Tala mai
Samoa
faaliliu;
A. Tuna
SUIA IGOA
'PULENUU' I 'SUI O LE MALO'
Ua fa'aalia le
lagolagoina e le Palemia o Samoa, le afioga Tuilaepa Sailele
Malielegaoi o le suia o le igoa 'pulenuu' i 'Sui o le Malo',
e pei ona fautuaina mai e le faamasinoga. Peitai ua fa'aalia
letete'e o le komiti filifilia a le Palemene i lea suiga.
Na saunoa le
afioga Aeau Peniamina, le taitaifono o le komiti, e lelei lava
le tu'u ai pea i le igoa 'pulenuu' aua e o gatasi ma tulaga o
tu ma aganuu. Na saunoa le taitaifono, o le upu lenei o le 'Sui
o le Malo' e pei e ta'u mai ai na filifilia lea tagata i auala
faapolokiki, ae peitai, o lea tofiga, e filifili e matai o nu'u
ma afioaga.
Na ta'ua e Aeau,
e mafai ona sui le igoa 'pulenuu' i le 'sui o le nuu', ae peitai
na saunoa Tuilaepa e sese tagata na talanoa iai le komiti. Sa
taua e le Palemia e faapea, na le tatau i le komiti ona toe talanoa
i Pulenu'u, ae talanoa atu i isi tagata.
O se tasi nei
o mataupu mai i mataupu e 15 na te'ena e le Komiti faapitoa o
le Palemene. O se tasi o fautuaga autu, o le fautuaina lea o
matai o le nu'u i le malosiaga o le faavae ma aia tatau o tagata
taitoatasi.
O se tasi o mataupu
na teena e le komiti, e aofia ai vaega e 16 ma le 17 o Faamasinoga
o Fanua ma Suafa. Sa te'ena e le komiti le tulaga o pule faamau.
Ua talitonu le komiti, o le a ave'esea ai le aia tatau mai i
tagata Samoa o lo'o aumau i atunuu i fafo.
LE FIAFIA
VAIVASE UTA I TULAGA O AUALA
Ua te'a atu faasea
a le afioagao Vaivase Uta i le tulaga faaletonu na iai o latou
aualatele, ae o lea ua fa'aalia lo latou le fiafia ona o le faagasologa
o galuega o lo'o faia nei, mo le faaleleia o auala. Ua ta'ua
e nisi o aiga, ua a'afia atu ai ma o latou fanua i nei galuega.
E pei ona sa
saunoa se tasi o sui mai i Vaivase Uta, e le o se talitualimaina
o faamanuiaga, ae peitai, e le o sao le faia o galuega.
O lo'o taofi
le aufaigaluega o lo'o gafa ma le toe faaleleia o le auala, o
pa ma togala'au a aiga, o lo'o i luga o vaega e aofia i le latou
galuega, ae peitai, o lo'o finau aiga, o a latou fanua ia ua
ave'esea faamalosi mai ia i latou.
E le gata i lea,
ua ta'i mai laina telefoni i luga o fanua o aiga, e aunoa ma
se faatanaga mai i aiga. E pei ona sa ta'ua e se tasi o aiga,
na ona o atu lava o le aufaigaluega ua eli pu i luga o a latou
fanua, ma si'i atu iai pou telefoni, e aunoa ma se latou faatanaga.
Sa le mafai ona
maua se faamatalaga mai i le pulesili o le Minisita o Galuega
Lautele.
SUESUE E LE
OFISA O LE SOIFUA MALOLOINA GASEGASE MANAVA TATA
Ona o ripoti
na lomia i le nusipepa o le Newsline e tusa ai ma nisi o le atunuu
na a'afia i le gasegase o le manava tata, lea o lo'o masalomia
ai vaita'ele i Faleata, ua faapea ona amata ai ni suesuega a
le Ofisa o le Soifua Maloloina i lenei tulaga.
Na mafai ona
faamaonia mai e le sui pulesili o le Ofisa o le Soifua Maloloina,
le susuga Andrew Peteru i le Newsline le amataina o a latou suesuega
i le suavai o lo'o fa'aaogaina i vaita'ele i Faleata ma ua faaooina
atu faaiuga o nei suesuega i le pulesili o le Minisita o le Soifua
Maloloina, le susuga Palanitina Toelupe.
Na ta'ua e Peteru,
e iai nisi tulaga e faataunuuina ae e le'i faasaga le latou ofisa
e suesue le suavai i totonu o faataelega. Na ia faamanino mai
e faapea, i tulaga o faasea faapenei, e taumafai le latou ofisa
e faamautu, pe o le faaletonu o fagu vai o lo'o fa'aaogaina,
po o totonu o ta'elega. E aofia ai le suesueina o tulaga o vailaau
o lo'o fa'aaogaina.
Na fa'aauau le
saunoaga a Peteru e faapea, afai e faamaonia mai i suesuega le
auala mai i nei suavai o vairusi o lo'o gasegase ai tagata, o
le a latou laasia loa seisi laasaga ina ia fofoina ai lenei faafitauli.
Na ia faamalamalama
mai foi e faapea, o le auala lava lea e tasi e latou te uia pe
a tula'i mai se faasea i tulaga o taumafa. E latou te suesueina
muamua ia fale'aiga.
Sa le mafai ona
maua se fesootaiga ma le pulesili o le Minisita o le Soifua Maloloina
mo se faamatalaga e tusa ai ma lenei mataupu.
[O nei tala
mai i Apia ua mafai ona auina atu ona o le tautua a le Samoalive/Newsline).]
Faafesootai
le tusitala i le imeli evaga@samoanews.com.
© Osini Faleatasi Inc. dba
Samoa News reserves all rights.
|