Fetufaaiga a le Kovana ma le atunuu i luga o le ea tusia: Ausage Fausia SII I LUGA LAFOGA MO LE AVA MALOSI MA LE TAPAA O le faatupulaia o le faitau aofa'i o tupulaga talavou o loo aafia i le tagofiaina lea o le ava malosi faapea ai le tapaa, na talosagaina ai e nisi o le atunuu le alii Kovana, ina ia sii i luga le lafoga o nei oloa, ina ia faa faigata ai i tupulaga talavou ona latou toe tagofia tulaga o fualaau oona nei. Peitai na saunoa le alii Kovana, tusa lava poo fea le maualuga o le sii e tuu i ai e le malo nei oloa, e mafai lava e tupulaga talavou ona latou faatauina ma maua mai, ona o loo i ai le fesoasoani a tagata matutua, ma o se auala lea e tatau ona silasila toto'a i ai taitai o le atunuu aua e foliga mai, o tagata matutua lava le faapogai. PASI AOGA MA FAALETONU O LOO TULAI MAI AI E le fou le mataupu e uiga i pasi aoga i luga o le polokalame a le alii Kovana, peitai na ia faalauiloaina i le atunuu i le vaiaso na tea nei, o le faaletonu o loo tula'i mai i pasi aoga i le taimi nei, o loo galulue i ai lona ofisa ina ia tau foia. O le faafitauli e pei ona saunoa Togiola Tulafono, o le tele o pasi aoga o loo faatali a latou totoga, ma e le o mafai ona feoa'i e tautua fanau aoga, ma e mafua mai nei faaletonu, ona o le tuai taunuu mai o totoga o loo oka i fafo. Sa ia taua foi le tulaga e uiga i isi faasea i le maua solo mai o pasi aoga, o loo tutu solo i fale inisinia tua, ae ua le tuu tasi i se fale se tasi e mafai ai ona malu puipuia, peitai na faamanino e le alii Kovana, o le faafitauli ua faaoo atu i lona ofisa ua mafua ai lea tulaga, ua tau le talitonuina foi fale inisinia, ona e avatu le pasi e tasi le mea o loo faaletonu, ae uma ane ua tele isi mau mea ua faaopoopo, ma faaauau ai lava ona leaga solo mai le tele o vaega o le pasi, ma faigata ai lava ona maea i se taimi se tasi. Faafesootai le tusitala i le imeli ausage@samoanews.com © Osini Faleatasi Inc. dba Samoa News reserves all rights.