O Siaosi
le toa o Asuria
vaega #29
(E toe faatalofa
atu i le paia ma le mamalu o le au faitau i lenei aso, o loo
maua pea le avanoa e feiloai ai i vaiaso taitasi i luga o lenei
polokalame, ae alo mai loa o le toe faaauauina lenei o la tatou
polokalame faasolo, lea na gata mai i le vaiaso na tea nei, i
le taimi lea na tago atu ai le tama o Siaosi ua aumai le aso
lea sa ia mauaina i totonu o le atigipusa, ma asoa i lona ua,
ona la savavali mai loa lea ma lana manamea o Elena, ma agai
atu loa i le vaega o loo i ai le fale o le aiga tupu, i le ogatotonu
o le malae.)
O se po fiafia
lea i le tama o Siaosi, ona e le gata o lea ua toe feiloai ma
lona nuu aemaise ai o ona tagata, ae o lea foi ua taunuu lana
miti sa i ai, o le fia mafuta atu lea i lana manamea o Elena,
le tamaitai ua faananau i ai lona loto. O le po lea i totonu
o le nuu o Asuria, na lagonaina ai le leo o le fiafia ina ua
toe feiloai le tele o aiga ma a latou tagata na ave faapagota
e le tupu saua o le malo o Enokati, ma ua le toe i ai foi se
tasi e loto vaivai, aua o lea ua toe faaopoopo mai le malosi
o tagata uma.
Sei o tatou toe
liliu atu lava i le tupu o Enokati ma le tulaga o lona malo lea
o loo i ai le faamoemoe sili o le malo o Enokati, ma le latou
feiloaiga lea ua faatulaga i luma o le malae i le taimi atofaina
e le tupu saua. Ua nonofo uma i lalo tagata o le malo, ua fai
vaega, o le vaega o fitafita, faapea ai ma vaega o tagata savili,
aemaise ai tagata mauoloa, e oo lava i le au matitiva, ae na
pau le vaega lea ua le nofoia le latou itu, o le vaega a pologa,
ma o se tasi lea o itu na matua tiga tele ai le loto o le tupu,
ona o lea ua le nofoia le nofoaga a le vaega faapitoa lea e tatau
ona latou aumaia le manuia mo le nuu, i le latou faia o galuega
mo le manuia o le malo.
Ua faalauiloa
e le tupu i ona tagata lona le fiafia i le mea ua tupu, ae faapitoa
lava i fitafita ia na o latou leoleoina le nofoaga o loo i ai
tagata pologa, ona o lea ua sosola uma ae leiloa poo fea na latou
i ai, ua sili ai foi ma lona le fiafia, ona o lea ua sola ma
le tagata sa ia manatu e faaoo i ai le oti i le aso lea, o le
tama lea o Siaosi, ona o le gaioiga sa ia faia e teu mai ai
o se tagata mativa, ae leiloa o loo sipai i totonu o lona malo.
Na faateia tagata uma ina ua saunoa le tupu ma faapea atu, "o
le aso, ua tumu ai a'u i le le fiafia, ona o lea ua tulaga faaletonu
le manuia o le malo, talu ai le le faamaoni o fitafita, ma o
le a amata atu faapenei le faasalaga, o fitafita uma lava sa
tiute i le po lea na sosola ese ai pologa mai le nofoaga sa i
ai, o le tutonu o le la i le aso a taeao, o le a fasiotia uma
ai i latou i luma o le malae."
E faia pea...
Faafesootai
le tusitala i le imeli ausage@samoanews.com.
© Osini Faleatasi Inc. dba
Samoa News reserves all rights.
|