Ads by Google Ads by Google

Tulafono e fa’asala ai tagata e solia lotoa o aoga i le taimi o le po


Le Loia Sili a le malo, Talauega Eleasalo Ale, ma le Sui Fa’atonusili o Aoga ia Philo Jennings. [ata AF]
ausage@samoanews.com

Ua i luma nei o le maota maualuga se tulafono sa fa’aulufaleina e afioga i Senatoa, e fa’atulaga ai se fa’asalaga mo se tasi e maua o ia soli lotoa o aoga i le taimi o le po e aunoa ma se fa’atanaga.

 

O lenei tulafono sa fa’aulufaleina e le afioga a Magalei Logovi’i, Nuanuaolefeagaiga S. Nua ma Paepae I. Faiai, ma o le aso Faraile na te’a nei na fa’ataunu’u ai le iloiloga o lenei mataupu, ma maua ai le avanoa o le Loia Sili ia Talauega Eleasalo Ale ma le Sui Fa’atonu o le Ofisa o Aoga ia Philo Jennings e molimau ai i luma o le Senate e uiga i lenei tulafono, i se iloiloga na faatautaia e le afioga i le ali’i senatoa ia Fa’amausili Mau Jr, o le ta’ita’i o le Komiti o le Puipuiga o le Saogalemu Lautele a le maota.

 

I le Maga 1 o le Tulafono 46.4027 e pei ona i ai le tulafono taufa’aofi a le Senate, o lo o taua ai le avea ma solitulafono le tu fua o se tagata i totonu o lotoa o aoga i le taimi o le po e aunoa ma se fa’atanaga.

 

Ma, afai e maua se tagata i totonu o lotoa o aoga i le va o le itula e 10:00 i le po ma le itula e 5:00 i le vaveao e aunoa ma se fa’atanaga, o le a molia loa o ia i le solitulafono mama o le tu fua i lotoa o aoga, o se solitulafono A lea i le fa’atulagaina o solitulafono mama, lea e mafai ona fa’asala ai se tasi i le toese mo le umi e le silia i le tausaga atoa, pe fa’asala fo’i i le salatupe e le silia i le $1,000, poo le faasala fo’i i fa’asalaga uma ia e lua.

 

Na taua e Talauega ma Jennings lo la lagolagoina o lenei tulafono, ona o se tulaga ua lelei ma talafeagai e fesoasoani ai i le fa’afitauli o le osofaia soo o faleaoga ma meatotino a le malo.

 

Saunoa Magalei e faapea, o le agaga atoa na mafua ai ona fa’aulu lenei tulafono, ina ia fesoasoani ai i le fa’afitauli lea ua pagatia ai le Matagaluega o Aoga, i le tele o faleaoga ua osofaia ma fa’aleaga e tagata, ma ua alu ai fo’i le tele o tupe a le malo i le tau toe fa’aleleia o mea ua gaoia ma fa’aleagaina.

 

“O le tele o feiloaiga a le Fono ma ta’ita’i o le malo aemaise ai le Ofisa o Aoga i taimi ua mavae, na afua mai ai lenei tulafono ina ua talosagaina se fesoasoani a le Fono i se auala e foia ai lenei fa’afitauli, ma o lea la ua manino le tulafono, soo se tagata lava e toe maua i totonu o lotoa o aoga uma a le malo i le taimi e pei ona taua e aunoa ma se fa’atanaga, o le a molia loa lena tagata i le solitulafono e aunoa ma le toe faia i ai o se isi gaioiga”, o le saunoaga lea a Magalei.

 

O ni isi o fautauga sa tu’uina atu e afioga i Senatoa i le taimi o le iloiloga, o le tatau lea ona fausia ni pa e si’omia ai lotoa a aoga uma i le atunu’u, ina ia fesoasoani ai i le tulafono ma faigofie ai ona iloa tagata e solia lotoa i le po e aunoa ma se fa’atanaga, atoa ai ma le tatau lea ona fa’a faigaluega ni Leoleopo e fa’amalosia le tulafono.

