Ads by Google Ads by Google

Mana’omia fesoasoani Pulenu’u i le leoleoina o faleaoga mai le gaoia


Le Fa’atonusili o Aoga a le malo ia Dr. Ruth Matagi-Tofiga. [ata AF]
ausage@samoanews.com

Ua talosagaina e le Fa’atonusili o le Matagaluega o Aoga a le malo ia Dr. Ruth Matagi-Tofiga le fesoasoani a Pulenu’u o afioaga eseese uma i le atunu’u, fa’apea ai leoleoaga a Aumaga i afiafi i taimi o faigalotu fa’apea ai le po atoa, mo le puipuia lea o faleaoga ma meatotino a le malo mai le fa’aleaga ma osofa’i e tagata faomea.

 

O lea talosaga mai le afioga i le tama’ita’i Fa’atonusili o aoga a le malo, na tu’uina mai lea i le taeao ananafi, i le mae’a ai lea ona ia taulimaina o se ripoti mai le aoga maualuga atoa ai ma le aoga tulaga muamua i Leone, i le fa’alavelave lea na fa’aleagaina ai e ni isi le ofisa o le puleaoga fa’apea ai ni isi o potu aoga i le vaiaso nei.

 

Na taua e Dr. Matagi-Tofiga e fa’apea, o se tulaga le fa’aaloalo tele ua faia e i latou sa fa’atinoina lenei gaioiga, o le fa’aleagaina lea o meatotino a le malo o loo a’oa’oina ai fanau a le atunu’u.

 

Ua ia talosagaina le fesoasoani a Pulenu’u ma aumaga a afioaga taitasi, ina ia fesoasoani atu i le Matagaluega o Aoga i le leoleoina lea atoa ai ma le puipuia o faleaoga ma meatotino i taimi o leoleoaga a afioaga i le afiafi ma le po.

 

Na taua atili e le tama’ita’i fa’atonusili le tatau lea ona galulue fa’atasi afioaga ma le malo, i le puipuia lea o meatotino mai lima o tagata faomea, ona o meatotino nei ma le aoga o loo fa’alagolago i ai le a’oa’oina o fanau mo se lumana’i taua.

 

Ua galulue le aoga maualuga a Leone fa’apea ai le aoga tulaga muamua i le toe fa’aleleia o vaega sa fa’aleagaina mai lenei fa’alavelave, ma ua galulue malosi fo’i ta’ita’i uma o vaega taitasi e aofia ai ma le Ofisa o Mataupu Tau Samoa fa’apea ai le mafuataga a Matua ma Faiaoga, i le faia lea o auala uma e mafai ai ona puipuia le toe tula’i mai o nei fa’alavelave i le lumana’i.

 

Na fa’amaonia mai e se sui sinia o le Matagaluega o Leoleo le fa’agasolo o su’esu’ega e uiga i lenei mataupu, e ala lea i le taumafai o Leoleo e saili ni molimau e feso’ota’i ma le fa’alavelave sa tula’i mai.

 

E le o se taimi muamua lenei ua tula’i mai ai mataupu fa’apenei i totonu o le atunu’u, o le osofaia lea o faleaoga ae ave fa’agaoi meatotino aoga sa i totonu.

 

O le masina o Ianuari o le tausaga nei na fa’asala ai e le fa’amasinoga maualuga se ali’i e 19 tausaga le matua e taofia i le toese i Tafuna mo le 6 masina, ina ua ta’usala o ia i le moliaga o le gaoi, e mafua mai i le fa’alavelave lea na latou osofaia ai ma ni isi ali’i talavou se to’alua le Ofisa o le aoga maualuga a Tafuna ae ave fa’agaoi le tele o meaaoga sa i ai i totonu, e aofia ai masini laptop sa i totonu o le Ofisa o le polokalame o le JROTC.