Tala mai
Vaifanua
SN/Le Lali
FUAFUA LE
TOE ILOILOINA E E LE FONO SIITAGA I TOTOGI O FAIAOGA
O le aso ananafi
na faaulufaleina ai i luma o le Fono Faitulafono ia se pili taufaaofi
a le Faigamalo, e si'i ai totogi mo faiaoga a aoga o le malo.
O lea la ua nofo
sauni le Fono ma le Senate, ina ia amata iloiloga o lenei pili
taufaaofi i le Aso Gafua. E le o ma'oti mai i totonu o le pili
le aofaiga tonu ua manaomia e faatino ai lenei fuafuaga, i siitaga
o totogi a faiaoga, ae ua iai se talitonuga, e faatupeina mai
i tupe fa'aagaga a le Ofisa O Aoga mo le latou tupe faasoasoa
o le tausaga tau tupe 2008.
Na ta'ua e le
afioga Togiola Tulafono i lana tusi i taitai o le Fono, o se
tasi nei o lu'itau a le malo, o le sailia ma le faatumauina o
faiaoga i totonu o a latou galuega. Ae i iloiloga sa faia ma
le Ofisa o Aoga, ua a'e ai se manatu, mo le faataunuuina o lenei
fuafuaga e mafai ona atia'e ai galuega lelei i totonu o potu
aoga.
Ua talitonu le
afioga i le kovana sili, o le a fesoasoani lenei siitaga ina
ia mafai ona faafaigofie ai ona sailia mai ni faiaoga aemaise
o le taofia o i latou i totonu o a latou galuega.
Ua aofia ai i
totonu o lenei pili se komiti faafoe, e filifilia mai e le kovana
ma pasia e le Fono, e latou te vaavaaia pe mataituina tulaga
o laisene ma tusi pasi e manaomia e faiaoga ma taitai aoga, i
totonu o le Ofisa o Aoga a le malo. E toatolu totino o lenei
komiti.
O lo latou tiute
o le faamalosia lea o polokalama i tulaga o faailoga e ao ona
umia e faiaoga, e pei ona faatulagaina mai e le Ofisa o Aoga.
ASIASI MAI
PERESETENE O LE IUNIVESITE A LE BYU-HC
O le afiafi o
le Aso Tofi na taunuu mai ai i Amerika Samoa ia le peresetene
fou a le Iunivesite a le Polika Iaga i Laie, i Hawaii (BYU-HC),
le susuga Steven C. Wheelwright, ma lona faletua o Margaret,
o le susuga Arapata Meha, lea o lo'o faauluulu iai le ofisa o
faamaumauga ma le faaulufaleina o fanau aoga.
O le ulua'i taimi
lenei ua malaga mai ai le peresetene o le Iunivesite, talu ona
sui tulaga ia Jeff Shumway, i suiga o taitai ia Iuni.
O le aso ananafi
na feiloai ai Wainright, Meha ma le afioga i le kovana sili aua
le talanaoina o le faia o se Maliliega Tusitusia (MOU) ina ia
mafai ai ona faamautu se polokalama (civl service internship)
mo fanau aoga a le teritori ua faamoemoe e ulufale atu i totonu
o le iunivesite a Polika Iaga.
Na mafai foi
ona maua se avanoa e feiloai ai Wheelwright ma le peresetene
o le ASCC, ia Dr. Seth P. Galeai aua le toe faafouina o se maliliega,
lea e faataga ai ona aveina atu faailoga (credits) a fanau aoga
i le Kolisi i le BYU-H.
Sa faapea foi
ona asia e le aumalaga ia kamupani i'a i Satala.
O le 5 i le afiafi
ananafi sa faataunuuina ai se aiga a le aumalaga ma tama ma teine
tuai o le Iunivesite o lo'o aumau i totonu o Amerika Samoa. I
le 7 i le afiafi na faia ai se sauniga lotu (fireside) i le falesa
a le Ekalesia a Iesu Keriso o le Au Paia o Aso e Gata ai i Ottoville.
O le aso ua faamoemoe
e fa'aauau atu ai lenei faigamalaga i Apia, aua se asiasiga i
le aoga autu a le LDS i Pesega. Ona toe fo'i mai lea i le aso
a taeao le faigamalaga, aua le sauni atu mo Hawaii i le afiafi
a taeao.
FAAGATA I
LE ASO FARAILE O LE VAIASO FOU IA TALOSAGA MO SIKOLASIPI BPWAS
O so'o se tamaitai
talavou ua fuafua e faauu i lenei tausaga aoga, ae o iai se faamoemoega
e fia fa'aauau ana aoaoga, o lo'o iai nei se avanoa e mafai ona
ausia se sikolasipi mai i le faalapotopotoga o tamaitai faipisinisi
a Amerika Samoa (Business and Professional Women of American
Samoa-BPWAS).
O le Aso Faraile
o le vaiaso fou, Aso 9 o Me, e faagata ai ona talia talosaga
mo nei sikolasipi.
O nei sikolasipi
na amata ona tufatufaina e le BPWAS talu mai le 1996 i tamaitai
talavou ua agava'a, mo le fa'aauauina o a latou aoaoga. I le
tausaga ua mavae, pe a ma le $6,000 se tinoitupe na faameaalofaina
atu ai sikolasipi a le BPWAS.
O lenei tausaga,
ua toe nofo saunia le BPWAS, e tuuina atu ni sikolasipi ta'i
$1,000 i so'o se tamaitai talavou o lo'o naunau e fa'aauau ana
aoaoga i kolisi po o iunivesite i fafo, ae $500 mo se tasi e
fia fa'aauau ana aoga i le Kolisi Tuufaatasi a Amerika Samoa
(ASCC).
Na faailoa mai
e le peresetene a le BPWAS, le faletua ia Merrilee May, o lo'o
iai se naunautaiga i le latou faalapotopotoga ina ia toatele
ni tamaitai talavou o le a taumafai atu mo nei sikolasipi ma
o lo'o iai so latou faamoemoe, o le a mafai ona o latou filifilia
nisi ua agava'a mo nei sikolasipi ma tauaaoina atu, i aso o faauuga
a aoga.
O so'o se tamaitai
e fia taumafai atu mo nei sikolasipi, e tatau ona tumau ona togi
(GPA) i le 3.0, ma ia faauuina mai i se aoga maualuga i totonu
o Tutuila po o Manu'a ma ia faaooina atu tulaga uma ua manaomia
i nofoaga faatonuina, ae e le'i ta ina le 5 i le afiafi o le
Aso Faraile, Me 9, 2008.
O tulaga o lo'o
manaomia, e aofia ai se tusi e faamatalaina atu ai lou tagata
(suafa, tuatusi, aoga, vasega, ma se faamatalaga i lou olaga),
o se tala (typed, double-spaced) i le gagana faa Peretania, e
faailoa atu ai au sini faatuina mo leisi fa tausaga o i luma
faapea au fuafuaga pe a e faauu mai i le kolisi/iunivesite; o
se kopi o se tusi mai i se kolisi/iunivesite ua taliaina ai;
faapea faamaumauga mai i lau aoga.
E mafai ona faaooina
atu nei tulaga uma i le faletusi a le malo i Utulei po o le faleoloa
a le J-Len T's i Nu'uuli. Mo nisi faamatalaga, e mafai ona valaau
ia Merrilee May i le 258-1321 po o Fuala'au Tago Lancaster i
le 258-2900.
Faafesootai
le tusitala i le imeli evaga@samoanews.com.
© Osini Faleatasi Inc. dba
Samoa News reserves all rights.
|