E momoli atu le fa’afetai fa’ale’au’au ma le fa’amalo e fa’alelava i le kamupani ua lauiloa i’inei o le Blue Sky Communications, i la outou tautua pea e faia i vaiaso uma, e ala lea i le fa’asalalauina o ‘Tala i Ta’aloga Kirikiti’ i le Samoa News, i aso Lua ma aso Tofi ta’itasi.

O lea e avea ai lou sui fa’atauva’a, e momoli atu ai le leo fa’afetai ma fa’amalo i la outou kamupani i le lagolago malosi mai, e silafia ai e tagata matutua ua le toe o’o mai i le malae kirikiti, iuga o le tatou ta’aloga, e aoga fo’i mo ni fa’amaumauga aloaia o nei ta’aloga i lea tausaga ma lea tausaga.

Atoa ai ma e fiafia e faitau nusipepa, i tulaga ua o’o ai ‘au mai i lea alaalafaga e ala i kirikiti i lenei tausaga, se’i o’o ina maua le ‘au e siamupini mo le 2017, i liki a tamaita’i ma alii.

I le malae i Gagamoe i le vaiaso ua te’a, na iloa ona fa’ato’ilalo ai le I’a Vai e le Pisisami i le aso Lulu, ae toe faiaina fo’i i le latou ta’aloga ma le Seaula mai Aoa, i le aso Faraile.

Ia e fa’apena fo’i le malae i Vaovai, lea na fai ai faiga a le ‘Teine o le Asaga’, i le aso Lulu ma le aso Tofi, ma manumalo uma ai i ‘Teine o le Lupelele’ i le aso Tofi ma le aso Faraile ia Fagaalu.

A’o le aso To’anai na fetaui ai ma siamupini o le 2016, le I’a Vai, o se ta’aloga faigata tele i le taga’i atu i ai, e fai o le pulunaunau mai o le ‘Teine o le Asaga’ a’o le puipui atu fo’i o ‘Teine o le I’a Vai’.

Sa fa’amatala i le komiti i lena aso se tamaita’i e sau mai le Afioaga lea o Aunu’u, fai mai a ia, “Ga makou faufaukua i ai i le ‘au, o malo uma na i isi ‘au e laiti i le vaiaso lenei, e kasi lava le ‘au lea e kulimakaiga e tagata, o le ‘I’a Vai’.”

Ia na fa’aauau mai lava lea o lona fa’amatalaga, “A oukou malo i le aso legei ia Malaeloa, ia ua uma mea uma, e kou ke vaai i ai, o le aso ouke ‘a’au aku ai e kau i Aunu’u; kusa pe oute oki ai, ae ua ea le kou pologa ia Malaeloa…na o le pau lega o sou magaoga, o le magumalo mai lea i Teine o le I’a Vai.”

I’A VAI (5-0) vs. TEINE O LE ASAGA (4-1).

O le ta’aloga e manaia tele lea ta’aloga, e fai o le tutusa uma a ‘au, a’o le finau uma teine na ta’a’alo i lena aso, ua taunu’u ai upu o le atunu’u, ‘Ua malie le papa i Galagala, ua malie le fa’atolotologa tama, ua malie le Faga i Pa’au ua fa’amalo le Faga i Lau.”

Ua fa’amalo le ta’alo fa’atausala, ua fa’amalo le ta’alo fa’atamali’i i itu pele e lua i lona aso manaia, i le lua ta’aloga, ua malie mata i va’ai, ua malie fo’i le maimoa a le atunu’u i le lua fa’agatama.

O le mea e manaia ai, o le tutusa uma talitua’a a nei ‘au e lua, ae fai laititi lava si ‘ese’esega, ona o le laiti o tino o le Asaga, e tamomo’e i taimi uma i se polo pe a alu nei i luga i se ta.

A’o teine o le I’a Vai, e fai atu o le sao i tua i le latou taloto se polo, i le lelei o teine nei e ta’a’alo atu i le taloto.

E manaia uma nei ‘au malolosi e lua, ua alu nei le fa o tausaga, e i ai lava i luga i a’u e su’ega siamupini, o Teine o le Aeto, o le Asaga, o le Pisisami, ma le Fa’asaulala, ma le I’a Vai.

Na tata muamua le ‘au a ‘Teine o le Asaga’, ma na maua ‘ai e 64 ae 19 pe.

