Ina ua mae’a to’ai taunu’u mai au soka a Niu Sila ma Niu Kaletonia i lo tatou nei taligamalo i le Ta’amilosaga Soka a le OFC - U17, na fa’atulaga loa e ta’a’alo i latou ma Vanuatu, ae fetaui Tahiti ma Niu Kaletonia.

O le ta’aloga muamua i le tasi, ua tu’uina atu ia Niu Sila ma Vanuatu, o le numera tasi ma le numera fa o le ta’amilosaga. Mai le ‘au malosi a Niu Sila, sa numera tasi mai le vae o le ta’amilosaga i Samoa, sa matua iloga le taumafaiga a le ali’i o Logan Roberson, sa ia mauaina sikoa e lua i lea ta’aloga. Peita’i, na vave lava ona sofa’i e Niu Sila le itu a Vanuatu ma fafao le latou sikoa i le fa’ato’a 4 o minute talu ona amata le taaloga. O le ulua’i sikoa lea a Niu Sila sa kiki e le latou tama fa’amoemoeina o James McGarry.

O le isi a latou sikoa sa kiki ai e Conner Probert le sala i le atoaga o le 83 minute o le ta’aloga lava lea, ma le sikoa a Sam Wilson a ua o’o minute o le ta’aloga i le 90 na fa’ai’u ai latou ‘ai o le ta’aloga e 5 i le tasi lava le sikoa a Vanuatu.

I le ta’aloga lona lua i le va o le tulaga tolu ma le fa i le ta’amilosaga na fetaui mai ai Tahiti ma Niu Kaletonia sa tauivi tele lea finauga, ae na i’u lava ina manumalo Tahiti i ‘ai e 3-2 a Niu Kaletonia. I le mae’a ai o le afa muamua o lea fetauiga, e ta’itasi lava ‘ai o ‘au e lua, peita’i na sofa’i lava e Tahiti lana paga i le amataga o le afa lona lua, fai loa ma fa’aaliga a Heirauaril Salem kiki lana sikoa i le 51 o minute o le ta’aloga, toe fafao ma le isi ana fa’atini i le lona 89 o minute o le ta’aloga ma maua ‘ai fa’asili o le ta’aloga e tolu Tahiti ae tasi le sikoa fa’aopoopo a Niu Kaletonia na toe maua i le afa lona lua.

O le aoauli nei, e sailia ai loa le siamupini i le va o ‘au a Niu Sila o lo’o i ai le siamupini o le OFC - U17 mo le lima o tausaga, ma Tahiti lea ua lu’ia nei lea ‘pa sima’ o manumalo. Ae o le sailiga o ‘au tulaga tolu ma le fa o le a fetaui ai Niu Kaletonia ma Vanuatu lea e tatala malae i lea fa’amoemoe i malae i Pago Pago.

O lona uiga, o le ta’aloga faitaulia o le sailiga o le Siamupini o le fa’atautaia lea i le itula e 3:30 i le aoauli

O lo ua i ai fo’i ma se fa’aeaga taua e maua e le ‘au o le a siamupini atu i lenei ta’amilosaga, o i latou ia e suia le OFC-U17 i le ta’amilosaga a le Ipu o le lalolagi lea ua fa’atulaga e fa’atautaia mai ia Oketopa 17 se’ia o’o ia Novema 8, 2015, i le malo o Chile, lea e toe fetaui ai ‘au siamupini e 24 mai vaega e 24 o le lalolagi ua mae’a vaevaeina i ai e ta’a’alo fa’atauva mai ai.

O le vaevaega o le lalolagi i ona konetineta e fa’atauva ai e aofia ai: Asia e fa ana ‘au soka e agava’a mai ai, Aferika e fa ana ‘au ta’a’alo siamupini e agava’a mai ai, Amerika i Matu ma le Karepiana e fa latou ‘au e agava’a mai ai, Amerika i Saute e fa ‘au soka e agava’a mai ai, o le OFC e tasi le ‘au e agava’a mai ai, lea tatou te sailia i’inei, Iuni a Europa e ono a latou au soka e agava’a mai ai ma le malo e talimalo, e otomeki le latou ‘auai  e ta’a’alo e le tauva i se ta’amilosaga e pei ona tatou faia nei.