Ads by Google Ads by Google

Lagolago ni isi atunuu fuafuaga faavae se Fa’alapotopotoga Saili tupe LBJ

“O se fuafuaga poto ma ua talafeagai foi i le taimi ua fuafuaina ai,” o ni manatu fa’aalia ai a ni isi o le atunu’u e faatatau i se fuafuaga a le Komiti Faafoe a le LBJ, mo le faatulagaina o se Faalapotopotoga Saili Tupe mo le falemai.

 

Na taua e le susuga a Atanoa Lealai’asa o Pava’ia’i lea ua silia ma le lima masina o ona fa’aaogaina le tautua a le Potu Faamama Toto, “ana faavae mai e le falema’i le fuafuaga lenei mai le tele o tausaga ua mavae, faapenei e le o toe pagatia le atunuu i le taugata o pili.”

 

Fai mai Atanoa, “e i ai ni isi o falema’i faaitumalo i Amerika sa ou asiasi i ai o lo o latou faia le tulaga lea, ma ua molimauina e pulega a nei falema’i le lagolago o tagatanuu e ala i le foa’iina atu lea o tupe e fesoasoani ai i le falema’i, afai la o lo o mafai e papalagi ona foa’i tupe e fesoasoani ai ia latou falema’i, aisea e le mafai ai e tagata Samoa ona fai lea galuega lelei.”

 

Sa ia taua foi e faapea, e le tatau ona toe aapa le falema’i i tagata lautele ona o lea foi ua maea ona totogi e tagata le lafoga e 2% na pasia e le malo i tausaga ua mavae e fesoasoai ai mo le falema’i, “ae tatau ona saili i pisinisi tua ma kamupani mo sa latou fesoasoani mo le falema’i.”

 

“O le tele o pisinisi tua e pei o faleaiga ma faleoloa, o iina lea e mafua ai ona aafia ni isi o le atunuu i gasegase o le tino ona o meaai o lo o latou faatauina atu i le atunuu, i lo’u la talitonuga, e tatau ona i ai so latou sao mo le togafitiina o tagata ua mama’i ona o a latou oloa o lo o faatauina atu,” o le isi lea saunoaga a Atanoa.

 

Ae na taua e le tina matua o Apaula Thompson-Valaau o Fagatogo e faapea, o le isi itu lelei o le faavae o se Faalapotopotoga saili tupe a le falema’i, e tatala mai ai faitoto’a sa tapuni e ono mafai ona maua mai ai isi fesoasoani.

 

“E mafai e le Faalapotopotoga o le a faavaeina nei ona latou saili fesoasoani i pisinisi ma tagata mautupe i fafo atu o le atunuu, ma atonu o ni isi o i latou o le a ofo e sapalai mai vailaau, tupe poo masini ma mea faigaluega o lo o tele tupe a le falema’i o lo o alu ai,” o le talitonuga lea a Apaula.

 

I le avea ai o Apaula ma se foma’i mo le silia i le 20 tausaga i le setete o Kalefonia, sa ia taua ai lona faanaunautaiga ua leva ona nofo ma ia, o le tutu faatasi lea o le atunuu atoa e fesoasoani i le falema’i.

 

“Afai e lafo e tagata uma o lo o nonofo i Amerika Samoa le $1 i le masina e tasi mo le falema’i, ou te tautino atu o se tupe tele lea pe afai e tuu faatasi mo le tausaga atoa, ae le taofia ai lava le tagata ua mu lona loto ma naunau e fai le mea sili mo la tatou falema’i,” o le saunoaga lea a Apaula ma ata.

 

E to’alua isi tina na aga’i atu e asia le foma’i i le taeao ananafi na fesiligia e le Samoa News i ni o la lagona e tusa ai o lenei fuafuaga, ma o le la tali sa tuuina mai, “ua tatau i le atunuu ona sauni e fesoasoani i le falema’i.

 

O le la talitonuga, tusa lava pe totogi e le atunuu tupe i soo se tautua a le falema’i e mana’omia e le afaina, pau le lagona, ia aua ne’i i ai se tautua e toe sili atu ma le $20 lona tau.

 

Na taua e le tama talavou ia Mathew Fuimaono o Fagaalu na alu atu e piki fualaau a lona tama e faapea, “o le isi lea vaega o le falema’i e le tatau ona faaletonu i aso uma, o le fale talavai, ma afai e lafo tupe uma le atunuu mo le falema’i, e le gata o le a lelei foma’i e tausia le soifua maloloina o tagata, toe maua foi vailaau i aso uma, pau le talosaga, ia tuu i lalo o totogi o tagata faigaluega ma le pulega.”