Ae na manaia mai lava ia pe a le ‘Asaga’ i le 10 ane pe ae ua fa’ato’a 33 ‘ai, a’o le isi 9 pe, o lena na toe ta mai le Asaga i isi ‘ai, lea na maua ai o latou ‘ai e 64.

E le ma’ima’i fo’i Teine o le Asaga, i le vaai atu loa lava ua misi le polo i le teine na alu atu i ai, ‘oso loa le tuliga o ‘ai, le mea lena na ala ai ona ‘oso ‘ai a le ‘Teine o le Asaga’ i le taimi mulimuli lava.

Na fa’ateia le ‘au a le I’a Vai i le suiga lena ua faia mai e Teine o le Asaga, ae sa manatu lava Teine o le I’a Vai, ailoga e o’o ni ‘ai i le 55, aua e 16 ae fa’atoa 49 ‘ai na maua e Teine o le Asaga.

Ona o ‘au uma nei, e lelei, e te le le iloa mai lava le taimi e ‘oso ai ‘ai, e lelei uma teine ta’a’alo a nei ‘au. Ina ua uma ifo le tataga a le Teine o le Asaga, ua 65 ‘ai ae 19 pe.

Na sauni loa Teine o le I’a Vai mo le tulia o ‘ai nei e 65, a’o le mea lea e leaga ai, e to’atele teine o le I’a Vai, e seasea ona tata i se taimi o ta’aloga, ua maua ‘ai e le I’a Vai i a latou ta’aloga ua maea, e le’i o’o atu i ai le tofiga e ta.

Na masani ona tuli ‘ai le I’a Vai i tele o ta’aloga, e maua a e le isi vaega na tofi muamua ‘ai, ae le’i o’o mai i le vaega lena, e fa’asolo mai i le 15 e o’o i le masaga.

Na o le pau lena o le mea na tau popole i ai le I’a Vai, o teine nei e seasea ona tata i isi ta’aloga, ao lenei o le a fetaui ma Teine o le Asaga.

Na manaia lava le sau o ‘ai i le amataga o le latou ta, e o’o mai i le 10, ua iloa lava le lelei o latou ta. Ina ua sa’o mai le latou fa’ate’a fa’amoemoeina lena o Akape, ua sui ai fo’i le alu o ‘ai ma pe.

Ia o le taimi lena i le faiga o le fa’aluma a Aunu’u, ua maloa ma ua ola mai i taimi lena, i le vaai atu, ua alu le solo pe a le I’a Vai, ua o’o mai ina ua toe 12 ‘ai, ae toe 2 pe a Malaeloa o lo’o totoe.

O le taimi lena ua leai a se pisa mai o le itu lea e tapua’i mai Malaeloa, ua na o le tilotilo ma matamata i le latou ‘autata, ma le latou talitonuga, ua sa’o le te’a a Akape i le taimi lena.

Ia ae tutu mai i luga le masaga a le I’a Vai, o le teine o Mona ma le teine o Tinei.

Na tutu mai le masaga ua toe 6 ‘ai, ia a’o le taimi lena ua fiu fo’i si teine o Akape e fa’asa’o atu lana te’a, ua le toe sa’o lava, a sa’o mai i le ‘olo a Tinei, ae nofo ma ta fo’i lele e pei lava o la e safue lana tama i le fa’alogogata.

E sasau sa’o mai lava i luma o le ‘olo, le mea tonu lena, e seasea ona maua ai ni ‘ai se tele ia latou aoga e faia nei. E tusa lava pe alu ifo i o le te’a, ae sausau lava ia i luma o le ‘olo, le mafuaga lena na malu ‘olo ai.

Na fa’atoatoa lelei lava le ta a le teine o Mona, ua leva fo’i i le kirikiti, ae a maua se te’a i le ta a le tamaita’i, e lata mai fale o Fagaalu i le mea e fai e i ai le ta a lea tamaita’i.

E ta’i tolu a fa’ate’a a Aunu’u i le taimi lena, e aloalo uma mai i le mea e ta atu ai le teine e ta lelei lea o le I’a Vai o Mona, ae taumafai e tape lava si fafine o Tinei.

