Umusaga maota
o le feagaiga EFKAS i Alofau
tusia; Leua
Aiono Frost
Na umusaina aloaia
le maota e alaala ai le susuga i le Fa'afeagaiga ia Aneterea
Faleali'i ma le faletua o Tepora ma le fanau i Alofau.
O le taimi fa'apitoa
lea ua maea fa'ataunu'u ai se fanoga o le Afioga le Tupufia talu
ona tu'ua e ia le malo i le tausaga e 2006 e lana ekalesia, ma
sa fa'apea lava ona fa'alauiloa mai e le susuga Taua'a Sam Vaouli,
i lana saunoaga mo se tala fa'amauina o lea galuega tele.
O le tau o le
galuega lea e $107,126.43 lona aofaiga, ae o le tupe lava sa
sailia e le ekalesia e $85,014.80 ae o lo'o totoe nei le aitalafu
e ao ina totogia e le ekalesia e na'o le $17,600.
I le amataga
o le sauniga e fa'apa'ia ai le galuega, ma sa ta'ita'ia lea sauniga
fa'apitoa e le susuga le Taitaifono EFKAS o Rev. Leatualagi fa'alevao
ma sa ia fa'apa'iaina ai le maota mo le alaalata'i ai o lana
auauna, le faletua ma le fanau ae maise o nisi e fia mana'omia
se fesoasoani.
Ina ua maea lea
sa tu'uina fo'i le fa'aaloalo maualuga o le ootia o le lipine
i le Faletua o le Taitaifono, sa ia mua'i fa'afetaia lea avanoa
maualuga ma le matagofie ua fa'ae'e ia te ia, e tatalaina aloaia
ai lea galuega tele i totonu o le Ekalesia i Alofau.
O le maota e
matagofie tele i totonu ma fafo, e lima potu moe i le potu tele
o le Fa'afeagaiga ma le Faletua ma e i ai uma lava potu ta'ele
ma isi teuteuga uma i totonu o lea potu tele. O le umukuka e
matagofie ma ua maea fa'ameafale uma lea fo'i maota mo le fa'aaogina
e afua i le aso ua umusaina ai.
O le galuega
sa fausia lea e le susuga le Matuaofaiva Peni Fiso, ma le falefa
o le a iga o Salemalama o taulele'a tino lelei uma fo'i o le
ekalesia sa fesoasoani malosi ia i latou nei.
I le taimi na
fa'afeiloaia ai le mamalu ole au vala'aulia ananafi, sa toe talia
ai fo'i ni a latou meaalofa tupe, lea sa taua'aoina ai e le susuga
le taitaifono Fa'alevao male faletua le meaalofa tupe e $500.00,
o le afioga le senatoa muagututi'a tuato'o e $1,000.00, faipisinisi
korea i le afioaga e $400.00 faulautusi ole ekalesia e $200.00,
ma le susuga faletolu e $100.00.
O ia meaalofa
uma ole a fesoasoani tele lea ile totogia ole $17,000. lea e
totoe o le aitalafu.
Peita'i, i le
taimi na tutula'i ai le fofoga ole polokalama fa'asolo mole fa'amoemoe
o le ekalesia kerisiano i alofau, sa fa'apea ai le susuga alaimaleata
ioane, 'ua tatou le o toe popole fo'i i lea aitalafu e $17,000.
o totoe nei, aua e $170,000. le vaega tupe ua maea i ai nei ile
faletupe e fausia ai le toe galuega o le hall tele lea a le ekalesia
i alofau epei ona momo'o i ai le afioga le tupufia ao le'i tuua
le malo.
Faafesootai
le tusitala i le imeli leua@samoanews.com.
© Osini Faleatasi Inc. dba
Samoa News reserves all rights.
|