E le gata i le auai mai o le Ao mamalu o le malo o Samoa, afioga Tui Atua Tupua Tamasese Efi, fa’apea ai ma le afioga i le ali’i palemia ia Tuilaepa Lupesoliai Sailele Malielegaoi e molimauina sauniga o le fa’atautoina o le Kovana ma le Lutena Kovana mo le amataina ai o le la nofoaiga lona lua, ae ua fa’apea fo’i ona valaaulia fa’apitoa e ta’ita’i o le malo le atunu’u atoa uma lava ina ia auai i le molimauina o lenei saunoaga taua.

O le sauniga o le fa’auuga o le Kovana ma le Lutena Kovana, ua fa’amoemoe lea e fa’ataunu’uina i le aso, aso 3 Ianuari 2017 i le itula e 11:30 i le Malaeoletalu i Fagatogo.

E pei ona taua e le afioga i le ali’i kovana, le tofa i le Tootoo ia Lolo Matalasi Moliga i se pepa o fa’amatalaga sa tu’uina mai i le vaiaso na te’a nei, o loo ia taua ai lo la agaga fiafia ma le afioga i le lutena kovana ia Lemanu Peleti Palepoi Mauga, ina ua mafai ona fa’ataunu’uina le la nofoaiga lona lua e ala i le filifiliga atoa ai ma le talitonuina o i laua e le mamalu lautele o le atunu’u ma le au palota.

“Ona o lea tulaga taua ma le fa’aeaea, ua ma tu’uina atu ai ma le afioga ia Lemanu lenei tusi valaaulia e valaaulia fa’aaloalo ai le atunu’u atoa, ina ia tatou auai i le molimauina o lenei sauniga taua, ma tatou amataina ai lenei nofoaiga lona lua i lo tatou fa’atauaina lea o le saunoaga a le ali’i peresetene o John F. Kennedy e fa’apea, ‘aua e te fesili poo le a se mea e faia e lou malo mo oe, a ia e fesili ane poo le a se mea e te faia mo lou malo”, o le saunoaga lea a le ali’i kovana.

O le taunu’u aloaia ai o malo valaaulia faapea ai Ta’ita’i o Ekalesia eseese uma i le atunu’u i le Malaeoletalu, ona tula’i ai loa lea o le Sui Failautusi o le Ofisa o Mataupu Tau Samoa e fa’afeiloaia le mamalu o le au valaaulia, le tofa i le Tootoo ia Malemo L. Tausaga, ona sosoo ai loa lea ma le sisiina o tagavai o le malo tele o Amerika fa’apea ai le tagavai o Amerika Samoa.

O le mae’a ai o le tatalo muamua e saunia e le susuga Rev. Elder Siaosi Mageo o le Ekalesia Assembly of God i Amerika Samoa, atoa ai ma le ulua’i viiga e saunia e le Ekalesia Manumalo Baptist Church, ona sosoo ai loa lea ma le tauaaoina atu e le Komesina o le Ofisa o Palota, tofa Uiagalelei Dr. Lealofi Uiagalelei o le Tusi Pasi e fa’amaonia ai le avea o Lolo ma Lemanu o ta’ita’i o le malo mo le isi 4 tausaga o loo lumana’i nei.

O le sauniga o le Fa’atautoina e saunia e le afioga i le Fa’amasino Sili ia Lealaialoa F. M. Kruse, sosoo ai loa ma le fa’apaiaina o ta’ita’i o le malo e sui o Ekalesia eseese uma e 9 i totonu o Amerika Samoa.

O le feau fa’aleaga mo le sauniga o le fa’auuga o le a saunia lea e le Ta’ita’ifono o le Ekalesia EFKAS i Amerika Samoa, susuga Rev. Elder Mamoe Eveni, ma viiga o le Atua e sauniga e le aufaipese a le Ekalesia Katoliko mai Iliili.

O le mae’a ai o le feau fa’aleagaga ona sosoo ai loa lea ma le saunoaga mai le afioga i le ali’i kovana ia Lolo, sosoo mai ai ma le saunoaga mai le afioga i le lutena kovana ia Lemanu, ae taualuga ai loa i le saunoaga fa’apitoa mai ia Tuilaepa, ma fa’ai’u ai loa le sauniga i le tatalo fa’ai’u e saunia e le susuga Rev. Elder Fa’amao Asalele mai le ekalesia CCJS i Fagatogo.

O le mae’a ai o le taumafataga o le aoauli ona sosoo ai loa lea o fa’aaloaloga fa’aleaganu’u, lea ua sauni mai ai Tama Matua ma To’oto’o, e aofia ai ma le sauniga o le ‘ava fa’atupu mo ta’ita’i o le malo aemaise ai le mamalu o le au valaaulia, lea ua tapena mai i ai le Itumalo o le Manu’a Tele, ma fa’ai’u ai loa i le saunoaga mulimuli a le tofa Malemo, ma le tatalo fa’amanuia e saunia e le susuga Rev. Elder Eveni.

I le fonotaga mulimuli a le Kapeneta i le 2 vaiaso talu ai, na talosagaina ai e le ali’i kovana Fa’atonusili o Matagaluega ma Ofisa eseese a le malo ina ia fautuaina tagata faigaluega a le malo e auai i le molimauina o lenei sauniga taua.