Faasalalau
tuusa'o e se kamupani Fiti taualumaga Faaaliga o Tu ma Aganuu
a le Pasefika
Ttusia: Ausage
Fausia
Ua faamaonia
mai e le komiti o le tapenaga mo le Faaaliga lona 10 o Tu ma
Aganuu a le Pasefika, le filifilia lea o se kamupani faasalalau
mai Fiti, latou te faasalalauina le talimalo a Amerika Samoa,
mo le faamoemoe o le Faaaliga lona 10 o Tu ma Aganuu a le Pasefika,
lea ua faamoemoe e amataina i le aso 20 o Iulai ae maea i le
aso 2 o Aokuso.
E 14 atu motu
o le Pasefika e aofia ai Samoa e lua ua faamoemoe, o le a latou
maimoaina le faasalalauina tuu sa'o atu o Faaaliga o Aganuu a
le Pasefika, ma e faitau miliona ma miliona tagata mai nei atunuu
o le a molimauina lenei tautua taua.
Na faaalia e
le faletua o Leala Pili i le vaiaso na tea nei, o le kamupani
faasalalau foi lea mai Fiti na o latou faasalalauina le faaaliga
o Tu ma Aganuu a le Pasefika i le tausaga e 2000, lea na talimalo
ai le atunuu o Niu Kaletonia, aemaise ai Taaloga a le SPG lea
na talimalo ai Samoa i le tausaga ua mavae.
E le gata foi
i lea, e tele nisi aso faapitoa tetele faapenei a le Pasefika
ua faatinoina lea e ala i le tautua a lenei kamupani mai Fiti.
Na pau le tulaga
e lei mautu mai i le taimi nei, o le tulaga lea o le totogi mo
le faasalalauina tuusa'o o le faamoemoe, lea ua faamoemoe e lua
itula i le taimi e tatala aloaia ai le Faaaliga a Tu ma Aganuu,
faapea ai ma le lua itula mo le sauniga e tapunia aloaia ai le
faamoemoe.
E le gata foi
i lea, e tasi le itula mo faafiafiaga mai aso ta'tasi o le a
mafai ona faasalalauina tuu sa'o e ala i le tautua a le kamupani
lenei.
E le o faamaonia
mai i le polokalame lea ua faatulaga mo le tai tasi itula i aso
o vaiaso e lua lea ua faamoemoe e faagasolo ai faafiafiaga a
atunuu eseese, pe aofia ai ma le faasalalauina tuusa'o o tuuga
fautasi aemaise ai o le sailia o le siamupini i taaloga o kirikiti
mo vaega o alii ma tamaitai, i le va o Samoa e lua.
Saunoa le tofa
Nanai ina ua feiloai ma le Samoa News i le faapolokalame ina
o tuugafautasi mo le faamoemoe ia Iulai, o le a malaga mai fautasi
e lua mai Samoa e tausinio ma fautasi e 8 o loo i ai a le atunuu,
e faamatagofie ai le taligamalo a Amerika Samoa mo le Faaaliga
o Tu ma Aganuu i lenei tausaga.
O le polokalame
mo le faaaliga o tu ma aganuu a le Pasefika lea ua maea ona faataoto
e le komiti, na ona maea lava o le sauniga e tatala aloaia ai
le faamoemoe i le aso 20 o Iulai, o le afiafi lea o le aso Sa,
soso'o ai loa ma faafiafiaga mai atunuu eseese e toa 27 mai le
Pasefika e aofia ai ma Amerika Samoa, i totonu o le 2 vaiaso.
O le taimi lea
o le a molimauina ai e le atunuu faafiafiaga eseese mai le atumotu
eseese uma o le Pasefika, lea e aofia ai ma ituaiga faafiafiaga
ia e manatu nisi e ono avea ma itu e aafia ai tu ma le aganuu
a Samoa, e pei o faafiafia mai Papua Niu Kini, Solomona, Atukuki
ma isi lava atu motu o le Pasefika lea e sisiva faasausau tamaitai
i le taimi o a latou faafiafiaga faaleaganuu.
Saunoa le faletua
ia Leala, e ui o se mataupu sa faigata ona tuufaatasia i ai lagona
o sui usufono mai atunuu eseese o le Pasefika, peitai ua aloaia
nei i le taimi nei, ma ua tatala atu ai le avanoa i atunuu uma,
ina ia faaaila a latou lava aganuu masani, e leai se auala e
faalavelavea ai fua.
E lei mautu mai
se faaiuga a le komiti o tapenaga mo le faaaliga o tu ma aganuu
a le Pasefika, ini au faafiafia mai le atunuu ua lautogia mo
le faamoemoe o lenei tausaga, i le maea ai o faafiafiaga i le
vaiaso a'o lumanai le fu'a na maea atu nei, i le malaeoletalu
i Fagatogo.
Mai au faafiafia
e toa 25 na faafiafia i le po o le Aso Gafua ma le Aso Lua, e
na o le toafa au faafiafia o le a filifilia e le komiti, e faafiafia
i le faamoemoe o le festival i lenei tausaga.
Faafesootai
le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|