E $60,000 le tupe lea ua fa’atulaga e le fa’amasinoga e totogi, ona fa’atoa mafai lea ona tatala i tua mai le toese i Tafuna se ali’i ua tu’uaia i lona umia fa’asolitulafono o vaega o fualaau fa’asaina atoa ai ma ni fana e lei lesitalaina fa’aletulafono.

O moliaga e pei ona tu’uaia ai e le malo le susuga a Tautua Letasi e aofia ai moliaga mamafa e lua o le umia fa’asolitulafono o vaega o le pauta fa’asaina o le asia ma le fa’amoemoe e tulei pe fa’atau atu i isi tagata, atoa ai ma le moliaga o lona umia fa’asolitulafono o mariuana ma le fa’amoemoe e tulei pe fa’atau atu i isi tagata, fa’apea ai ma moliaga mama e 2, o lona umia fa’asolitulafono lea o ni fana se 2 e lei leistalaina, le ituaiga o le 12 (12 gauge) fa’apea ai ma le 22 (22 caliber rifle).

O moliaga ua tu’uaia ai Letasi na afua mai i se fa’alavelave na tula’i mai i le vaveao o le aso Sa na te’a nei, Me 21, 2017 pe tusa o le itula e 4:21 ina ua taofia e ni ali’i Leoleo se to’alua sa tiute i luga o le alatele i le itu i Sisifo o le atunu’u se ta’avale sa vaaia le alu saoasaoa i luga o le alatele, ae ina ua sailia totonu o lea ta’avale ae maua i ai vaega o fualaau fa’asaina ma se a’upega.

Ae ina ua fa’aauau pea suesuega a Leoleo e uiga i le ta’avale ma le ave ta’avale, sa maua ai loa le isi fana i lona fale atoa ai ma mea uma e fa’aaoga e i latou e tagofia fualaau fa’asaina e pei o le fua e fua ai le mamafa o fualaau fa’asaina, pepa iila e utu ai i totonu fualaau fa’asaina, o le paipa e ula ai, fa’apea ai ma se seleulu.

E pei ona taua i fa’amaumauga a le fa’amasinoga e fa’apea, ina ua taofi e Leoleo le ta’avale sa molimauina le alu saoasaoa, sa iloa ai o le ali’i o Letasi o lo o ia fa’afoeina le ta’avale, lea na ia fa’ailoa i Leoleo le mafu’aaga o lona alu saoasaoa, o le taumafai lea e tuli le taimi o lana fa’apusa mo le aso Sa.

Na fesili Leoleo mo lona laisene ave ta’avale ae na tali le ua molia o loo i totonu o lana ato tupe o loo i lona to’alua i le fale, e oo fo’i i se isi lava pepa e fa’amaonia ai o ia, sa lei mafai ona maua e Leoleo, ae ina ua saili i fa’amaumauga a le Ofisa o Ta’avale Afi le igoa o le ua molia, na iloa ai o lona laisene ave ta’avale na mae’a le aoga i le 3 tausaga talu ai.

A o taumafai Leoleo e saili totonu o le ta’avale, sa vaaia ai se fana o lo o i le nofoa pito i tua, lea na fa’ailoa e le ua molia i Leoleo, o le fana e leaga o lo o ave e fai, ae ina ua saili atili e Leoleo le fana na iloa ai ua lelei le fana ma ua mae’a fo’i ona utu i ai pulufana i totonu, o le fana lea o le ituaiga o le 12.

Na fa’atonu e Leoleo ia Letasi latou te malaga i le Ofisa o Leoleo i Tafuna ma ave i ai lana ta’avale mo su’esu’ega atili, lea fo’i na usita’i i ai le ua molia, ma ina ua faia suesuega fa’aopoopo a Leoleo i totonu o le ta’avale ina ua taunu’u i le Ofisa o Leoleo i Tafuna pe toe maua i ai se isi fana, ae fa’afuase’i ona maua ai e Leoleo se ato fa’afafa Amry i le nofoa pito i tua, o lo o i ai i totonu se tama’i pepa iila o lo o i ai ni pauta papa’e i totonu.

Sa fa’aauau pea suesuega a Leoleo ma maua ai le isi tama’i pepa iila o lo o i ai ni lau meamata mamago, e foliga mai o ni lau mariuana, ma o le taimi lea na taofia ai loa e ali’i Leoleo le toe sailia o le ta’avale a le ua molia, ae fa’afeso’ota’i loa le Vaega o Leoleo Su’esu’e (CID) latou te taulimaina le mataupuo.

Na tatala e Leoleo le ato fa’afafa a o matamata i ai le ua molia, ma i totonu o le ato fa’afafa o lo o i ai tama’i pepa iila e 3, o lo o i ai vaega papa’e o le pauta, lea sa faia i ai le suega ma faamaonia mai ai, o vaega ia o le pauta faasaina o le aisa.

E ese mai i tama’i pepa iila e 3 sa maua i ai vaega o le pauta o le aisa, sa fa’apea fo’i ona maua e Leoleo isi tama’i pepa iila e 3 o lo o i ai lau mamago lanumeamata, lea sa faia i ai se suega faapitoa ma faamaonia ai, o lau mamago ia o le laau fa’asaina o le mariuana.

O lo o taua fo’i i fa’amaumauga a le fa’amasinoga le maua e Leoleo o se sikaleti mariuana ua uma ona taai i le vaega o lo o i ai le leitio o le ta’avale, atoa ai ma isi pepa iila e fa’aaoga e utu i ai le pauta o le aisa o loo paepae solo i totonu o le ta’avale.

Na fa’ailoa e le ua molia i Leoleo e fa’apea, na te le iloaina le taimi na latou tu’uina ai le ato i totonu o le ta’avale. E lei mana’o fo’i le ua molia e faia sana fa’amatalaga i Leoleo.

O le fana o le ituaiga o le 22 na maua e Leoleo i le fale a le ua molia i Aoloau, atoa ai ma isi mea e faaaoga e i latou e tuleiina fualaau fa’asaina, ina ua mae’a ona fa’asino e lona to’alua i Leoleo le fana o lo o i totonu o le la potu moe.

Na fa’amaonia e le fafine i Leoleo, o lona to’alua e ana le ato fa’afafa sa i totonu o le ta’avale, ma o ni isi o taimi e alu atu ai o ia ma lana ato i le fale. Na taua atili fo’i e le fafine i Leoleo e fa’apea, na te le iloaina po o ai e ana fualaau fa’asaina o lo o fa’atau e lona to’alua.