Nofo vaavaaia
mo le 2 tausaga ia le pulenu'u o Pago Pago
tusia: Ausage
Fausia
E ui i le malosi
o faafinauga mai le loia a le malo, ina ia faasala le pulenuu
a le afioaga o Pago Pago, susuga Vila Tufele mo le 180 aso, peitai
na fofogaina e le Faamasinoga Maualuga lana faaiuga i le taeao
ananafi, ma faanofo vaavaaia ai o ia mo le 2 tausaga, i lalo
o ni poloaiga faapitoa.
O ia poloaiga
faapitoa e aofia ai lona totogia o se sala tupe e $1,000, aua
nei ona toe solia se tulafono, ia faatoese foi i le alii na aafia
i lenei mataupu, ao molimauina e se sui o le ofisa faanofo vaavaaia,
ma ia ripoti atu i le ofisa faanofo vaavaaia, faatasi i totonu
o le tolu masina.
Ao lei fofogaina
le faasalaga a le faamasinoga, na muamua ona tauaao atu e le
loia a Tufele, Tautai Aviata Faalevao se tusi mai le afioga i
le Maoputasi, e lagolago ai le tulaga o tiute tauave o le susuga
Tufele i totonu o le afioaga.
E le gata i lea,
sa faapea foi ona molimau le afioga i le Aliioaiga, Asuega Faamamata
i luma o le faamasinoga, ma ia faailoa i ai le taua o tiute o
Tufele sa faia i totonu o le aumaga, ao avea ai o ia ma pulenuu.
Saunoa Asuega,
o Tufele, o se tasi o lima taumatau i totonu o lona aiga, ma
o le ala foi lea na tofia ai o ia e avea ma pulenuu o le afioaga,
ona o le tulaga i le afu o le tautua, ma ua iloa foi ana galuega
i le nuu, ma e le gata la i tulaga o faagaioiga faalenuu, ae
faapea foi i le tulaga o mafutaga faaleautalavou.
Na faamaualalo
le afioga i le Aliioaiga e fai ai o ia ma sui o Tufele i luma
o le faamasinoga, ona o se gaioiga sa ia faia ua le tusa ma ala
o le tulafono.
Sa faapea foi
ona faamaualalo le susuga Tufele i le faamasinoga, ona o le mataupu
ua aafia ai lona igoa i luma o le faamasinoga. Sa ia taua, o
lona lava talitonuga, sa ia faatinoina ona tiute e ala i le faamalosia
o le tulafono a le afioaga i le taimi o le vavao.
Sa taua foi e
le Tufele, o ia o se tagata e silafia lelei tulafono a le malo,
aua e le gata sa galue o se leoleo ae sa avea foi o ia ma faiaoga,
peitai na faailoa i ai e le faamasino sili, afioga Michael Kruse,
e taua agavaa ma tomai o loo ia te ia, ma o ia la agavaa, e ao
ona ia faasoa atu i le aumaga lea o loo latou galulue faatasi,
ina ia o latou maua ai se lesona taua.
Saunoa foi le
faamasino sili, i le tulaga o tiute faalenuu ma le malo, ma mavaevae
ina ua sainia e tuaa ua lagomau mai tiasa le feagaiga i le tausaga
e 1900, lea foi sa aofia ai ma le afioga i le Maoputasi o le
afioaga i ia taimi, ina ia taoto atu i le faamalosiina o tiute
i le tulaga o le tulafono, o le vaega a leoleo poo le malo foi,
ae o afioaga ma nuu, tau lava o le latou galulue e fesoasoani.
O le susuga Tufele,
na molia i le faaoolima i le tulaga muamua, tulaga lua faapea
ai ma le tulaga tolu, ona o se faalavelave na tulai mai i luma
o le fale o le Evalani i Pago Pago, lea na tuuaia ai o ia i lona
faaoolima i se isi alii, peitai, o ia moliaga mamafa na faaleaogaina
uma e le vaega iloilo iuga, ae totoe ai na o moliaga mama e lua
o le faaoolima i le tulaga tolu, lea e pei ona ta'usalaina ai
o ia.
Faafesootai
le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|