Loka i tausaga
e 5 se alii na faatauina atu mariuana i fanau aoga
tusia: Ausage
Fausia
E 19 tausaga
o se alii na faasalaina e le faamasinoga i le taeao ananafi i
le toese i Tafuna mo le 5 tausaga, ina ua ia ioeina le moliaga
o le umia o ni vaega o fualaau faasaina mo le faamoemoe e faatauina
atu i nisi tagata.
O le alii o Faiva
Hari, 19 tausaga le matua mai Vailoa, na tuuaia e le malo ona
o se faalavelave na tulai mai i le tausaga na tea nei, lea na
maua ai o ia o ia faatauina atu se sikaleti mariuana i se tamaitiiti
aoga, ae ina ua sailia e leoleo lona tino, na maua i ai ni sikaleti
mariuana ua maea ona taai, faapea ai ma ni tupe i totonu o lana
taga.
Na ulua'i tuuaia
o ia e le malo i le moliaga mamafa o le umia o ni vaega o fualaau
faasaina, lea e faasalaina ai se tasi e amata atu i le 10 tausaga,
peitai i se maliliega na o latou faia ma le malo, na ia ioeina
ai le moliaga feololo o le umia o mariuana mo le faamoemoe e
faatauina atu, lea e amata mai lona faasalaga faafalepuipui i
le 5 tausaga.
Na faatoese Hari
i luma o le faamasinoga, ua lagona lona sese ma na te le toe
faia foi lenei solitulafono. Sa ia talosagaina foi le faamasinoga
mo se avanoa e mafai ai ona foi atu i tua se'i faamaea lana aoga.
Peitai na saunoa
Kruse, o le solitulafono lenei, ua faatupulaia i le atunuu, aemaise
lava i tagata o loo latou faatauina atu fualaau faasaina i fanau
aoga, ma o se gaioiga ua tatau i le malo ona latou taofia, pe
sailia foi i latou o loo faapogai mai i ai, ina ia mafai ai ona
taofia.
Ae ona o le tulaga
lea i le le mafai ona maua o le tagata o loo sapalaiina fualaau
faasaina nei i tagata o loo latou faatauina atu, na saunoa ai
le afioga i le alii faamasino ia Michael Kruse, na pau le auala
o le a mafai ai ona oo atu se feau taua ma se lesona aoga ia
i latou o loo faia lenei mea leaga, o le tuuina atu lea o se
faasalaga talafeagai i le ua molia, ina ia mafai ona iloa ai
e le isi vaega o loo fiafia e tulei ma faatau atu mariuana i
fanau aoga, e le o se mea talafeaga lea tulaga.
Sa talosaga foi
le tina o le ua molia i le faamasinoga, o se avanoa sei toe foi
atu ai Faiva i tua i lo latou aiga, sei o latou toe mafuta ma
toe ave i ai nisi fautuaga.
Sa finau le loia
a le malo, susuga Asaua Fuimaono ina ia faasala le ua molia i
se faasalaga maualalo, tusa lea o le 5 tausaga.
Fa'afesootai
le tusitala i le ausage@samoanews.com.
© Osini Faleatasi Inc. dba
Samoa News reserves all rights.
|