Fetufaaiga
a le Kovana ma le atunuu i luga o le ea
tusia: Ausage
Fausia
TULAFONO MO
AVE TAAVALE LA'U PASESE
Ona o le tele
o faasea mai le atunuu i le faatamala o ave pasi i le faatinoina
o latou tiute aua le fela'uaiga o le mamalu o le atunuu i lea
aso ma lea aso, na saunoa ai le alii Kovana, ua oso a'e se manatu
ia te ia, ua tatau ona fau se tulafono, e faasa ai soo se ave
taavale la'upasese e aofia ai pasi ma taxi, ona toe talanoa i
luga o se telefoni feavea'i ao ave le pasi poo le taxi.
Saunoa Togiola,
o lea fautuaga ua oso mai i lona mafaufau, na faavae mai lea
i le tele o faasea mai le atunuu, ona o le tele o faalavelave
e toeititi lava tutupu mai i le tele o vaiaso, o le tulaga faatamala
lava o nisi o ave pasi ma nisi o ave tasi.
Na taua e se
tasi o tina na maua lona avanoa e talanoa atu ai i luga o le
polokalame, ina ua latou malaga ma si ana fanau i le vaiaso na
tea nei i luga o se pasi, na toeititi lava lavea le pasi ina
ua mua ona talanoa le ave pasi i lana telefoni, ae galo ai o
loo alu le pasi.
Na taua foi e
le isi tina, na toeititi lava lavea le latou pasi ina ua moe
le ave pasi ai ona o le le lava o le malologa, ma ina ua fautua
atu i ai i le ave pasi ina ia faatu le pasi ae alu i le fale
e fai sana malologa, peitai na tali mai le ave pasi, e sili ona
alu e saili se isi pasi e alu atu ai, pe afai e fefe i le oti.
MAFUAAGA UA
TUAI AI ONA FAUSIA LE MAKETI I FAGATOGO
Na faamanino
e le alii Kovana, ua mafua ona taofi le faagasoloina o le galuega
mo le fausia o le maketi fou i Fagatogo i le taimi nei, ona na
aumai le ata mo le faatinoina o le galuega faapea ai ma le tauofoga,
ua toeititi lava faatolu ina le maualuga o le tau o le konekarate,
ma le aofa'i o le tupe na faatulaga mo le galuega.
O totonu o le
2 vaiaso lea o loo fuafua e tatau ona oo atu i ai ua toe amata
lenei galuega tele, ma o se galuega e taua tele mo le atunuu.
E lei faailoa mai e le alii Kovana pe fia le aofa'i o le tupe
na faatulaga e faatino ai lenei faamoemoe.
O le taimi nei,
o loo faia ni a latou fetuunaiga ma le konekarate o loo fuafua
latou te fausiaina lenei galuega, mo se tupe fetaui e faatino
ai loa lenei faamoemoe.
MEATOTINO
A LE MALO
E tele nisi o
le atunuu na faasea i le alii Kovana, ona o le le faautauta o
nisi o tagata faigaluega a le malo, i le soona faaaogaina o taavale
i mea e le o ni galuega a le malo. Na taua e le isi olomatua
na talanoa atu i luga o le telefoni, e i ai isi tagata faigaluega
a le malo ua fai ma a latou masani le fa'aaoga o taavale nei
e fai ai faatau a latou aiga, ae le gata i lea, o le feoai ai
i taimi e le o ni taimi faigaluega.
Ua tuuina atu
le fautuaga a le alii Kovana i le mamalu lautele o le atunuu,
afai ae toe maitauina lea ituaiga faaletonu, e sili ona faamau
i lalo le numera o le taavale, le taimi ma le nofoaga o loo tu
ai, faapea ai ma le igoa o le tagata na alu atu pe afai e silafia,
ona tuuina lea i lona ofisa.
Sa ia taua i
le atunuu, e talitonu o ia, e le o faamaoni nisi o tagata faigaluega
a le malo i le puipuia ma le tausia lelei o meatotino nei, ae
o meatotino e aia tutusa uma i ai le atunuu, aua o loo tipi i
ai a latou lafoga.
Fa'afesootai
le tusitala i le
ausage@samoanews.com.
© Osini Faleatasi Inc. dba
Samoa News reserves all rights.
|