 

Na taua e le afioga i le ali’i senatoa ia Tauaa S. Vaouli le tatau lea ona galulue fa’atasi le Ofisa o Aoga ma le Ofisa o Mataupu Tau Samoa, ina ia fa’a faigofie ai le fa’amalosia o lenei tulafono, ma ia fautuaina fo’i Pulenu’u e fesoasoani i le fa’a malosia o le tulafono, nai lo le tau tu’u atu o le galuega i Leoleo e fa’atinoina.

 

Ae na saunoa le afioga i le ali’i senatoa ia Muagututi’a M. T. Tauoa e faapea, e le tatau ona tu’uina i Pulenu’u poo Leoleo le fa’amalosia o le tulafono, aua e le o po uma e o ai Leoleo e asi nofoaga eseese o lo o i ai uma aoga a le malo i le atunu’u atoa, e fa’apena fo’i i le Pulenu’u, e le fa’amaoni fo’i i latou i le fa’amalosia o le tulafono, aua e vaai atu loa o tamaiti o lona aiga lea ua solia le lotoa a le aoga, ona gugu loa lea e le tautala ma fa’atino le mea amiotonu, ae sili lava pe a tofu le aoga ma le Leoleopo, tusa lava pe na o le alu atu e fealualua’i ai i le po atoa, ae o lo o i ai se tagata e fa’alagolago i ai le fa’amalosia o le tulafono.

 

Ae i le finagalo o le afioga i le tama’ita’i senatoa ia Fonoti T. Aufata e fa’apea, e le tatau fo’i ona popole tele le malo i tagata mai tua e solia ma fa’aleaga meatotino a le aoga, ae tatau fo’i ona vaavaai i tagata o loo i ai ki o ofisa ma potu aoga, poo faiaoga ma tagata faigaluega, aua o le tele o taimi, fa’apea lava o tagata mai tua ia o loo faia osofaiga ma ave faagaoi meatotino a le aoga, ae emo ane le ata o tagata faigaluega lava.

 

I le tulaga o le fausia o pa e si’omia ai lotoa o aoga i le atunu’u, na fa’amanino ai e Jennings le taua tele o lea fautuaga, peita’i sa vaavaai ai fo’i le Ofisa o Aoga i tausaga ua mavae, ma maitauina ai le faigata ona fa’atino lea tulaga, ona o lo o i ai aiga o lo o nonofo i tua atu o faleaoga, e faigata ona latou uia tulaga o le auala mo le aga’i mai i luma pe afai ae si’omia le lotoa i le pa, e le gata i lea, o le tele o fanua o lo o fausia ai faleaoga o fanua ma eleele o aiga nei, ma o le isi lea tulaga o lo o faigata ai lea fuafuaga.

 

I tulaga i Leoleopo, na ioeina e Jennings le taua o le tatau lea ona i ai ni Leoleopo e fa’amalosia le tulafono, ae o le fa’afitauli, e le o i ai se vaega tupe e fa’atupe ai e le Matagaluega o Aoga lea tulaga.

 

Na fautuaina e le afioga i le ali’i senatoa ia Satele Galu Satele le tatau lea ona aofia i totonu o le paketi a le Ofisa o Aoga mo le tausaga tupe fou se vaega tupe e fa’a faigaluega ai ni Leoleopo mo aoga uma i le atunu’u, ina ia mafai ai ona foia lenei fa’afitauli.

 

A o talanoaina ai le tulafono e puipuia ai le faaleagaina o faleaoga a le malo, o le fa’aiuga o le vaiaso i ona tua atu na ripotia ai le talepe ma faaleaga e tagata potu aoga o le aoga maualuga i Samoana.

 

Na taua e le afioga i le ali’i Faipule ia Veevalu Meauta Mageo le tele o meaaoga na gaoia mai lea osofaiga, i le taimi na ia talosagaina ai le Fa’atonusili o Galuega Lautele a le malo ia Faleosina Voigt, mo se vaega tupe e fa’atau ai ni moli e fa’amalamalama ai totonu o le lotoa, ina ia tau fesoasoani ai i le fa’afitauli lea o lo o fa’aauau pea ona a’afia ai le aoga i Samoana.