Ads by Google Ads by Google

Sa'u Toe Sa'afi mo Faumuina Tagisiaali'i

I le toe sauniga mamalu o le afioga le Senatoa Faumuina Tagisiaali'i i lana Ekalesia Katoliko Roma i Lepua, na toe fa'afofoga ai le mamalu lautele o aiga, o uo ma e masani, ae maise o i latou uma na galulue fa'atasi mai ma lenei tama, i le tele o ona faiva sa tautua punoua'i ai i lona soifuaga atoa, i se molimau a le tina, Jane Agnes Foster Faumuina e tusa o le la'ua mafutaga i le afofa ma le fa'amaoni.

 

"Ou te fa'afetaia le Atua i lana meaalofa taua sa ia foa'i mo a'u ma le fanau, ae maise o lo'u aiga. Ia te a'u, sa ma'ua taumafai e o'o i le 50 tausaga o le ma'ua mafutaga, peita'i, ua faigata le ala, ua faia le finagalo o le Atua, ua na'o le 48 tausaga o le ma'ua mafutaga i le alofa ma le fa'amaoni."

 

Sa ia toe fa'ailoa mai lona agaga fiafia tele, "Ou te vi'ia le Atua aua, o lona finagalo ua le atoa ai tausaga sa ma'ua mo'omo'o i ai, ae au le motusia le ma'ua mafutaga ona o le fili o lenei olaga, ae sili ai ona faigata, aua sa ou le mailoa lava, o lo ua sauni le tama mo lana malaga lenei."

 

I lana tala fa'amama'i, sa iloga ai, na tapenapena lava le Tama o le aiga, "Ua ia matua la'ei lelei, ma ua fesili mo feso'ota'iga tau skype ma tapu'e ata, ua ese mai lona naunauta'iga e fia talanoa mai i le fanau i so'o se mea o i ai i latou. Ua ia tima'i mo i latou ia ola magafagafa ma tapenapena mo le lumana'i, ia to'a'aga e saili le atamai, ma ia tausisi le tagata latou ia a'oa'oina a latou fanau."

 

"O se tasi lea o naunauta'iga i lenei tama, poo le a lava, e naunauta'i o ia e fa'aa'o'oga le fanau, ma e le motusia lona lea fanoga, e fiafia fo'i i sosaiete ma fa'alapotopotoga e auga i le lumana'i o fanau ia auina atu i fafo mo a'oa'oga."

 

Na sauna fo'i le tina, i le tulaga sapaia e le tama o le aiga, o taumafaiga a le fanau, i totonu o a'oga e a'o'oga ai, ma fa'asolo mai i fa'alapotopotoga e tima'ia ai tupulaga mo le ola tauva i ta'aloga ma a'oa'oga fo'i.

 

E tusa o lona soifua galue, "E to'aga tele lenei tama i ona tiute ia fa'atino. E le taitai ona sau i le fale, a'o o i ai se mea e tatau ona auai i ai, e fa'atino ai sona tiute. E ui ina pisi i galuega, ae le tu'ua ai e ia lona fa'amaoni i ona tiute."

 

E 14 lelei sosaiete, fa'alapotopotoga ma Komisi eseese e avea o ia ma totino, ma o se tasi fo'i lea o mea e le mafai ona misia e ia ona fa'atino ai ona tiute tau'ave, ae ese ai lona avea ma Matai o lona aiga. I le tausaga e 1997 na fa'ae'e ai ia te ia le suafa "I Faumuina, ma o le Fa'asuaga lea o le latou aiga i Leloaloa.

 

I le tausaga e 1994 na ulua'i se'ei ai o ia i le suafa "Iulogologo" ma o le failauga o le latou aiga i lena vaitau. Na a'oa'oina o ia i le a'oga a Malisi i Atu'u ma fa'asolo ane ina si'itia e ona matua e a'oga i St Joseph i Lotopa i Samoa. Toe taliu mai e fa'aauau a'oa'oga i Samoana High ae fa'ato'a fa'amae'a ai ana a'oa'oga i Amerika Samoa nei i le tausaga e 1965.

 

Na fa'aipoipo i la'ua ma le tina o le aiga, Jane Agnes Foster o Pago Pago ia Iulai 1, 1966. Na soifua mai o ia i ona matua ia Iuni 8, 1944, ae o lea ua toe sola lana afioga ia Aokuso 22, 2014.

 

O on a matua o Patolo Faumuina i Leloaloa, ae o lona tina o Selapi Lelei si'uao mai Palauli Savaii.