E le'i vaetamaina
a'u e faapologa
vaega #8
(Faatalofa
ma ofo alofa atu i paaga masani a la tatou polokalame, faamoemoe
o loo manuia mea uma i le tausiga alofa a le Matai oi le lagi,
ae alo mai loa, o le toe faaauauina lenei o la tatou polokalame,
lea na gata mai i le vaiaso na tea nei i le taimi na faailoa
ai e le teineititi o Tili i ona matua, o ona uso ma ona tuagane,
e ui i le tele o mafatiaga o loo feagai ma ia ona o uiga ma amioga
o loo latou faia ia te ia, ae ao lava ona latou iloaina, e le'i
vaetamaina o ia ina ia faapologaina.)
Na ona uma atu
lava o tala ia a le teineititi o Tili, tula'i loa i luga ma savali
i tua i le umukuka ma amata ana galuega masani i le faamamaina
lea o tafa fale aemaise ai le umukuka, faasolo ane ai i le itu
o le fale o loo i ai le toga laau aina lea sa ia totoina. O le
ulugalii o Kalifa ma Gisa i lea taimi, ua leai lava se isi gaioiga
la te toe faia, aua o lea ua manino i o la manatu, e ui na o
la tigaina i le tausiaina o Tili ina ua faatoa fanau mai i lona
tina, peitai e foliga mai o le a la le selesele i ai ona o uiga
saua ma le le alofa o loo faaali atu i ai e Gisa i le teineititi.
Ua malu le afiafi,
ma ua pisapisao foi luga o le laulau i le aiga aua ua oo foi
i le taimi o le tausiga, peitai o Tili i lea taimi, e lei foi
ane lava i le fale, ae o loo pisi pea i le tau totoina o ana
kapisi i lana faatoaga laau aina lea e le mamao ese lava mai
le latou fale. Na avea le umi o i ai Tili i lana togalaau ma
itu na savali ane ai le fafine faitatala o Litia e alu i le faleoloa
e faatau mai se pisupo e tali ai ana malo, ae o loo pisi mai
lava i lana toga laau.
E valaau ane
lava Litia ia Tili e malolo ia ua lava ia galuega ma savali telea'i
lava i le faleoloa, peitai na toe valaau atu i ai Tili e vave
le faiga o ana feau ae sau la te talanoa i se taimi o le po lea.
Sa lilo ia Litia, o le taimi lea o le a ia faailoa ai ia Tili
le tamaloa o le latou aiga lea faatoa sau mai Niu Sila, e aulotu
ma le tina moni lava o Tili, lea la ua sau le tamaloa ma le feau
mai le tina o Tili, e sau ma siaki si ana tama pe o lelei le
olaga o loo i ai, ma, afai ae o le a se tulaga o loo i ai, ona
toe foi atu lea ma se tala faapea ai se telefoni e mafai ai ona
la fesootai.
O se po ese lea
i le ulugalii o Gisa ma Kalifa aua o lea lava ua maea le tausiga
o le afiafi a le latou aiga, e lei oo atu lava Tili i le fale,
ae o loo pisi lava i lana toga laau aina. Na savali mai le fafine
saua o Gisa ma faatonu le teine o Tili e lava ia galuega ae alu
i le fale e taele ma malolo, peitai sa lei faalogo i ai le teine
ona o le tiga tele o lona loto i uiga o le fafine lea ua faaali
atu ia te ia. O le po lava lea na faailoa ai e le fafine o Litia
ia Tili, le tamaloa o le latou aiga lea faatoa sau mai Niu Sila,
e aulotu faatasi ma lona tina moni, ma o loo mana'o mai lona
tina i se auala la te toe fesoota'i ai ona ua faalogo i tala,
e leaga le faiga o ia e lona tuagane ma lona toalua.
E faia pea...
Faafesootai
le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|