E le sili atu ma le lima aso le umi o le Fono Fa’apitoa a le ali’i kovana ia Lolo Matalasi Moliga lea ua valaauina nei mo le Fono Faitulafono, e fa’apasia ai totino o Komiti Fa’afoe sa ia tofia ma fa’ao’o atu i luma o le Fono i le vaiaso na te’a nei.

O le aso Tofi na te’a nei na fa’alauiloa ai e ta’ita’i a maota e lua i afioga i senatoa ma faipule le fono faapitoa lea ua valaau e le kovana, ina ia mafai ia ona fa’apasia galuega fou lea ua fa’atoa tauaao atu e le kovana i luma o maota e lua.

Na tula’i le afioga i le ali’i senatoa ia Satele Galu Satele ma fa’aleo lona lagona le fiafia i le toe valaau fua e le kovana o lenei fono fa’apitoa, ae le o i ai lava ni mataupu taua e alaga tatau ai ona valaau se fono fa’apitoa.

Ae na fa’amalamalama e le sui peresetene o le senate sa taitaia galuega a le fono i lena taeao, afioga Nuanuaolefeagaiga S. Nua e fa’apea, o lo o manino le Tulafono, o lo o i ai le malosi i le kovana na te valaauina ai lana fono fa’apitoa i soo se taimi e finagalo o ia e valaauina ai.

O le agaga o le kovana e pei ona taua i lana tusi sa tu’uina atu i ta’ita’i o le fono i le vaiaso na te’a nei, o le agaga autu ua valaauina ai lana ulua’i fono fa’apitoa mo le nofoaiga lenei 35 a le Fono Faitulafono, ina ia mafai ai ona pasia totino o Komiti Fa’afoe eseese lea ua mae’a ona ia tauaao atu i le fono.

Ina ua fa’aulufale i’ugafono mo totino o Komiti Fa’afoe sa tofia e le kovana, na talia ai e ta’ita’ifono a komiti eseese a le maota o sui le fautuaga a le afioga i le fofoga fetalai ia Savali Talavou Ale, ina ia tolopo uma a latou iloiloga sa fa’atulaga mo le aso Lua, aso Lulu ma le aso Tofi, ae ave le avanoa e fa’ataunu’u ai iloiloga mo le fa’amaoniaina o totino o Komiti Fa’afoe e pei ona tofia e le kovana.

Ae mo le maota maualuga, na toe suia uma fuafuaga a komiti eseese mo le tau fa’atulagaina o taimi ma aso e faia ai iloiloga e faamaonia ai tofiga mo Komiti Fa’afoe, ina ua tu’uina atu se fautuaga mai le afioga i le ali’i peresetene o le Senate ia Gaoteote Palaie Tofau, ina ia aua ne’i manatu e fa’avavevave le fa’atulagaina o ni iloiloga mo mataupu fou a le kovana lea na fa’atoa taunu’u atu i le vaiaso mulimuli o le fono, ae lelei pe a taoto se’i toe fo’i mai le Fono i lana tauaofiaga lona lua ia Iulai o le tausaga nei.

E ui i le laititi o le taimi na taunu’u atu ai tofiga a Komiti Fa’afoe a le malo, ae na mafai lava e le maota o sui na fa’ataunu’u a latou iloiloga i le vaiaso na te’a nei.

ILOILOGA KOMITI FA’AFOE OFISA FEMALAGAIGA

E lei umi se taimi na fa’ataunuuina ai le iloiloga a le Komiti o Mataupu Tau Tulafono a le maota o sui e fesiligia ai totino o le Komiti Fa’afoe o Femalagaiga na tofia e le Kovana, ae pasia loa le mau ina ia fa’aagafua molimau na sauni le maota mo lana fa’aiuga.

O le itu sa mafuli i ai fautuaga a afioga i faipule, o le fautuaina lea o sui o le Komiti Fa’afoe ina ia tausisi i le tulafono ma mulimulita’i i auala e fa’atonutonu ai le soona ulufale mai o tagata mai fafo i totonu o Amerika Samoa.

