O Tala o
le Vavau
O AITU VAVALO
A SAMOA
vaega #1
I gauta o le
nuu o Tufutafoe i Savaii i le pitonuu e ta'ua o Lalolama, sa
nonofo ai se ulugalii e igoa ia Sau ma Fine ma le la tama. I
se tasi o aso, na alu ai le tamaloa e toli ulu e fai ai le faapusa,
ae faatali atu le olomatua ma le la tama i le fale. O le mea
ua tupu, ua agai atu lava ina po le aso, ae lei maua lava se
'ulu a le tamaloa. E agai ifo i lalo le tamaloa ma le ulu, ae
valaau atu i ai le tagata e vaai le fua o le ulu le la e tautau
mai i le isi itu.
Ua toe a'e le
tamaloa i luga o le ulu e toli le fua o le ulu e pei ona valaau
atu ai le tagata, peitai fai mai le tala, e pau le ulu na alu
le tamaloa e toli, ae toe valaau atu le tagata ia te ia e vaai
le isi fua o le ulu le la o loo tautau mai i le isi itu, ona
toe toli foi lea e le tamaloa, peitai sa vaaia e le tamaloa le
tele o fua o le ulu ua ia vaaia o loo tautau mai luga o le ulu,
ona faaauau pea lava lea o lana galuega o le toli i lalo o fua
ia ua ia vaaia, peitai ua fiu e toli e le uma.
Ua iloa e le
tamaloa e foliga mai e i ai le mea lea ua tupu, ona o lea ua
fiu e toli fua o le ulu ae le taitai uma, ma ua ia vaaia foi
le fau ma soloi o fua o le ulu ua maea ona ia toliina, o lea
na ia toe sau ai loa i lalo mai le ulu ma amata loa ona tufi
ana ulu sa toli.
Ao tufi ulu le
tamaloa, na faafuasei ona ia tau atu i le atigiulupoo o lona
atalii, ua uma ona ai e lona toalua le tino ae totoe ai lona
atigiulupoo. O le taimi lea na maea ai loa ma le tufigaulu a
le tamaloa, ae ua foi ma le ita tele i lona fale ma lona manatu,
o le a ia fasiotia lona toalua ona o le mea leaga ua ia faia.
Ao savali le
tamaloa ma le ita tele i lona aiga, ae fai atu le atigiulupoo
i ai, "aua e te faia lena mea, aua ua tonu le mea ua faia
e lou tina ia te au, ina ua e toli ulu i fuata a amiotonu."
Ona faatonu lea
e le ulupoo o le tamaloa, ina ia lalaga se ato ona tuu ai lea
o ia i totonu, ona lalaga lea e le tamaloa o le ato lea ua faaigoaina
o le "ola" aua o le ato lea na tuu i ai le ola o le
tama.
Soifua.
Faafesootai
le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|