Se aganu'u a fa'aaloalo - o le aganu'u lava ia e fa'aaloalo tusia: Common Cause A'o fea le sili? O le Fa'aaloalo, Usita'i, Alofa ma le Fa'amaoni? Tali mai iai 'oe. Ua mafua ona faia lea fesili, ona ua o tatou lafi pea i lalo o le fa'aaloalo ma le ava fatafata, ae galo le usita'i i tulafono, alofa i lou atunu'u po o le lua te tuaoi ma le fa'amaoni ona manuia lea o le atunu'u. O le tatou soifuaga i nei aso, ua ta'ita'iina pea i tatou i le Tusi Paia, ma ua ta'ua pea i tatou o tagata Kerisiano. Ae o moni lea kerisiano pe a o tatou manatunatu i mea o lo'o tutupu mai i totonu o lo tatou faigamalo? O le aotelega o tusi o le Tusi Paia, o lo'o tautala pea i le usita'i, alofa ma le fa'amaoni. Vagana ai se upu e taulata iai o le Ava. "Ia e ava i lou tama ma lou tina" Ua mafua ona talanoaina la tatou aganu'u fa'aaloalo, ona ua fai ma alofaga o i latou ua o latou leiloa nisi upu o le a fai pe a fesiligia le tagovale so'o i tupe ma mea totino a le Malo, po o le le fa'ataunu'uina o folafolaga e faia so'o e o tatou ta'ita'i, atoa ai ma galuega o lo o tau'aveina e le 'au le agava'a. Talofa i lo tatou fa'asausili ma le loto maa'a. O a nei tali e tu'u mai, "e i o latou lava luga a latou amio, 'aua le su'esu'eina fua." E ufiufi pea ea se'ia afea? Paga lea, o ni fesili e faigata ona tali ona ua tatou tu'ulafoa'i le tapasa na fa'avae mai ai o tatou olaga, o le Tusi Paia lea. O fa'afitauli e mafai ona fofo. Ua tatau i a'i tatou e ona le atunu'u ona tula'i ma fa'apea ane, ua lava ia leaga, ua tatau ona suia le ta'ita'iga o le atunu'u. Afai ua le mafai e nei ta'ita'i ona fa'afoeina le Malo i le amiotonu ma usiusita'i i le tulafono, o lau palota le atunu'u e, e suia ai mea uma. Ua 12 tausaga o feagai pea i tatou ma lenei faiga Malo. Ua le alu i luma ae ua o tatou solomuli. Silasila i mafua'aga o le tatou solomuli pea: - Ua o tatou nonofo aitalafu pea i tupe o Litaea. O le aofa'iga o le aitalafu e $35 miliona. E $5 miliona na aitalafu e le falema'i ua fa'amagalo. E $10 miliona o lo'o tau togitogi mai pea e le ASTCA mo le falema'i. E $20 miliona e nono e le Kovana. Ae o le fesili; O lelei le falema'i talu na nono nei tupe? O le tali e leai. Ua na'o le taugata o a tatou pili, ma o lo'o fa'aletonu le tausiga o i tatou. Ua fiu fo'i e o atu e tu'itu'i atu i le Fono, vala'au mai le atunu'u e o atu e molimau, ae leai ni suiga. Amuia o tatou ta'ita'i a gasegasea e ave i va'alele fa'apitoa. A mama'i le atunu'u e saili pe i ai se tupe, pe ave i Filipaina e taugofie. Ona nono lea o le $20 miliona e le Kovana. O le a lona fa'asoasoaina? O tatou mautinoaina ea? Tagi mai le Fono, tagi mai lea matagaluega, ua ave nisi tupe e fa'atupe ai amataga o le fiber optic, ae o fa'apefea le atunu'u. Ua maua se si'i o lau siaki litaea? O iai sau inisiua o le falema'i? O i ai sau Life Insurance? O maua ea ni penefiti (benefits) mo outou ua litaea? Silasila ane i le ASPA. Ina ua alu ese le tamaloa na lelei ai le ASPA, ua to'alima (5) i latou na suia o ia. O le ali'i loia o lona lima ai lena, ua fa'afaigaluegaina lona faletua i le human resources a le ASPA. E tofu i laua ma le ta'avale a le ASPA ae, e le mafai ona o e on-call pe a pau se pou uila pe afaina foi se vaega o le suavai. O lenei ua manatu se tasi Senatoa, e toe aumaia le ASPA i lalo o le Malo. O le a sou finagalo? - O fea o iai su'esu'ega o le Ofisa ole TEMCO? Ua tu'ulafoa'i aisea i le FBI a'o fea le Ofisa Su'esu'e a Leoleo ma le Ofisa o le Loia Sili? - O fea o iai su'esu'ega a leoleo ma Loia Sili i le fale talitane (tulou) lea na maua o fai i Pago Pago? Ua tu'u tia'i ea i le FBI ma le Federal Courts, ae fa'apefea a tatou fale fa'amasino? O lagona ea e le Immigration le mataga o nei mea e tutupu mai ona o lo latou fa'atamala? - O ifea ua o'o i ai mea'ai a le falema'i lea na la'u i le faleoloa o le Gold Conda? Ua momono fo'i ise vaipanoa ona o tagata e ana ia lea faleoloa e aiga i se tasi o ta'ita'i o le atunu'u? - O fea le moliaga i le tulafono o Poe Faumuina lea na aitalafu le $20,000 mai le Ofisa o le Treasury? O ai e faia fa'ai'uga mo mataupu fa'apenei? Loia Sili po o le Fa'amasinoga? - O fea le pili o le si'i ai totogi o faia'oga? Ua tuai aisea ona ave le pili lea a le Administration i le Fono e mautinoa ai e taua faia'oga i lenei faigamalo? - O fea inisiua mo le falema'i a tagatanu'u? Ua tolu (3) tausaga e leai lava se inisiua. Ua leai nei se Hong Kong Plan, leai se Taiwan Plan ae masalo ua o tatou iai nei i le "We Don't Care Plan." Ni a fa outou le Fono ma le Kovana? A'o fea le $500,000 na avatu e su'esu'e ai lenei inisiua mo le atunu'u? O le manatu lava i le Fa'aaloalo ma le Ava Fatafata, ae o le mea moni, ua tatau ona tu'u outou na na o e saili mai le plan i lalo o le "FUTI SLAM PLAN". Ta'ita'i e o le Malo, ua tele ni mea e tutupu mai. Ua alu tele i luga le tau o le soifuaga, ae tou te mumusu e si'i totogi. Tou te le o sailia ma le fa'amaoni ni auala e fa'afaigofie ai le olaga o le atunu'u ae ua na ona outou fa'afalute mai i o matou luga le avega, o le avega lea o le tausiga o aiga, fafaga ma fa'aa'o'oga fanau, tausi matua, fai fa'alavelave, o mea fa'alelotu, etc. Tatala finagalo ma loto i musumusuga a le Agaga Paia. Aua le loto maa'a. Fesili pe manuia le atunu'u pe a toe fa'aopoopo se isi fa (4) tausaga o lenei nofoa'iga. Afai e leai, ona ta'atia pea lea o le fa'aaloalo a le aganu'u, ae fai lou tiute, palota i le mea sa'o. ALOFA, USITA'I MA FA'AMAONI, o ituaiga ta'ita'i na e mana'omia e le atunu'u. Soifua © Osini Faleatasi Inc. dba Samoa News reserves all rights.