E silia i le $1 miliona le tupe o le a le maua e le Falemai o le LBJ i Fagaalu, pe afai ae faataunuu fuafuaga faataoto a le kovana sili ma le faigamalo i le toe tuu i lalo o le totogi o ana tautua, e pei ona saunoa i ai le afioga i le alii faipule ia Taotasi Archie Soliai i luma o le maota o sui i le vaiaso ua tuana’i.Na taua e Taotasi i lana saunoaga e faapea, o se fuafuaga taua ua faalauiloa e le alii kovana ma lana faigamalo mo le falema’i, i le taumafai lea e toe tuu pili o lo o totogi e le atunuu e vaai ai le fomai i le tulaga tuai sa i ai muamua.“E leai lava se taitai e le naunau e fai se mea sili mo le atunuu, aemaise lava i nai aiga lima vaivai e le gafatia tulaga o pili a le falemai, ma o fuafuaga ua faailoa e kovana Lolo ma lana faigamalo ou te lagolagoina foi, o ni fuafuaga lelei ma talafeagai mo le atunuu,” o le saunoaga lea a le alii faipule.Ae ui i le tulaga lelei o lea fuafuaga mo le atunuu, na taua e Taotasi e faapea, e tatau foi ona vaavaai toto’a le malo i aafiaga e ono feagai ma le pulega o le falema’i pe afai ae toe tuu i lalo totogi o tautua mo le atunuu.“Ae afai o le finagalo lea o le kovana ia toe foi le totogi o tautua i le tulaga tuai sa i ai mo ni isi o tautua a le falemai, o le mea moni o le a feagai le pulega a le falema’i ma faafitauli tau tupe, ma e tusa ma le $1.5 miliona le tupe o le a le mafai e le falema’i ona maua pe afai e toe tuu i lalo totogi o ana tautua, fuafua i luga o ripoti ua maea ona tuuina mai i le fono,” o le isi lea saunoaga a le alii faipule.O popolega o le alii faipule e pei ona ia faaleo i luma o le maota, ne’i avea aafiaga e ono tulai mai i suiga ua fuafua le faigamalo e faataunuu i le falemai, ma itu e alia’e mai ni isi o faaletonu i tagata faigaluega poo ni isi foi o tautua a le falemai.“O popolega o lo’u sui, ina ne’i avea aafiaga tau tupe e ono feagai ma le falemai pe a faaitiitia totogi o ana tautua ma itu e ono tulai mai ai ni isi o faaletonu e pei o le le lava o vailaau mo togafitiga, po o le vaea foi lea o ni isi o tagata faigaluega ona ua le ausia le tupe sa tatau ona maua,” o le saunoaga le a Taotasi.Na faamanino e Taotasi i luma o le maota e faapea, soo se $1 lava e faaalu e le falema’i mo ana tautua, e toe faaluaina mai e le feterale, lona uiga, o le tele o le tupe e faaalu e le falemai i ana tautua mo le atunuu, o le tele foi lena o le tupe e toe faaluaina mai e le feterale mo le falema’i.E pei ona faalauiloa e kovana Lolo Matalasi Moliga i le amataga o le masina na tea nei ina ua faalauiloa totino fou o le Komiti Faafoe a le falemai ua ia tofia, o le a i ai ni isi o suiga i tulaga o totogi o tautua a le falemai, peitai e lei faalauiloa mai le taimi ma le aso e faamamaluina ai.Ae na taua e ni isi o le atunuu, o se tulaga lelei mo i latou pe afai ae toe tuu i lalo totogi o tautua a le falemai