Ads by Google Ads by Google

Tele suiga fuafua Lolo e faia mo le Falema’i LBJ

E tele suiga ua fuafua le afioga i le kovana sili ia Lolo Matalasi Moliga, e tatau ona faia e le Komiti Faafoe fou a le LBJ i Fagaalu, mo le manuia o le tautua a le falemai i le atunuu.

O ni isi o ia suiga e aofia ai le toe faafoi o le totogi e vaai ai le foma’i mai le $20 o lo o i ai i le $10 e pei ona i ai muamua, atoa ai ma le faaitiitia o le totogi o soo se suega e faia i le potu tui toto.

O totino o le komiti ua tofia ai Tofoitaufa Sandra King-Young e avea ma Taitaifono; o le alii foma’i ua litaea ia Dr. Tofaeono Victor Williams; tofa Mase Akapo lea sa avea muamua ma faipule, ae o lo o galue nei i le Ofisa Vaaitau; afioga i le alii faipule ia Faimealelei Anthony Allen, ma Leiataua Leuga Turner lea sa avea ma Faatonusili i le Ofisa o Tupulaga Talavou ma Tamaitai i le nofoaiga ua mavae atu.

Saunoa Lolo e faapea, ao tau amata ai suiga i totonu o le la faigamalo ma le afioga i le lutena kovana ia Lemanu Peleti Mauga, o le sini autu ua la manatu e faatula’i, e le gata ia faamuamua le soifua maloloina o tagata, a ia mautinoa foi o tupe ua faatulafono e tatau ona totogi atu mo le LBJ, ia totogi uma i le taimi tonu e tatau ai.

Ua la fuafua foi e aveese mai ni isi o tautua o lo o i lalo o le LBJ e pei o le fale fai nifo, EMS ma tuu atu i lalo o le Matagaluega o le Soifua Maloloina a le malo.

Ua ia faatonuina foi le Faatonusili o le Matagaluega o le Soifua Maloloina, atoa ai ma le Komiti Faafoe o le LBJ, ina ia vaavaai i auala e mafai ai ona faagaioi tautua nei, ina ia mafai ai ona taula’i le vaai a le LBJ i lana matafaioi tupito, o le tautuaina lea o le soifua o le atunuu.

O masini o lo o faaaoga e le falemai i ana tautua, ua i ai le fautuaga a le alii kovana ina ia saili mai ni masini fou, ina ia faasaoina ai tupe a le falemai mai le faafouina o masini tuai o lo o i ai nei.

O le polokalama mo le auina atu o gasegase i fafo mo togafitiga (off-island referral), tulaga o se Inisiua mo le falemai, faapea ai ma le tulafono na pasia e faaee ai le 2% mo le LBJ, o ni isi ia o mataupu na taua e Lolo o lo o agai i ai ni a latou suesuega.

Na taua e Lolo lona fautuaina o le Komiti Faafoe ina ia silasila i le tulafono a le Malo Tele o le ‘Affordable Care Act’, pe mafai ona maua mai ai se vaega tupe e faatupe ai le auina atu o gasegase i fafo mo togafitiga, leva ona le toe i ai se tupe e faatupe ai.

I le tulaga o le Inisiua, na taua e le alii kovana o lo o faaauau pea ona iloiloina le suesuega lea na faia e le nofoaiga ua maea atu, lea na faatupe mai e le feterale ma faamutaina i le tausaga e 2007, peita’i e oo mai lava i le taimi nei e leai ma se mea o tupu mai ai.

I le tulafono e pei ona pasia ai e le Fono le 2% mo le falemai, na tuuina mai ai e le alii kovana se ata faataitai e ao i le Komiti Faafoe ona vaai toto’a i ai, i le faatusatusa lea o le tagata e toa 6 lana fanau laiti, ae na o le $10,000 lona totogi i le tausaga, ma o lea totogi o lo o tipi ai le 2% mo le LBJ faapea ai le 4% o le lafoga a le malo.

Ona faatusatusa lea i le tagata e fai ona fale mautotogi, lea e $4,000 na te maua i le masina mai lana ‘rental’, e le o totogia sana 2% sei vagana ai le lafoga e 4%.

E talitonu le alii kovana, o le tulaga moni lava i le faatusatusaga lenei, o lo o atagia mai ai le totogi e le tagata mativa o le tupe mo le soifua maloloina a le tagata faipisinisi lea.

I le vaega faaiu o fuafuaga ua manatu le kovana e faia mo le LBJ, e aofia ai le toe iloiloina o le faaiuga lea na faia e le kovana ua mavae atu o Togiola Tulafono, i le le faaaogaina lea o inisiua mo togafitiga o tagata, ona o le isi lea vaega o lo o faasa mai i le tulafono o le ‘Affordable Care Act’, i le faailogalanu i isi gasegase ae ave ai le faamuamua i gasegase o lo o agavaa i lal o le Medicaid.

Saunoa Lolo, o le faanaunuaga o le faigamalo fou ua i ai nei, ia mautinoa o lo o tulaga lelei ma malu puipuia le saogalemu o le atunuu.