Ads by Google Ads by Google

TALA MAI SAMOA

FAI I LAGI LE FOLAUGA FAAFEAGAIGA FOMA’I LAFAIALII

O le a le toe tutusa le Kerisimasi o le tausaga nei ma tausaga ua tuanai ona o le maliu faafuasei o le faafeagaiga taulagi o le Ekalesia Faapotopotoga Kerisiano i Samoa i Vaitele-Uta, le susuga Foma’i Lafaialii.

O lea alii faifeau e pei ona lausilafia ua lauiloa i totonu o le atunuu ona o le polokalama o le 13 Aso o le Kerisimasi lea e faafoeina e lana aulotu i tausaga taitasi ma faasalalauina i le TV1 faapea le Siufofoga o Samoa, le 2AP. Na faaalia e le faletua loto mafatia ia Fausagafou Lafaialii e faapea, na maliu faafuasei o ia i le taeao o le aso Faraile na sei mavae atu nei, ona o le mai oso o le fatu (heart attack). Ua molimoli atu faamaisega a le failautusi aoao o le Ekalesia Faapotopotoga Kerisiano i Samoa, le susuga Rev. Dr. Iutisone Salevao ma na ia faaalia, o le a misia tele o ia e lana aulotu, o le ekalesia ma le atunuu atoa.

Na faaaia e le alii failautusi e faapea, o se tasi o tulaga faanoanoa i le maliu faafuasei o le alii faafeagaiga, ona o lo o sauniuni uma aulotu ma faalapotopotoga ua valaaulia e auai i le polokalama o le 13 Aso o le Kerisimasi mo lenei tausaga, ae o lea motusia faafuasei le mafutaga ma se tasi sa tele lona taimi ma le malosi na alu i le tuufaatasia o lea polokalama.

MANANAO ALII MA FAIPULE O FAUSAGA, SAFATA E FAATE’A FAIFEAU

O le aso Faraile o le vaiaso fou ua toe tolopoina i ai le mataupu a alii ma faipule o le afioaga o Fausaga, Safata faasaga i le Ekalesia Aso Fitu Tutoatasi i lea lava afioaga. O le mataupu e uiga i le faatulaieseina o le faifeau, le susuga Enoka Eteuati ma le faletua ma le la aiga mai totonu o Fausaga, e talitonu le itu tagi, o lo o latou usitaia le faaiuga a le Faamasinoga o le 10 Mati, 2006, o le tausia lava lea o le nofo lelei ma le filemu i le va o le afioaga ma le Ekalesia. E taofi foi le itu tagi, e malu le Tala Lelei i le aganuu po o le pule mamalu a alii ma faipule, peitai, ua alia’e le faamaualuga, taufaamatau ma le faasiliaupule a le itu tetee i le lomiga a le Ekalesia ua lepeti ai le le va tapuia.

O lea lomiga ua faalauiloaina e le Ekalesia, e ala i ni tusitusiga ma ni valoaga a le susuga i le alii faifeau e faapea, e i ai le aso o le a mafuli mai ai maa ma nuti pala ai Fausaga. O lea valoaga na mafua ai ona le fiafia le toatele o le pulega a alii ma faipule a le afioaga ma faatautaia ai loa le latou fonotaga i le amataga o le tausaga nei, ma faate’a ai loa le faifeau mai totonu o le afioaga. O le mataupu lea na oo mai i le Faamasinoga o Fanua ma Suafa ma ua toe tolopo i le aso Faraile o le vaiaso fou, le aso 23 o le masina nei, ona e lei avanoa le faamasinoga ma o lo o faagasolo lava foi a latou suesuega i lea lava mataupu.

FAASAO SE AIGA SATITOA, ALEIPATA MAI LE EMO O LE UILA

O le faaiuga o le vaiaso na tea nei na aafia ai se aiga i Satitoa, Aleipata i se faalavelave faalenatura na semanu e maumau ai se soifua pe ana le seanoa le alofa o le Atua. Na faamatala e le tina o Malua Seupule Faamanu e faapea, na faateia i latou ma si ana fanau i lea po i le emo malosi o le uila. O le taimi lena o lo o uu e se tasi o le fanau se telefoni feaveai i lona lima o lo o fafaga ma na faafuasei ona taape ma salalau lea telefoni.

