Ads by Google Ads by Google

Matagofie ta’aloga faitaulia fa’ai’u ai taligamalo OFC-U17 Soka

O se ta’aloga matagofie alofaiva i ai ‘au e fa sa sailia le tulaga tolu ma le fa, ae maise o le siamupini ma le tulaga lua o lenei tausaga i le OFC -U17 aua na tau fai vevela ‘au e le’i fa’atemeteme fo’i tapenaga a ‘au ta’itasi nei mo le latou fetauiga mo le manumalo.

 

I le ta’aloga muamua na sailiga le tulaga tolu ma le fa e le ‘au mai Niu Kaletonia ma le ‘au a Vanuatu. E le’i fa’atalale lava Vanuatu i le latou upu na fai mai le amataga, “ua matou o mai e avatu le ipu, o a’u tama uma fo’i e a’ami uma lava, e le o i ai ni tama e le lelei le ta’alo Soka.”

 

I le ta’alo na fa’atino e Vanuatu i le latou ta’aloga ma Niu Kaletonia. I sikoa e ono na latou maua, ulu lava le kiki a le tama o Worworbu i le lona tolu o minute talu ona amata le fetauiga.

 

Na fai si va ae fa’ato’a maua le sikoa lona lua i le mae’a ai o le malologa o le afa taimi, i le 45 minute talu ona amatalia le ta’aloga, lea na fafao ai le kiki a le tama o Edison. Peita’i le isi  8 minute na soso’o ai ae toe sikoa Worworbu.  O le isi tolu minute ae fafao le kiki a le tama o Wilkins mo le latou sikoa lona fa ae 9 minute na eseese ai, ae toe sikoa le tama o Jimmy ma le toe sikoa mulimuli lava a Worworbu i le 90 minute talu ona faia le latou ta’aloga, maua ai o lea ta’aloga, 6 Vanuatu leai se ‘ai o Niu Kaletonia.

 

Na iloga ona fa’afiafiaina le mamalu o le au maimoa, aua sa matua tapua’ia faiva o Vanuatu e le tatou taligamalo, aua o i latou sa nafa ma le tausiga lelei o nei ‘au mo se taimi umi.

 

O le taumafaiga a Niu Kaletonia, e tusa ai ma le tala a le latou fa’atonu, Kamali Fitialeata, “Ua le toe manatu a matou tama ta’a’alo i le ta’aloga mulimuli lenei, o ana po sa matua fiafia lava latou e tafafao ma le momoe vave e pei ona masani ai, ae ua fai telefoni ma talanoa i o latou aiga, o lea o le a o atu. Ua matou fiafia ua maua e Vanuatu le manumalo, sa latou koleni fa’apitoa ma tausisi i le malosi e mo’omia mo le ta’aloga mulimuli lenei.

 

I le ta’aloga faitaulia o le aso, i le va o Niu Sila ua 5 tausaga o avea ma siamupini o le OFC-U17 ma le ‘au a Tahiti, e le’i fa’amatu’ua lava e Tahiti le malo ia Niu Sila i le taimi atoa o le latou fetauiga.

 

I le afa muamua, e matua le mafai ona sofa’ia e Niu Sila le puipuigamalu a Tahiti, ma e le’i fa’avaivai fo’i Niu Sila latou i le puipuiga o le latou itu ina ne’i sofa’i atu e Tahiti. Peita’i, i le 60 o minute talu ona amatalia le ta’aloga atoa, ae fa’ato’a sikoa loa Logan Rogerson le numera 10 a Niu Sila, lea fo’i na ia maua le fa’ailoga o le tama ta’alo lelei o le ta’amilosaga, ma o le kapeteni fo’i o le Kiwi “All Whites.”

 

O le toe ta lava a Tahiti sa toe maua ai le sikoa i le lona 81o minute, na fa’ato’a maua ai le latou sikoa na taumafai i ai mai le ta’aloga atoa, maua ai ‘ai o le filiga maea lea i le tasi i le tasi. Na mae’a lava le taimi atoa o le ta’aloga e le’i toe maua nisi sikoa, ma ua fa’atulaga ai loa, le ala e saili ai le siamupini, o kiki e lima, e to’alima fo’i tama ta’alo a au taitasi e kikia polo ae taitasi lava Goalie.

 

Ina ua sao le kiki muamua a Niu Sila, ae poloka mai e le Goalie a Niu Sila le kiki muamua a Tahiti, o i’ina lava na fa’afaigata ai le mataupu, ma o le kiki lava lea e tasi na maua e Michael Woud a Niu Sila, o le ai lava lea na manumalo ai Niu Sila, e tasi lava.

 

Fa’ailoga Fa’apitoa

 

Na taua’aoina le fa’ailoga fa’apitoa i le kapeteni o le au soka a Amerika Samoa, ona o le latou taligamalo. Na soso’o lea ma le taua’aoina o le fa’ailoga fa’apitoa mo le Au a Tahiti ia Vaiari’i Halligan, i lona avea ma tulaga lua, ma o se ta’aloga matagofie fo’i ona o le malosi o le latou taumafaiga i le taimi atoa o le ta’aloga. O le tama ta’alo lelei o le liki soka atoa na taua’ao lea i le Numera 10 a Niu Sila. Na soso’o fo’i ma le taua’aoina o pine uma mo le ‘au a Vanuatu, taua’aoina o pine uma mo le au a Niu Kaletonia, taua’ao ai pine mo le ‘au a Tahiti ae mulimuli ai i pine auro ma le Ipu i le ‘au siamupini o le OFC - U17 2015 i le Au Soka a Niu Sila.