O le tagi fou lea ua toe faila e le malo o Amerika Samoa fa’asaga i le ali’i talavou o David Fo’a, ua atagia mai ai le tu’uaia o ia i lona osofaia lea o ni faleoloa se 9 i le itu i Sisifo o le atunu’u, e aofia ai ma le ave fa’agaoi o meatotino mai totonu o faleoloa eseese uma nei.

E ui ua silia i le 6 masina o taofia pea Fo’a i totonu o le toese i le mae’a ai lea ona faila e le malo o le latou ulua’i tagi fa’asaga ia te ia i le tausaga na te’a nei, o le aso Faraile na te’a nei na toe faila ai e le malo la latou tagi fou fa’asaga ia Fo’a, i le mae’a ai lea ona maua e Leoleo o isi fa’amatalaga fou e fa’atatau i mataupu eseese o lo o tu’uaia ai o ia.

O le tagi fou lea na fa’atoa faila i le vaiaso na te’a nei fa’asaga i le ali’i o lo o molia, na afua mai lea ina ua teena e le fa’amasinoga maualuga se maliliega aufa’atasi na sainia e Fo’a ma le malo, lea na manatu ai le malo e tali ioe le ua molia i le moliaga o le talepe fale ma le gaoi, ae solofua ai isi moliaga o lo o totoe ai i le tagi sa latou fa’aulu.

Peita’i o le tagi fou lea ua fa’aulu fa’asaga ia Fo’a, o lo o tu’uaia ai o ia i moliaga e 9 o le talepe fale i le tulaga muamua, 5 moliaga o le gaoi, fa’apea ai ma moliaga e 2 o le fa’aleaga meatotino i le tulaga 3.

O se tasi o faleoloa na osofa’i e le ua molia e pei ona taua i fa’amaumauga a le fa’amasinoga, o lo o tu’uaia ai o ia i lona talepe o le fa’amalama i se taimi o le po, ma ia ulufale fa’amalosi ai i totonu ma le fa’amoemoe na te fa’atinoina ai le solitulafono o le gaoi.

A o i ai o ia i totonu o le faleoloa lea, sa ia gaoiina ai ni oloa e silia i le $100 lo latou tau pe a fa’atupeina, atoa ai ma se tinoitupe e tusa ma le $800 sa i totonu o se fagu sa i lalo o le fata i totonu o le faleoloa.

O ni isi o oloa na gaoia mai e Fo’a i le faleoloa lea, sa ia alu ma foa’i i se tasi o ana uo, o ia lea na ia fa’asoaina i Leoleo fa’amatalaga e fa’atatau i oloa na avatu e Fo’a ia te ia, ma mafua ai loa ona maua e Leoleo fa’amatalaga e uiga i le osofaiga lea, ma i’u ina molia ai o ia i lenei mataupu.

O le tele o meatotino o lo o tu’uaia e le malo ia Fo’a sa ia ave fa’agaoia mai faleoloa eseese na a’afia, ua mae’a ona toe maua e Leoleo, se’i vagana ai ni isi o vaega laiti o loo tau sailia pea, ae i tulaga o le tinoitupe sa gaoia, na taua e le ua molia i Leoleo le mae’a lea ona ia fa’aaoga, ma o se isi vaega o le tupe sa latou fa’aaoga ma ana uo.

Ua tofu atu nei i luma o le fa’amasinoga maualuga le mataupu fou e pei ona tu’uaia ai e le malo ia Fo’a, ina ua ia le manatu e fa’ataunu’u lana ulua’i iloiloga lea sa fuafua e faia i luma o le fa’amasinoga fa’aitumalo.

O le masina o Iulai lea ua fa’atulaga e faia ai lana ulua’i iloiloga, o le aso fo’i lea ua fa’amoemoe e tatau ona fa’ailoa ai le tulaga sa’o o lana mataupu, i le ono faia lea o se maliliega ma le malo po o le tu’uina atu o lana mataupu e fa’ataunu’u sona fa’amasinoga autu i luma o tagatanu’u e tofia e le fa’amasinoga e iloiloina se fa’aiuga o lana mataupu.

O le masina o Novema 2018 lea ua fa’atulaga e faia ai lana fa’amasinoga autu, pe afai e le mautu sa latou maliliega ma le malo e fa’amuta ai lana mataupu.

O lo o taofia pea Fo’a i le toese i Tafuna e aunoa ma se tupe ua fa’atulaga e le fa’amasinoga e tatala ai o ia i tua.