Ads by Google Ads by Google

Umusa galuega toe fa’afou o le Fale Samoa a le Fono Faitulafono


Taitai o le Fono Faitulafono, peresetene o le Senate ia Gaoteote Palaie Tofau ma le fofoga fetalai ia Savali Talavou Ale, fa’apea ai ni isi o tagata faigaluega a le Fono i le taimi na faapaia ai le Fale Samoa a le Fono i le vaiaso na te’a nei. [ata AF]

Le taimi na mae’a ai le sauniga e tatala aloaia ai Fale Samoa a le Fono Faitulafono lea ua mae’a ona toe fa’afou. [ata AF]
ausage@samoanews.com

O le aso Faraile na te’a nei ina ua mae’a le tapunia aloaia o galuega fa’atino a le Fono Faitulafono mo lana nofoaiga lona 34, na tatala aloaia ai loa ma le galuega sa fa’agasolo mo le tele o masina, i le toe fa’afouina lea o le galuega o le Fale Samoa e tua i ai afioga i Senatoa ma Faipule o le atunu’u.

 

E ui e leai se ripoti na fa’amanino ai le tau atoa o lenei galuega, ae po o i ai fo’i se aitalafu i le konekarate a le Paramount Constructions sa latou fausiaina le galuega, peita’i na taua e ta’ita’i o le Fono Faitulafono, e ui e leai se tupe na paketi a le Fono e fa’atupe ai lenei galuega, ae o le agalelei mai o le faigamalo a Lolo ma Lemanu lea ua mafua ai ona mae’a le fa’atinoina o le galuega.

 

O se sauniga lotu puupuu na ta’ita’ia e le susuga i le ali’i Feagaiga ia Rev. Fa’alili Oteru mai le Ekalesia EFKAS mai Alataua na tatalaina ai le sauniga fa’apito o le galuega, lea fo’i sa molimauina e ta’ita’i o vaega e 3 o le faigamalo a Amerika Samoa, e aofia ai le kovana sili ma ni isi o lana kapeneta, o le afioga i le ali’i Fa’amasino ia Mamea Sala Jr sa fai ma sui o le vaega o Fa’amasinoga, atoa ai ta’ita’i o le fono faitulafono, fa’apea ai afioga i Senatoa ma Faipule sa latou molimauina lenei fa’amoemoe taua.

 

Sa valaaulia ai fo’i le Faipule mai laumua i Uosigitone, tofa Aumua Amata fa’apea ai le Failautusi o le Ofisa o Mataupu Tau Samoa, afioga i le Maoputasi ia Mauga Tasi Asuega.

 

Na fa’ataua e Rev. Oteru e fa’apea, e le o le fale e taua, ae taua le anofale, po o galuega fo’i o lo o fa’atinoina i totonu o le fale, aua o iina e atagia mai ai le taua o le tofa saili ma le tofa sasa’a a Tama o le atunu’u o lo o galulue e saili se manuia o Tutuila ma Manu’a i aso ta’itasi.

 

I le saunoaga fa’afetai a le afioga i le ali’i kovana ia Lolo Matalasi Moliga, sa ia fa’atusa ai foliga ma le fausiaina o le Fale Samoa a le Fono Faitulafono, e pei e fausia i le fausaga fa’apapalagi le tino atoa ae o totonu o lo o manino mai ai mamanu Samoa, sa ia fa’atusa i foliga o le faigamalo a Amerika Samoa o lo o i ai i le taimi nei.

 

“O foliga o le fale Samoa lenei ua tatalaina, o lo o atagia mai ai foliga o le faigamalo, o le faigamalo e tino fa’a papalagi ae o le fatu ma le agaga o le fatu Fa’a Samoa, e faapena fo’i le fale lenei, e foliga e papalagi lona fausiaina, ae o lo o atagia mai ai vaega o mamanu fa’a Samoa, e atagia mai ai le auala na fa’avae mai ai Samoa, e fa’avae i ana tu ma aganu’u”, o le saunoaga lea a le ali’i kovana.

 

I le tele ai o finagalo fa’aalia aemaise ai o fesili o lo o tu’i fesili ai sui tauva mo le tofi Kovana ma le Lutena Kovana, i so latou finagalo e fa’atatau i le tatau lea ona sui le faigamalo, aemaise ai o le palotaina lea o le tofi Senatoa i le maota maualuga, na saunoa ai Lolo e faapea, po o fea lava e fenumia’i ai le soifuaga ua tatou i ai nei, o le tagata lava ua mau a’a ai tu ma agaifanua a Samoa i lona loto, e le mafai ona toe alo ese ai.

 

“E tutusa uma talitonuga o matou nei o sui tauva o lo o tausinio mo tofi ta’ita’i o le atunu’u, o le tama ma le teine e tafe ai le toto Samoa, o fea lava e fenumia’i ai le soifuaga lenei ma suiga o le olaga, e tumau pea lava lona loto i tu ma agaifanua a lona atunu’u o Samoa, o le mea sa masani ai ai, aua o iina e fa’avae mai ai le olaga tumau ma le mausali o tupulaga talavou i le taua o le aganu’u a Samoa”, o le saunoaga lea a le ali’i kovana.

 

E ui e le i maua se avanoa o le afioga ia Papalii Alofa, o ia lea o le pule o le kamupani a le Paramount Constructions sa fa’atinoina galuega mo le toe fa’afouina o le Fale Samoa, e fa’aleo ai se tala o le galuega atoa ai ma le tau atoa sa fa’atinoina ai le galuega, peita’i na fa’afetaia e le afioga i le ali’i peresetene ia Gaoteote P. Tofau le Matua o Faiva e tusa ai o le galuega ua mae’a lelei.

 

Sa ia fa’afetaia fo’i le faigamalo e tusa ai o le vaega tupe sa tuuina mai e fa’atupe ai le galuega, e ui e leai se tupe na fa’atulaga i le paketi a le Fono Faitulafono e fasuaia ai lenei galuega.

 

“A o fa’agasolo mai lenei galuega, sa to’atele lava i latou na tu’u fesili ma fa’asea i le fai fua o lenei galuega, aemaise ai, e leai se paketi o le galuega, ae ui o nei mau tala, o le itu taua, ua i’u ma le manuia le galuega, lea fo’i ua avea ma vaega e taualuga i ai galuega a le Fono mo lenei nofoaiga lona 34 ua mae’a”, o le saunoaga lea a Gaoteote.

 

I totonu o Polokalame Faapitoa a le ali’i kovana mo le paketi o le tausaga tupe fou lenei ua amata 2017, o lo o fa’aagaga mai ai le tupe e $700,000 mo le toe fa’afouina o le Fale Samoa a le Fono Faitulafono.