O se ie pupuni sa tautau sa faafuasei ona mu ma na motusi uma uaea eletise i totonu o lo latou fale, ma sa motusia ai loa ma le eletise. Na faaalia e le tina, o tua o lo latou fale, sa i ai se pu tele e pei ua vete le eleele, ona o le malosi o le uila. Sa logoina le aufaigaluega a le Faalapotopotoga Malosi Faaeletise ma sa oo atu ae peitai, e lei mafai ona latou faaleleia lea faaletonu i lea aso. Sa faapea ona talosagaina e le tina le aufaigaluega ina ia motusia ai pea le eletise o lo latou fale seia maea ona faaleleia atoatoa le faaletonu ina nei aafia ai se isi o lo latou aiga.

 VAELUAINA LE AFIOAGA O SATAPUALA

Ua faatalosagaina nei e nisi o matai o lo o i ai se feeseeseaiga ma le pulega a alii ma faipule o le afioaga o Satapuala, ia le malo e tauala i le Matagaluega o Tina ma Tamaitai, Nuu ma Aga Fesootai, ina ia faamatuu atu le pulega a alii ma faipule i lo latou pitonuu, e avea ai lo latou pitonuu o Satapuala Fou ma afioaga, e pei ona aloaia i faiga faavae a Samoa. O lea talosaga e aofia ai le tuuina atu o se faatagaga e mafai ai ona faia sa latou pulenuu po o se sui o le nuu, atoa ai ma se sui o le nuu mai le ituvai o tamaitai, faapea se sui o tupulaga talavou.

Peitai e le o mafai e le malo i le taimi nei ona faia lea tulaga, ona o manumanuga lava ina nei oia ai ana faiga faavae, ma lepeti ai le saogalemu o se afioaga. O le saunoaga manino lea a le alii minisita o le matagaluega, le afioga Tolofuaivalelei Falemoe Leiataua i se feiloaiga ma tusitala. O lenei vevesi e mafua mai ina ua o ese nisi o matai o Satapuala ma faatu so latou faiganuu fou, ona o lo latou tetee i le faasalaga a le pulega a alii ma faipule o Satapuala faasaga ia i latou.

16 FA’AU’U AVEA MA LEOLEONANA PO O LEOLEO SUESUE

O le aso Faraile na sei mavae atu nei na faauuina ai leoleo e toa 16 ma ua aloaia ai le avea o i latou o ni leoleonana po o ni leoleo suesue, e faatautaia le tele o mataupu o lo o tulai mai ai faalavelave ma maliliu ai nisi. O se tasi lenei o polokalama o lo o galulue faatasi ai le malo Samoa ma le malo Ausetalia, ma sa faatautaia aoaoga faapitoa a i latou ua faauu e sui o matagaluega o leoleo mai Ausetalia. O le lona lua lenei o faauuga ua faataunuuina ma ua atoa i ai le toa 36 o alii ma tamaitai malu o le malo Samoa ua avea ma leoleonana ma ua faauuina, talu mai le faauuga muamua sa faataunuuina ile masina o Setema o le tausaga nei lava.

O le alii palemia, le susuga Tuilaepa Lupesoliai Sailele Malielegaoi na saunoa faalaeiau ma faamalo i le au faauu e toa 16 e toalua tamaitai ma alii e toa 14. Na ia faafetaia lo latou sogasoga i le avea ma leoleonana ma ua siitia ai lo latou tomai i le faatinoga o le galuega faaleoleo. Na faaalia foi e le alii palemia le taua o le i ai o ni leoleonana e faatinoina galuega e fesoasoani i suesuega i faalavelave ma soligatulafono ua maliliu ai nisi o le mamalu o le atunuu.

Saunia: L.A.F./Naenae Productions