga, e aofia ai lona tuliina o masina e 28 i le toese, totogi le salatupe e $2,000, atoa ai ma lona toe totogiina o le tupe e $43,058.04 i le kamupani sa a’afia i lana solitulafono.

 

Ina ua mae’a ona tu’uina atu le fa’aiuga a le fa’amasinoga fa’asaga ia Oa-Viliamu i le aso 25 Fepuari 2013, na tu’u atu ai loa e le fa’amasinoga ma le masina e tasi e tapena atu ai le ua molia i se auala na te toe totogiina ai le tupe atoa ai ma lana salatupe, ma, i le aso 25 Mati 2013 ina ua toe valaau lenei mataupu, na fa’ailoa atu ai loa e Oa-Viliamu i le fa’amasinoga lana polokalame ua i ai, o le a ia totogiina le ta’i $750 i le masina, aua o le taimi fo’i lea ua maua ai lana galuega i se kamupani tua  e pei ona taua e le fa’amasinoga.

 

Ae talu ai o le fuafuaga e pei ona fa’aalia e le ua molia i lena taimi, na finagalo ai loa le fa’amasinoga e toe fa’aitiitia lana fa’asalaga fa’a falepuipui i le 15 masina, i lalo o le tu’utu’uga o le a ia totogiina uma le tupe e pei ona poloaina o ia e totogi i totonu o le 4 tausaga o lana nofovaavaaia, tusa lea o le aso 25 Fepuari 2017.

 

Ae ina ua tuana’i le aso 25 Fepuari 2017, e na o le $880 le tupe ua mae’a ona totogi e le ua molia, ma mafua ai loa ona toe valaauina e le fa’amasinoga lenei mataupu.

 

“O lea ua matou fa’alogo atu i au folafolaga i le auala e totogi mai ai le tupe o lo o totoe, ma ua atagia mai ai le laititi o le toe talitonuina o au folafolaga e le fa’amasinoga, ona o lea ua mae’a le 4 tausaga ae na o le $880 le tupe ua mae’a ona e totogiina, ma le silia i le $42,000 o lo o totoe e te le i totogiina mai”, o le saunoaga lea a Patea ia Oa-Viliamu.

 

“E 6 masina lea ua tu’u atu e te  totogi mai ai le ta’i $800 i le masina i le fa’amasinoga, afai e te fa’atamala ai, lona uiga ua leai loa se isi avanoa e totoe mo oe, ae o le a tu’uina atu loa oe i le falepuipui mo le umi e 7 tausaga e pei ona fa’amalumalu e le fa’amasinoga”, o le saunoaga lea a Patea, ma fa’atulaga ai loa le aso 14 Tesema 2017 e toe valaau ai lenei mataupu.

Comment Here