Ads by Google Ads by Google

Sauni Ekalesia mo pese ma siva fa’aleagau’u mo le fu’a


[ata: archive]
ausage@samoanews.com

Ua amataina nei tapenaga a ni isi o Ekalesia i le atunu’u, mo le tapenaina lea o le latou sao mo le fu’a o lenei tausaga, e ala i le a’oina o pese ma siva fa’aleaganu’u. Na fa’amaonia mai ese sui sinia o le Ofisa o le Mataupu Tau Samoa i le Samoa News, le tofia lea o Ekalesia e 3 i le atunu’u latou te tapenaina pese ma siva fa’aleaganu’u mo le aso o le fu’a o lenei tausaga, atoa ai ma le afioaga e tasi mai Samoa lea fo’i ua mae’a ona tu’u atu i ai le valaaulia.

 

O le agaga o le faigamalo e pei ona fuafua ai le polokalame mo le fu’a o lenei tausaga, ia tofu sao uma vaega eseese i totonu o le atunu’u mo le fa’atinoina lea o fa’afiafiaga i le aso o le fu’a a Amerika Samoa, e pei ona filifilia ai afioaga, kamupani ma Falelima e 3 i le atunu’u latou te tapenaina fa’afiafiaga i le aso o le fu’a i tausaga ua mavae, lea fo’i la ua oo mai le fa’asologa i Ekalesia.

 

O Ekalesia e 3 ua lautogia mo fa’afiafiaga o le fu’a o lenei tausaga e aofia ai le Ekalesia Katoliko, Metotisi ma le EFKAS.

 

I le tulaga o tuuga fautasi, e le o mautu mai se fuafuaga pe valaaulia se fautasi mai Samoa, pau le tulaga lea ua mautu mai, o le valaaulia mo le pese ma le siva mai Samoa lea ua mae’a ona tu’uina atu, ma, o le a filifili mai lava fo’i e le afioga i le ali’i Palemia le afioaga e fai ma sui o Samoa i le fu’a a Amerika Samoa.

 

Ae mo tapenaga a auva’a eseese i le atunu’u, o le 3 ai lenei o vaiaso talu ona amata mai koleniga a le tele o auva’a i le atunu’u, i le sailia lea o le malosi aemaise ai o le toe fa’amasani i le foe, ao tapena atu ai mo falagamaea o le tai i lenei tausaga.

 

O le vaiaso nei lea na vaaia ai le amata tu’u i lalo o le tele o Sa mo fa’ata’ita’iga a auva’a ta’itasi, ma ua amata fo’i ona to’atele le mamalu o le atunu’u e tumu tumu solo i vaega eseese o le apitagalu, i le fia maimoa lea i le tulaga ua i ai aoga ma koleniga a auva’a taitasi i le atunu’u.

 

Ua fa’amaonia mai fo’i e le sui sinia o le Ofisa o Mataupu Tau Samoa e fa’apea, o le polokalame masani o le fu’a e pei ona faia i tausaga uma, e tatala sauniga o le fu’a i le sauniga lotu lea ua fa’amoemoe e faia i le aso Sa, Aperila 16, 2017 i le Fale Laumei i Utulei, ona sosoo ai loa lea ma le sisiina o le fu’a i le stadium i Tafuna i le aso Gafua, Aperila 17 i le taeao, ma toe tapunia ai lava sauniga o le fu’a i le afiafi o le aso lava lea.