Le auai le
Kovana i le tatala aloaiaina o lana Fono Faapitoa i le taeao
nei
tusia: Ausage
Fausia
O le a le auai
le taitai o le atunuu i le tatala aloaiaina o le Fono Faapitoa
a le Fono Faitulafono, lea ua faamoemoe e tatala aloaiaina i
le itula e 10 i le taeao nei, ae ua faamoemoe e tatala lava le
tauaofiaga a le maota latou, e pei ona faamaonia mai e le afioga
i le alii Peresetene o le Senate, tofa Lolo Moliga.
Ina ia tusa ai
ma tulafono tumau toe teuteuina a le teritori o Amerika Samoa,
e na o le tatala aloaiaina lava o le ulua'i tauaofiaga a le Fono
i le masina o Ianuari o tausaga ta'itasi, e tatau ona auai le
alii Kovana poo sona sui foi, peitai o Fono Faapitoa, e le auai
se'i vagana ua mana'omia atu e le Fono.
Saunoa le tofa
Lolo ina ua fesiligia e le Samoa, e le o i ai ni mataupu e ono
manaomia ai le auai o le alii Kovana, le afioga i le matua ia
Togiola Tulafono, mo le fono faapitoa lea ua faamoemoe e tatalaina
i le aso.
O loo i ai foi
lona faanaunauga e tatau ona oo atu i le taimi e tatala aloaia
ai le fono faapitoa a le alii Kovana i le taeao nei, ua maea
uma atu galuega o loo fuafua le kovana e fofogaina i le fono
faapitoa lenei.
O le fono faapitoa
muamua lenei ua valaauina e le alii Kovana i le nofoaiga lona
30 lenei a le Fono Faitulafono, i le paeaiga lona tolu lenei
ua maea.
O mataupu taua
e lima o le a aofia ai i le fono faapitoa lenei lea ua faamoemoe
e 10 aso le umi e aofia ai faaopoopoga mo le tulafono lea e palota
mai ai alo o le atunuu o loo tautua i le militeli faapea ai ma
le tulafono taufaaofi e uiga i siitaga o totogi o faiaoga.
O isi mataupu
ua faamoemoe e talanoaina i le fono faapitoa e aofia ai le vaega
tupe e faatupe mo le falema'i, faatulagaina o se tulafono mo
le pu'eina o ata e tagata eseese mai fafo i le taimi o le Faaaliga
o Tu ma Aganuu a le Pasefika, faapea ai ma le faamaoniaina o
nisi o tofiga mo komiti ma komisi a le malo.
I le toe faamautuina
ai o le fuafuaga a taitai o le fono i le faauluina lea o se iugafono,
e talosagaina ai ma le faaaloalo le tofa Faleomavaega Eni ina
ia faia uma auala na te silafia, e mafai ai ona ia taofia le
toe sii o le isi .50 lea ua faamoemoe e faamamaluina i le aso
25 o Me, ona o lea siitaga o le a maitauina ai se aafiaga tele
i le tamaoaiga o Amerika Samoa.
Na toe faapupula
e le tofa Lolo, tulaga matuia o le siitaga lona lua lea pe afai
ae taunuu, aua o iina tonu lea o le a vaaia ai loa aafiaga i
le tamaoaiga o Amerika Samoa.
O le tofa Lolo
le isi taitai o le Fono na molimau i le iloiloga lea na faatautaia
e sui o le konekeresi a le malo tele, lea na faia i le Lee Auditorium
i le amataga o le tausaga nei, ina ia taofia le aofia ai o Amerika
Samoa i le siitaga o totogi maualalo, ona e le o talafeagai ma
lona tamaoaiga i le taimi nei.
Peitai, talu
mai le vaiaso na tea nei, e na o le tasi lava le mataupu ua mafai
ona oo atu i le Fono mai mataupu o loo fuafua le kovana e talanoaina
i le fono faapitoa, ma o le mataupu lea e uiga i le tofia o le
afioga i le Kovana Itumalo, Tufele Li'amatua e avea ma totino
o le komiti faafoe a le falema'i.
O le afioga i
le Alofioamoa ia Tufele, o le a sui tulaga i le susuga Dr. Fred
Uhrle lea ua faamavea mai lona tofiga o le totino o le komiti
a le falemai sa i ai, ona o tulaga o feteena'i ma lana galuega
o loo galue ai i le taimi nei i le vaega a le federal VA Outpatient.
Faafesootai
le tusitala i le imeli ausage@samoanews.com
© Osini Faleatasi Inc. dba
Samoa News reserves all rights.
|