Tala otooto mai le Fono Faitulafono tusia: Ausage Fausia TOFIA LOLO SE KOMITI E SUESUEINA LE MATAUPU I PASI AOGA O le afioga i le alii Senatoa ia Vaitautolu Liugalua lea ua tofia e le Peresetene o le Senate, e taitai i se komiti a le maota maualuga, lea ua tofia latou te iloiloina le mataupu e uiga i le laiti o pasi aoga mo aoga i le atunuu. I le lagaina ai o lenei mataupu i luma o le Fono i le vaiaso na tea nei e le afioga Vaitautolu, sa ia taua ai lona faanoanoa tele ona o le tulaga faaletonu o loo tulai mai i pasi aoga a le fanau, ma, e le gata i Tutuila nei, ae o Manu'a foi, ma ua tatau ai i le maota maualuga ma le fono ona sailiili le pogai o nei faaletonu. Saunoa le alii Peresetene, tofa Lolo Moliga, ua maea ona ia tuuina atu se tusi i le alii Kovana, lea o loo ia fesiligia ai se faamalamalamaga e tusa ai o lenei mataupu, pe aisea ua tupu soo ai. TEENA KOVANA LE TULAFONO E TUU ATU O LE $1MILIONA FAAOPOOPO MO LE FALETUPE O ATINA'E E lei taliaina e le alii Kovana se tulafono na pasia atu e le Fono, mo le tuuina atu o se aofaiga faaopoopo e $1miliona mo le faletupe o Atina'e a le malo mo le tausaga, e fesoasoani i le faatinoina o tiute tauave a le faletupe aua le tautuaina o le atunuu. Na faafetaia e le alii Kovana galuega mae'ae'a a le Fono, i le sailia lea o ni tupe e tuuina atu i le faletupe, aua le fesoasoani ai i kamupani ma pisinisi, peitai o le faafitauli o loo tulai mai, o le aoina mai o nei tupe o loo nono atu i fafo, ma o iina lea e manaomia ai le toe faaleleia o le tautua a le faletupe. SAINI KOVANA LE $147,230 TOTOGI AI TAGI FAASAGA I LE MALO O le vaiaso na tea nei na sainia ai e le Kovana le tulafono, lea o loo faasoasoa atu ai le aofaiga e $147,230 e totogi ai le poloaiga mai le faamasinoga, lea na tuuina mai i le tausaga e 2006, i le tagi na faia e Leasuasu Tupuono faasaga i le falemai o le LBJ ma le malo o AMerika Samoa, ona o le maliu o lona toalua i le tausaga e 2001. Saunoa le alii Kovana ina ua maea ona ia sainia lenei tulafono, o loo i ai le faamoemoega o le a le toe tula'i mai ni faaletonu faapenei i le lumanai, ma aafia ai tulaga o tupe ma meatotino a le malo. TOE TAOTO I LE MAOTA O SUI LE TULAFONO E PALOTA AI FAIFEAU Na pasia e le maota o sui ina ua palotaina i le vaiaso na tea nei, le toe taoto atu i le laulauafono o le tulafono lea na faaulu e palota mai ai faifeau i le palota tele a le atunuu, ina ua maea sa latou feiloaiga ma le afioga i le Maopu, Soliai Tuipine, ina ia tuu atu se taimi sei toe iloilo ai lenei tulafono. Saunoa le afioga i le Fofoga Fetalai, o ia foi lea o se tasi na faauluina lenei tulafono, e ui o loo manino le tino o le tulafono, peitai ua ia talia le talosaga a le faatonusili o le Ofisa o Palota, ina ia tuuina mai i luma o le fono pe a toe tauaofia ia Iulai se tulaga tonu o lenei mataupu. O le afioga i le Fofoga Fetalai o le maota o sui, Savali Talavou Ale o loo lagolagoina lenei tulafono, e aofia ai Agaoleatu Charlie Tautolo, Laolagi Fonoti Savali Vaeao ma le afioga ia Mase Akapo. Faafesootai le tusitala i le imeli ausage@samoanews.com. © Osini Faleatasi Inc. dba Samoa News reserves all rights.