O Siaosi
le toa o Asuria
vaega #23
(E toe faatalofa
atu i paaga masani a la tatou polokalame, e talitonu le tatou
polokalame o loo manuia mea uma i le agalelei mai o le Atua,
ae alo mai loa, o le toe faaauauina lenei o la tatou tala faasolo,
lea na gata mai i le vaiaso na tea nei i le taimi lea na faafesootai
ai le tama o Siaosi lana manamea o Elena, ina ia fo'i ane loa
i le aai o lea ua maea ona faatulaga le misiona na la tuu tala
ai. )
Na ona uma lava
ona talanoa o le tama i le telefoni, savali atu loa i le itu
o loo taula ai le vaa afi lea o le a sosola ai, faatulaga mai
ana aupega ma nofonofo mai ai i le isi itu pogisa e faatali mai
ai le taunuu atu o le tamaitai purinisese.
Se'i o tatou
liliu atu i le vaega o loo i ai le tamaitai o Elena. E taunuu
atu le telefoni a le tama o Siaosi, toe toatasi le alii fitafita
o loo talanoa ma Elena i tua o le taavale, ae o isi alii fitafita
ua agai atu e toe taamilo tasi i le lotoa, manu e lei faia sa
latou malologa i lea po, ina ia mautinoa e leai se mea o faaletonu.
Peitai o le alii fitafita lea ua fesaga'i nei ma le tamaitai
purinisese, ua le toe i ai lava se isi mea i lona mafaufau i
lea taimi, ae ua taumafai ina ia fai atu sana tala i le tamaitai
purinisese lalelei o le malo, pe tau ane ai sona manatu ia te
ia. Ma ua faa faigata ai ia Elena ona fai atu se tonu o ia o
le a foi i le aai, ona o lea ua oo le la talanoaga i le tulaga
e oo ai talanoaga i le va o alii ma tamaitai. Ae e ui i lea,
na faailoa atu e le tamaitai i le alii fitafita, o ia ua oo i
le taimi e tatau ai ona foi i le aai ona ua lagona foi le vaivai,
ma le isi itu, ua leva foi le po ae atonu o le a toe maua se
isi a la feiloaiga i le aso o loo muamua, peitai na finau ane
pea le alii fitafita ia Elena, la te o e momoli o i ai le maota
ona toe foi ane ai lea i le latou uati i lea po.
Ua agai i le
2 itula o faatali pea le tama o Siaosi i le vaega o loo lafi
ai, ma ua amata ona oso lona popole, pe i ai se mea ua tupu ua
mafua ai ona tuai atu lana manamea, pe o le mea foi ua toe sui
lona mafaufau i le mea ua la faia i totonu o le malo a lona tama,
ma le tulaga lea ua ia faasosola ese ina ai pologa sa auauna
ma manuia ai le malo a lona tama, le tupu saua o le malo o Enokati,
peitai ona o Siaosi o le tagata e to'a i soo se taimi, o lea
na ia manatu ai, atonu o se isi lava mafuaaga ua ala ai ona tuai
ane le tamaitai purinisese, ae o le a ia nofo faatali pea.
Na avea le umi
ona nofo faatali o le tama ma itu na tautulimoe ai i luga o le
papa lea o loo lafi ai, ma i'u ai lava ina moe, peitai na tei
le tama ina ua ia faalogoina se leo o se taavale o loo agai atu
i le itu lea o loo lafi mai ai, ona tei ae loa lea ua tago atu
i ana a'upega ma sauni, ina nei moni ona masalosaloga ini lagona
ua oo i le tamaitai purinisese. Na tu le taavale i se vaega e
le mamao mai le itu o loo lafi ai, ma ia iloa atu ai Elena ma
se alii fitafita o loo talanoa mai i totonu.
E faia pea.
© Osini Faleatasi Inc. dba
Samoa News reserves all rights.
|