Teena Kovana
talosaga a le LBJ ina ia sii lafoga oloa e totogi ai le $9 miliona
Fuafua
Togiola e faaulu se pili e faamagalo ai le aitalafu $5 miliona
a le LBJ
tusia: Ausage
Fausia
Na faalauiloa
e le alii Kovana i luga o lana polokalame i le faaiuga o le vaiaso
na tea nei, lona matua teena o se talosaga na tuuina atu e le
pulega a le falemai o le LBJ ia te ia, ina ia sii lafoga o oloa
o loo auina mai i totonu o le atunuu i luga o le uafu, mai le
5% o loo i ai i le 10%, e fesoasoani ai i le tausailia o se vaega
tupe e toe totogi ai le $9 miliona lea o lo'o nofo aitalafu ai
i le polokalama o le Medicare.
I le teena ai
e le afioga i le alii Kovana o lea talosaga, sa ia taua ai lona
tuuina atu o se tulafono taufaaofi i luma o le Fono Faitulafono,
lea ua faamoemoe e tauaaoina i le aso Gafua nei, e famagalo
ai le aitalafu muamua a le LBJ i le malo e $5 miliona, ae sefe
se vaega tupe aua le totogiina o le $9 miliona, ona e le o se
aofaiga laititi.
Sa i ai nisi
o le atunuu na latou fesiligia le alii Kovana, poo fea e oso
mai ai lenei $9 miliona, lea o loo totogi e le falemai i le Medicare,
pe o le mea ea, o se vaega tupe na aumai e faagaioi ai galuega
a le falemai, ae ai ua manuia ai se tagata se toatasi, poo nisi
foi, peitai o lea o le a amo e le atunuu ma le malo le mamafatu
o le avega.
Saunoa foi nisi
o le atunuu, e tatau ona suesue mae'ae'a lelei e le Kovana ma
lana taupulega lenei faaletonu, pe mafua aisea.
Na faapupula
e le alii Kovana e faapea, e le o se fa'aaoga sese o tupe ua
mafua ai lenei faafitauli, ae o se faataitaiga na tuuina mai
e le alii Kovana na ia taua ai, o le tele o pili tau lava i le
medicare, e tuuina sa'o atu lava ia i latou, latou te totogia,
peitai, e i ai isi pili e le tatau ona totogi e le medicare,
pe i ai foi nisi o gaioiga a alii foma'i e le tatau ona totogi
e le medicare, ae ua tuuina atu lava i le polokalame latou te
totogia, ma, ina ua suesueina e le polokalame, ma mafai ai loa
ona maua uma nei faaletonu, lea ua mafua ai lenei aitalafu tele.
O le popolega
tele o le alii Kovana ma lana taupulega, ina nei avea le tuai
o le totogiina atu o lenei vaega tupe ma itu e ono taofia ai
e le medicare ana vaega tupe, ia o loo auina mai e faagaioi ai
le falemai, ia, pe aofia atu ai foi ma vaega tupe mai le polokalame
a le medicaid, ona feagai ai loa lea o le atunuu ma se tulaga
faaletonu i le tausiga o le soifua maloloina o tagata uma.
O le taimi nei
e pei ona saunoa le alii Kovana, o loo taumafai pea e galulue
ma le fono i se auala e fesoasoani ai i le falemai, i le tau
totogiina o lenei aitalafu, lea foi e tusa ma le $180,000 lona
tului i le tausaga atoa, tusa lea e 12% e totogi i le tausaga,
ma o se vaega tupe tele lea o loo taumafai le falemai e totogi
i le taimi nei.
Faafesootai
le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|