E ui sa i ai se tasi o fautuaga sa taoto atu i le Komiti Fa’afoe, ina ia taofiofi le soona fa’aulufaleina mai o tagata mai fafo i le atunu’u, e mafua mai i le tulaga pagatia ua i ai le tamaoaiga o le malo tele ma le atunu’u i le taimi nei, ae na saunoa le afioga i le alii faipule ia Vailiuama Steve Leasiolagi e fa’apea, e taofi lona sui e taua atu le tatala pea o le avanoa e fa’ato’atele ai tagata e ulufale mai i le atunu’u, aua a to’atele tagata e nonofo i le atunu’u o le ola fo’i lena o pisinisi ma manuia le malo, ae a to’alaiti tagata e nonofo i le atunu’u, e tau le ola fo’i pisinisi ma tau leai ni tagata fa’atau.

I le taimi o le tauaofiaga a le maota o sui, na pasia uma ai suafa o totino e to’afa a le Komiti Fa’afoe i le palota e 12-0. O suafa ua pasia e aofia ai Gloria Ausage, Fanene Edda Wyberski, Togotogo Poto Sotoa ma Ativalu Tago.

O sui o le Komiti Fa’afoe e lei auai i le iloiloga e aofia ai Frank Gaisoa, Fa’amausili Mau Mau Jr ma le afioga i le ali’i faipule ia Gafatasi Afalava.

ILOILOGA KOMITI FA’AFOE LITAEA

E leai ni fesili na tu’uina atu i totino o le Komiti Fa’afoe o le litaea i le taimi o le iloiloga, ina ua pasia le mau na fa’atula’i e sui o le komiti e fa’aagafua ai molimau, ae tu’u sui o le Komiti Fa’afoe e fa’atino a latou galuega mo le manuia o le atunu’u.

Na pau fautuaga sa tu’uina atu e le ta’ita’i komiti ia Vailoata Eteuati Amituana’i, o le talosagaina lea o le Komiti ina ia fa’aauau pea galuega lelei mo le manuia o le teugatupe o le litaea a le malo. Sa fa’alauiloa ai fo’i i le taimi o le iloiloga le tofia e le kovana o le afioga i le ali’i senatoa ia Tuaolo M. Frean e sui tulaga i le tofa Le’i Sonny Thompson lea sa avea muamua ma totino o le Komiti Fa’afoe, peita’i o lea ua tofia e avea ma Komesina fou o le Ofisa o Leoleo.

O sui e to’afa o le Komiti Fa’afoe o le litaea sa auai i le iloiloga ma pasiaina fo’i o latou suafa e le maota o sui, e aofia ai Tuaolo e 14-0, Maaelopa Bob Tuiasosopo, Tofala Iafeta ma Aloma Langford i palota e ta’i 13-1.

ILOILOGA KOMITI FA’AFOE SIKOLASIPI

E le umi se taimi na fa’aalu e le Komiti o Aoga e fesiligia ai totino o le Komiti Fa’afoe o Sikolasipi mo fanau aoga, ae mae’a loa le iloiloga ma pasia ai suafa o sui e to’atolu sa auai i le iloiloga.

O le tele o faipule na maua le avanoa e fa’aleo ai o latou finagalo, sa latou talosagaina sui o le Komiti ina ia silasila toto’a i auala uma e fa’afaigofie ai tulaga o sikolasipi mo fanau. Saunoa le ta’ita’ifono o le Komiti o Aoga a le maota o sui ia Vaetasi Tuumolimoli Saena Moliga e fa’apea, e mafua ona tele fa’asea a matua i tulaga fa’aletonu o loo aafia ai tupe mo sikolasipi a fanau, e mafua mai lava i le fa’atamala ma la faifaiaga o fanau i le tu’uina mai lea o a latou togi o loo moomia atu e le Komiti o le Sikolasipi, ina ia mafai ai ona fa’aauau pea tulaga o fesoasoani tau tupe.

Na talosagaina e ni isi o faipule sui o le Komiti o le Sikolasipi ina ia vaavaai i ni isi auala e fa’aopoopo ai vaega tupe mo fanau aoga a le atunu’u.

O sui e to’atolu na pasia e aofia ai le afioga i le ali’i faipule ia Veevalu M. Mageo i le palota e 14-0, Donna Gur ma Ruth Matagi-Fa’atili i le palota e ta’i 12-2.