Ia ae o le taimi a e sa’o atu ai le fa’ate’a ia Mona, e latalata mai fale o aiga Fagaalu i le mea e fai atu ai le polo, na ‘ini’ini malie atu lava ‘ai a Teine o le Asaga, ia o’o loa ina ua toe ta mai e Mona, le lua lena, na tutusa ai loa.

Ia o le taimi lena, ua fa’alogo atu ua leai se pisa mai o le tapuaiga a Aunu’u, ae ua fa’alogoina le pisapisao o le tapuaiga a Malaeloa, ua fiafia uma ua tutusa a latou ‘ai, ua ta’i 64.

E lua ea te’a a Aleluia, e misi ai le ta a Mona, ia toe fa’ate’a mai e Akape, e le pe lava le masaga nei o Tinei. A’e o le toe fa’ate’a mai la a Aleluia ia Tinei, lea na matua’i tago ai loa le teine o Tinei ma ta ma se’e, maua ai le ‘ai e tasi, ina ua o’o mai lava i tua o le ova.

Toe malo ai le I’a Vai i le Teine o le Asaga, i lenei tausaga e 2017, i se ta’aloga matagofie ma le tauva o ‘au uma o lenei ta’aloga mataina, i ‘au uma e lua, I’a Vai ma Teine o le Asaga.

O Teine na ‘ai silia a le I’a Vai: Joella 11, Tina 7, Tauia 7, Sinasaua 7. O fa’ate’a; Fia 4, Lela 4, Tauia 3. Polo sapo: Fia 2, Tauia 2, Kalameli 1, Joella 1, Fitilagi 1.

O Teine o le Asaga: O Eseese 9, Leauma 6, Sia 6, Akape 6, Meilini 4, Nonoi 4, Alisi 4, Bessie 4. O Fa’ate’a: Akape 4, Aleluia 3.

SEAULA (5-1) vs. LUPELELE (3-2)

O le ‘au lea a le Seaula, ‘au a tamaita’i, e iloa fo’i le lelei ma alualu i luma i le latou taumafaiga i lenei tausaga, e le’i fa’ataga o mai fo’i le Seaula, ana leai le fetauiga lea ma le I’a Vai i le ta’aloga muamua lava, se manu e o’o mai i le taimi lenei, ua faigata fo’i le latou o mai.

Na’o le alofa i nai ‘au nei i le vaai mai i ai a le Seaula, e na’o le ‘au fo’i lea a le Teine o le Asaga, o le a latou fa’afetauia maia i le vaitaimi lenei.

O le ta’aloga a Teine o le Seaula ma le ‘au a le Lupelele, na tata muamua le ‘au a le Lupelele maua ‘ai e 62 ae 19 pe, ona o mai lea o le ‘au a le Seaula ma le tulia o nei ‘ai.

Na manaia pea lava le talitua’a a le ‘Lupe’ ae ona o le auta a le Seaula, e gasolo mai e tele i le ‘au ta lelei. O le matua ese lava fo’i le tula’i mai o tamaitai o le Seaula i le taimi nei, e fa’ato’a 13 le pe, ae maua ‘ai e le Lupelele e 62, ona malo ai lea o le Seaula i le latou ta’aloga.

Ta’aloga Lona 3: AETO PAGO PAGO (4-0) vs. NU’UULI (1-4)

O le ta’aloga lea na fa’auma ai ta’aloga i le aso Toana’i i Vaovai, o le ta’aloga mulimuli fo’i lena o le ‘au a le Manulele Tausala, ua fa ai ona faiaina i le aso Toana’i.

E momoli atu le fa’amalo a le Komiti Fa’afoe i lenei tausaga, i le tou sapasapai fo’i o le liki a tamaita’i, le Tofa Tulau’ulu ma le tofa Olomua, ma le ‘au fa’amasino ia Mulipola, Maluia, Mika, Posala ma le mamalu o le ‘au ta ova.

Ia e fa’atofa atu ai i Teine o le Manulele Tausaga i lenei tausaga, ma ia manuia lava la outou taptaiga, ia fa’amanuia fo’i le Atua i taumafaiga a le afioaga i faiva i le tai.

E mautinoa a le tou toe fa’atasi mai e lea tausaga pe tatou aulia, aua o lena ua vaaia le alualu i luma o nai teineiti na e fiafia pea i le kirikiti, e o’o atu i lea tausaga, ua tele le suiga i le tou ‘au.

