Ads by Google Ads by Google

I’uga o Ta’aloga Kirikiti - Liki o le Sisigafu’a 2017

O se tasi o vaega pito sili ona mataina i fa’agatama Kirikiti…o le taimi o aoga!  Ili le faili a le faiaoga, pule lava oe ma lau taga.  E le gata ina fa’amalosi loto i le au ta’a’alo ae o ni nai ‘commercials’ mo le au maimoa. [ata:  THA]Matua’i opo faalelei aao o lenei alii taalo a le Meaese mai Alofau i le sapoina o le polo.  [ata:  THA]Le au kirikiti a Alii o le Fetulele mai i Tula, sauni atu i le latou ta’aloga ma le Mea’ese i Alofau.  [ata:  THA]Matua’i naunau nai alii o le Sinapati mai Tafuna i le tuliga o le polo. [ata:  THA]
tusia: THA

‘FETULELE’ TULA (2-0) vs ‘MEA’ESE’ ALOFAU (0-2).

O le ta’aloga lenei i le aso Gafua na vaaia ai tamaiti laiti lea ua fa’ata’a’alo mai e le ‘au a le ‘Mea’ese’, e amata ona fa’ata’ita’i aua o lumana’i lea o se nu’u i le kirikiti, o Brian, Iosua ma le tama o Tanielu.

Ma o lo’o vaaia pea le Failauga o le Talalelei Metotisi a Alofau, Faleatua, o lo’o ta’alo mai pea, ma o le tagata lea o lo’o totoe mai lava i le latou ‘au ua masani i le siamupini.

E ui fo’i la e fou tamameamea nei i le ta’aloga, ae sa le fefefe e ta fa’ate’a masau a le ulupo’o a le Fetulele. E le’i tele i se pito le fiafia o le ‘au maimoa e molimauina lea ituaiga fetauiga matagofie e fa’aalia le tomai o i ai i ‘au e lua.

Ma muamua tata le ‘au a le ‘Mea’ese’ i le latou ta’aloga, i le taimi lena, na lelei ai ta a le ‘autata, na o’o loa i le pe lona iva, toe savali ane Sam ma aua’i sa’o mai tua le autata, ona molimauina fo’i lea o le taimi o le toliga vi.

O le afa mulimuli o le latou ‘autata, na ona alu atu lava i luga o le malae, ‘ta’u le feau toe fai se’evae ma ui i tua ma ali’i’, uma loa ia toe savali nofo lelei i lalo’.

Na sui te’a mai le tama o Kasa ia Tanielu, ae sa suite’a mai Fala ia Sam, na o’o loa pe a le Mea’ese i le sefulu, ia na toe ave lea o le galuega i fa’ate’a na amataina le faiva, i le taimi lena ua fa sefulu lua (42 ) ‘ai, ae sefulu pe.

Na vaaia loa le toe i ai o le suiga o le ta’aloga, ua vave pe nai lo o ‘ai, i le iva mulimuli lena na tata, ae maua ai na’o ‘ai e sefulu ma le fa (14), lea na maua ai loa ‘ai e tu’uaofa’i e lima sefulu ma le ono (56) ‘ai.

O le mea e mataina, o le taufetuli a le ‘aulaiti ia i le taimi e tuli ai ‘ai, e pei o le o a tama matutua, ia ou te iloaina, o le fa’amoemoe lava lea a se alalafaga, o alo ma fanau ina ua matutua a’e i le kirikiti, ae lelei lea e fa’ate’a ai le matafefe

Ina ua tulia ‘ai a le Mea’ese e le Fetulele, malie ia o se tasi fo’i o itu e tatau ona maitauina o le ta’aloga, i te’a ia na fa’aaoga e le Mea’ese.

Ua lua ai tausaga o lenei e fa’aaoga mai lava te’a nei, ua amata ona tau i ai si suiga o latou te’a, ua tumau i pa’uuga lelei, toe itiiti ona maua lea o le mea e mana’o i ai.

E manaia a latou masau o le tauau a le isi fa’ate’a, manaia fa’i le faiga o le te’a lemu a le isi, ae pau lava le mea lena i ai, o le le tumau lelei i le pa’uuga, e le’i masani le lima i taimi uma pei o fa’ate’a tuai ia e tete’a mai i isi ‘au.

