Ads by Google Ads by Google

Tuaolo: Fa’aaoga K-9 su’e ai fualaau fa’asaina totonu o aoga


Le afioga i le ali’i Senatoa ia Tuaolo M. Fruean [ata AF]
ausage@samoanews.com

Na pau le auala e mafai ona maua ai fanau aoga o loo latou umiaina fualaau fa’asaina atoa ai ma a’upega malolosi i totonu o lotoa o aoga i le atunu’u, e pei ona taua e le afioga i le ali’i Senatoa ia Tuaolo M. Fruean i se iloiloga sa faia ma sui o le malo i le aso Gafua na te’a nei, o le fa’aaoga lea o ta’ifau mai le vaega a le K-9 i totonu o aoga eseese e saili ai fanau o lo o latou faia lenei gaioiga.

 

“Pau lea o le auala e mafai ai ona foia le fa’afitauli i fualaau fa’asaina ma aupega malolosi i totonu o aoga, o le fa’aaoga o ta’ifau mai le vaega a le K-9 e sosogi solo i totonu o lotoa o aoga, ae afai e le o lava a tatou ta’ifau ua mae’a ona a’oa’oina i galuega fa’apea, ou te fautuaina le Ofisa o Aoga latou te okaina maia ni ta’ifau fa’apitoa mai fafo, ona tu’u atu lea i le vaega o Leoleo latou te fa’atinoina le galuega, afai tatou te le manatunatu i ni auala e foia ai lenei fa’afitauli, e le mafai ona toe taofia i le lumana’i”, o le saunoaga lea a Tuaolo i le taimi iloiloga sa fa’atautaia e le Komiti o Aoga a le maota maualuga, i lalo o le ta’ita’iga a le ta’ita’i komiti ia Faiivae Godinet, galulue fa’atasi ai ma le Ta’ita’ifono o le Komiti o le Fa’agaioiga o le malo ia Galea’i M. Tu’ufuli.

 

Saunoa le afioga i le Komesina o Leoleo ia Le’i Sonny Thompson e faapea, o lo o i ai ta’ifau K-9 o lo o fa’aaoga e le Ofisa o Tiute e su’e ai uta o oloa mai fafo, aemaise ai lava le su’eina o fualaau fa’asaina ma a’upega o lo o taumafai ni isi e aumai fa’asolitulafono i le atunu’u.

 

Ae i le mataupu o lo o vavao ai i le tau sailiina lea o se fofo o le fa’afitauli i fualaau fa’asaina i totonu o aoga, na taua ai e Le’i se fuafuaga a le Matagaluega o Leoleo e fa’apea, afai ae mae’a le aoga lona 25 a Leoleo o loo fa’agasolo i le taimi nei ma fa’au’u mai ai Leoleo o lo o aooga ai, e to’a 8 Leoleo ua tofia e galulue i totonu o lotoa a aoga i le atunu’u (campus police), ina ia fesoasoani ai i le fa’afitauli o lo o tula’i mai nei.

 

Na fesili le afioga i le ali’i senatoa ia Levu Solaita ia Le’i pe fa’apefea ona sao mai fualaau fa’asaina i le atunu’u, ae na tali le Komesina o Leoleo, e tele naua auala eseese o loo masalomia le ui mai ai o fualaau fa’asaina i le atunu’u, e le gata i uta o loo aumai i va’a, malaeva’alele ae fa’apea ai fo’i ma le falemeli.

 

“E le mafai ona ou faailoaina atu poo fea tonu le nofoaga o loo ui mai ai fualaau fa’asaina, e le o patino fo’i mo va’a fagota, ae pau le tulaga e fia fa’ailoa atu, o lo o matou galulue fa’atasi ma le Ofisa o Tiute i le sailia o uta ma tagata e ulufale mai i le atunu’u ina ia mautinoa e le o sao mai ai fualaau fa’asaina”, o le saunoaga lea a Le’i.

 

Na fautuaina e le afioga i le ali’i senatoa ia Alo Fa’auuga le Komesina ina ia silasila toto’a i ni isi o Leoleo o lo o masalomia lo latou tagofia o fualaau fa’asaina.

 

O le fesili po o ai e pau i ai le fa’aletonu i tulaga o fualaau fa’asaina lea ua ave e fanau i totonu o aoga, na taua ai e le afioga i le ali’i senatoa ia Tuiagamoa Tavai e fa’apea, o faiaoga lava le mafua’aga o nei fa’afitauli, e le o lelei lo latou a’oa’oina o fanau i totonu o potu aoga.

 

“O le taimi lava e taunu’u atu ai fanau aoga i totonu o le aoga, o iina loa e amata ai le galuega a le faiaoga o le a’oa’oina lea o fanau aoga ina ia popoto ma lelei, ae aua le tu’u tia’ia i latou ma le a’afia i fa’afitauli fa’apenei e aofia ai fualaau fa’asaina”, o le saunoaga lea a Tuiagamoa.

 

Na lagolagoina e le afioga i le Alo o Salamasina ia Satele Galu Satele le finagalo o Tuiagamoa, o faiaoga lava le mafua’aga o fa’afitauli ia ua a’afia ai fanau aoga.

 

Na fa’atepa e Satele i puleaoga sa auai i le iloiloga le to’atele o fanau aoga e masani ona vaaia o loo taeele i le sami i lona afioaga i Vailoatai i taimi e tuua ai aoga, ae ina ua ia fesiligia le pule o le aoga e aooga ai fanau aoga nei mo se fesoasoani, ae tali le puleaoga, e le toe aia i latou i fanau aoga pe a tuua le aoga.

 

“E le sa’o lea fa’amatalaga, o le tiute o faiaoga o le mautinoa lea o loo malu puipuia fanau aoga i soo se taimi, ae le o le tuu tia’i o i latou i taimi faapea, ma le tutupu o fa’afitauli e pei ona alia’e mai i fanau aoga i aso nei”, o le saunoaga lea a Satele.

 

Ae na taua e le afioga i le tama’ita’i senatoa ia Fonoti Aufata e fa’apea, e le tatau ona tu’uaia fua faiaoga i fa’afitauli o loo aafia ai fanau aoga, ae o le galuega lena a matua e tatau ona fai.

 

“O le ki o le manuia o le atunu’u ma fanau aoga, o totonu lava o aiga, aua o le fa’avae o Samoa e fa’amuamua le Atua, o le fesili la lea ua tula’i mai, po o fai ni lotu i taeao ma afiafi i totonu o aiga, ailoga o tupu lena tulaga, afai e le o tupu, o iina tonu le fa’apogai o le fa’afitauli e pei ona a’afia ai fanau aoga i le taimi nei”, o le saunoaga lea a Fonoti.

 

Saunoa le afioga i le Maoputasi ia Mauga Tasi Asuega e fa’apea, ua manaomia i le taimi nei le galulue fa’atasi o afioaga uma i le atunu’u, aemaise ai pulega a ali’i ma faipule ina ia fa’amalosia tulafono ma vavao i totonu o nu’u, ona o le isi lea mafua’aga ua maitauina le sasao fa’aafi ai o fa’afitauli nei, ona e le o maopoopo pulega i totonu o afioaga.

 

Na lagolagoina e le peresetene o le Senate ia Gaoteote Palaie Tofau le saunoaga a Mauga, i le tatau lea ona tula’i mai le Ofisa o Mataupu Tau Samoa e fa’amalosia galuega a ali’i mautofi i totonu o nu’u, ma ia fa’amalosia pulega ma vavao i totonu o afioaga ta’itasi.