Ia lea ua tula’i mai le Aeto, Pago Pago, e le’i i ai fo’i se faiaina e le taimi lenei, lea ua tutusa ai ma le I’a Vai, e leai ni faiaina.

TA’ALOGA A ALII I GAGAMOE: ASO LULU

PISISAMI (3-1) vs. I’A VAI (3-1).

I le ta’aloga lea e to’atele tagata sa o atu e maimoaina lea ta’aloga, ona o le Pisisami, e i ai le ‘au fa’ate’a lelei uma tama e pei ona fa’aaogaina e le Pisisami, e lelei fo’i fa’ate’a a le I’a Vai, o tagata ua iloga i lenei ta’aloga.

Ae a tu’u atu i le talitua’a, leai la e numera tasi lava le talitua’a lea e masani ona fa’aaoga mai e le ‘Pisi’, ae o le C le talitua’a a le I’a Vai, o lea la na iloa lelei lava ina ua fetaui i ‘au ia e lua i le aso Lulu.

Na muamua tata le I’a Vai, mea ua ofo ai le ‘au matamata, o ‘ai na maua e le I’a Vai na o le 58, ae 19 le pe.

O le ta’aloga lea na fai ai fo’i e le ‘au tata a le Pisisami le miti mo le I’a Vai, ua foliga mai lava, e fa’atoa 6 le pe, ae maua loa ‘ai e 58.

Ua fiu si tama o Logi, (le tagata te’a lelei, a le I’a Vai, i lena aso) i ana pa’uuga lea e masani ona pe ai le to’atele o tama kirikiti, ae le iloa fo’i e i tatou pe ‘ai ona ua uma fo’i le malosi o lona tauau.

O a’i silia i lena aso a le Pisisami: O Solo 17, Marcus 10. O fa’ate’a o; Ma’o 4, Wesley 2.

ASO TOFI MALAE O GAGAMOE

O le aso lea na fa’auma ai ta’aloga a le Pago Pago, Aeto, ina ua faiaina i le ta’aloga ma le Lega mai i Poloa, o le ‘au fo’i lea a Poloa, ua ta le iloa le mea ua fa’apea ai, le ‘au i le manaia e tele i tama masani o lo’o ta’a’alo mai ai.

Na sau le ripoti a le komiti lea e fa’afoeina le liki a ali’i i le Malae i Gagamoe, na tata muamua e Lega mai Poloa, na maua ‘ai e 101 ae na o le 8 le pe, na tuli loa e tama o le Aeto, ae na’o le 57 ‘ai na latou mauaina, ae 19 pe, ma o lea ua fa’amalolo fo’i Tama o le Aeto i lenei tausaga 2017.

MALAE I GAGAMOE: ASO FARAILE

I’A VAI (3-2) vs. SEAULA (4-0).

E le te’ite’i fua leai se faiaina a le Seaula, le manaia o le latou talitua’a, manaia a latou fa’ate’a Kesse, Farani, ma isi suite’a, o le lelei o le fa’asoaina mai o le fa’ate’a, ma le talitua’a e faifai le fia o’o o polo i luga, ae o mai o lena e fa’atalitali lelei atu lava le talitua’a.

Sa muamua ona tata le I’a Vai, e sili laiti lava latou ‘ai nai lo le aso Lulu, e 58 ‘ai i le aso Lulu, ae 68 nei i le ta’aloga lea ma le Seaula.

Na fai mai ai loa le tama sa matamata i lena aso, “O a’u, ua ou ofo i le fuamoa mai o kagaka ua masagi i legei ka’aloga ali’i, ua ka le iloa po’o le a le mea ua kupu i le lakou a’u ali’i.”

Sa ou fai atu i ai,  “Ua ‘ese’ese fo’i gei aso, o le aso ua piko i Pago Pago ia Nu’uuli ae piko i o ia Fagakogo, o le faiga lava lea ka’aloga o le kirikiki, e ka aku ae vave mai le fa’ake’a, e i ai le kaimi e ka aku ai, ua kuai mai le ke’a..ua tau le lelei foi maka.”

E fai mai e 8 lava a pe a le Seaula, ae maua ‘ai e 68 a le I’a Vai, ma lena ua se’e atu nei le I’a Vai i le lua faiaina, ua tumau pea le Seaula, e le’i i ai se faiaina.