O le tausaga fou, ua i ai fo’i le suiga o le fa’ate’aga o le polo ma le iloa lelei o le mea lea e mana’o i ai lou mafaufau, o le toaga lava e fai ona tatou o’o lea i le taimi e tali mai ai lou lima i le mea e te finagalo i ai.

O le mea malie ai le taimi na tata ai le Fetulele, e leai nisi na manana’o le ‘au fa’ate’a a le Mea’ese ia leai ni pe laiti fo’i, o le fa’ate’a ia a Tula.

Ae vaai i ai, le talie o le ‘au a le Mea’ese ina ua tata ia le vaega lena o Sam ma Tanielu, e tasi le ‘ai a le ‘ulupo’o’ ae tolu ‘ai a le isi, aua o tama na ta’a’alo i isi tausaga ua tuana’i i le Mea’ese.

Leaga e taumafai mai lava le Mea’ese e puipui o latou ‘ai, ae leaga e le taitai ona lava ai le ‘au a Fetulele i nai tama’i ‘ai e lima sefulu ono (56) na tu’u atu e tuli e le latou ‘au.

Ia e le iloa mai e nai tama mai Alofau, le mana’o a le vaega lea e sauni atu e ta ina ia pe le isi ae se’i o latou o atu i le fia tata.

Ou te fa’alogo atu lava o fai e le ‘au vaega tala a le isi ‘autama lena, “E le iloa e le fa’ate’a le la e pe i le pa’utasi ia lo’u tama ta le la.” Ae va’aia loa le togi mai loa i ai, ae pe tonu lava i le pauuga lena sa fai mai ai.”

E alu ma le fiafia e ta, tasi lava le sasau, ae sapo mai e le ‘aulaiti lea na tutu mai i le polo mamao, sau i le mea lea na nonofo atu ai le komiti, fai atu loa i ai le komiti, “Ia malie ia oe, ona ua pau o le sapo a tamaiti e lelei.”

Fai le tomumu a la’u tama lea ua pe, “Ou ke le iloaiga o kuku mai o le ‘au laiiki lea, fa’apea ‘au ia ai o le la e fesusui ia lakou kiga, ae ou ke le iloa ua uma na fesusui, koe kaoga mai i le kuku mai i o ua vave pe o kagaka.”

O tama ‘ai silia a le Fetulele, o Eliki lua sefulu tasi (21), Roma e sefulu ma le tasi (11) ia ma Fala e ono (6), a’o le to’atele lava na o le ta’ilua ma le ta’i fa ‘ai, ia ae pepe mai i le sapo a le talitua’a.

Le aso fo’i lea na vaaia ai fo’i le mulumu a’e mai i Alofau, ou te masalo ai ua leva na mulumu i latou aoga na fai, ae o lea ua amata ona iloa atu e le ‘inu vaipo’u’ lava le mulumu o le tama o Pago.

Ia to’aga lava e fai, o le ‘au a le too afioaga lea sa gasolo mai ai le ‘aumulumu manaia i aso ua te’a, ia a’o lenei e vaai atu tagata, e le ma’i mai fo’i lou ‘aao i lea taleni.

‘MOSI’ULA’, MASEFAU (1-1) vs ‘EAGLE’, PAGO PAGO (0-2).

O se ta’aloga manaia tele lea na faia i le aso Gafua i le va a Eagle Boys ma le Mosi’ula mai Masefau, e ta lava taimi e tatau ona fai ai lotu o le afiafi, ae la e tau su’e lava le i’uga o le ta’aloga lea.

Na tata muamua le Mosi’ula e maua ifo le pe muamau ua tolu sefulu ‘ai, ia na fa’asolosolo mai lava lea i le 4 pe ae ua o’o ‘ai i luga i le 45, e le’i maua lava le pa’uuga o fa’ate’a, ma le maua oni polo e pa’u latalata mai i le mea lea na tutu atu ai le ‘au polo mamao.

Ia e o’o i le 100 ‘ai, ae fa’atoa 12 le pe a le Mosi’ula. Nas fa’aaoga fo’i lea o le tulafono, a atoa le 100 ‘ai ona tuli loa lea e le isi ‘au. Sa sauni mai loa le Eagle mai Pago Pago latou tulia ‘ai e 100 ae 12 pe a le Mosi’ula.

O le tama ta lelei a le Mosi’ula e 41 ana ‘ai na maua i lena ta’aloga, o le ali’i lea o Main, ma o ia fo’i lea ua tulaga lua nei i le tele o ‘ai na ia taina i lenei tausaga, ae o lo’o sili lava pea ‘ai e 52 na taint e le tama o Pou mai le ’Sea’ula’ i Aoa, tu tolu Uale mai le ‘I’a Vai e 30, ae le’i pe i le latou ta’aloga muamua ma le Mosi’ula. O le fa’asologa lena ua i ai nei mo tama ‘ai silia i lenei liki kirikiti.

Na tata le Eagle, e foliga mai i le va’ai atu a le ‘au maimoa e le taitai ona maua e le Eagle ia ‘ai ia e 100 a le Mosi’ula, aua e savalivali ane pe i le 10, ae fa’ato’a 34 ‘ai i le taimi lena.

A’o le taimi na toe suia ai le aluga o ‘ai, ina ua tata tama ia o Lalau ma Tui, na suia atoa mai ai i’ina le si’isi’i i luga o ‘ai nai lo le mea na sau ai ‘ai muamua.

Ma o le taimi lena i fa’ate’a, ua fiu Vaitogi ma Sililo e te’a ae ua le sa’o i lena taimi, e o’o i le ‘au suite’a o Faresa ma Johhny ua le sao mai i le ‘olo. Ae ua alu atu lava, ona latalata i le 100 ‘ai ae tumau pea pe i le 16 pe.

Na maua e tama o le Eagle le 100 ‘ai, ona ta loa lea o latou ‘ai fa’asili, ae toe lelei mai loa te’a a le Mosi’ula, lena na maua ai le pe mulimuli lava a le latou ‘au atoa loa ia latou pe e 19.

I le taimi lena ua 6:30pm i le afiafi ae o lea e le’i maua lava le iuga o lenei ta’aloga matagofie, a’o le taimi fo’i lena ua o le to’atele o tagata, ona fa’apea e le maua e le Eagle ia ‘ai ia e 100 a le Mosi’ula.

E tele sapo mananaia ia na sapoina uma e tama ia talitua’a i ‘au uma nei, e tuai le pu’e ata o le Samoa News, e fa’apea e le maua, ae emo a’e le ata, e le ‘inu vai lafa’ lava le sapo.

Ina ua toe tata la le Mosi’ula e toe tulia ‘ai fa’asili a le Eagle, e fai la’u tala, o le mea e laki o le pa’u’u o polo, e tolu polo pa’u’u i le talitua’a a le Eagle, a’o polo sa tatau ona maua lelei e le talitua’a.

Ana maua uma polo sapo na, se manu lava e malo latou i le ta’aloga manaia tele i le matamata. MALO Eagle mo le ta’aloga matagofie.

O le ta’aloga fo’i lea na vaaia ai fo’i le fa’ata’a’alo mai o tamaiti laiti mo le Mosi’ula o Tuvalu ma Selu, (e le iloa pe vasega 7/8 uma nei tamaiti, a’o sapo a tama na, pe’i o le o a tama’i ‘taxi’, i le laiti a’o lenei ua ofoina o la malosi e tautua le afio’aga e ala i lea faagatama e tauva ai ma isi afio’aga o le atunu’u.

O tama o le Mosi’ula na ‘ai silia: Main 41, Faresa 7, ma Loi 9, a’o fa’ate’a: o Vaitogi 6 ‘olo, Faresa 1, Sililo 1, ma Johnny 1.

O tama o le Eagle na ‘ai silia: Lalau 18, Tui 7, Lauama 12, Pete 12. O fa’ate’a: Lalau 2, Uini 1.

A maua sou avanoa saili ane se vaipanoa e te maimoaina ai tatou ta’aloga matagofie ma e tatau lava ona e va’ai patino i ai, e te talitonu ai.