Fa’afetai tele i le fesoasoanai mai o le Kamupani a le Bluesky Communications mo le fa’atupega o lenei tautua e ala i tala tusia ma ata o ta’aloga Kirikiti mo le Liki o le Sisigafu’a 2017, ma o se tautua fo’i e fiafia i ai nisi ina ia mafai ona fa’amauina lelei fo’i i’uga o ta’aloga sa tautiga ai le tele o ‘au a Tamaitai ma Alii i Liki e lua lea e fa’atautaia nei. Fa’amalo le fesoasoani mai i lenei auaunaga.

I le Malae i Vaovai Faga’alu, i le aso Gafua, sa fa’ataunu’u ai le ta’aloga i le va o le ‘au a le I’a Vai mai Malaeloa ma le Pago Eagle Girls mai Pago Pago. O lenei ta’aloga e le’i mama i itu na lua sa tapena mai, aua sa na’o le ta’itasi fo’i faiaina a nei ‘au ae le’i fetaui i le malae i lea afiafi. E ui fo’i ina timuga aso ma matagi, ae ua faapea ai fo’i ona lutaluta le tulaga o mafaufauga ona o le ta’aloga lea, e iloa patino ai le ‘au e au i le sailliga Siamupini 2017 i le Liki Kirkiti a Tama’ita’i. O lea ta’aloga ua fa’amauina e ao ina faia i le aso To’ona’i nei.

Na muamua tâta le ‘au a Pago Pago ma sa laulaututu tagata  tapua’i mai ta’avale ma nofoaga fa’atali pasi, ae maise le tapua’iga mau sa nofoia le fale’ie ma fa’asolo mai ai le au tata ua mae’a lautogia mo le ta’aloga faitaulia lenei.

Peita’i, e ui ina nofo sauni teine o le taulaga, ae sa mataalia fo’i le au fa’ate’a ma le talitua’a a le I’a Vai i lea afiafi. I ai taimi na mataulia ai le o fa’atasi o ‘ai ma pe peita’i, na maua lava ‘ai e 49 ae ua atoa fo’i pe e 19 a Pago Pago.

Ona fesuia’i fo’i lea o foe ma ua aga atu le I’a Vai i le pate ae gasolo ane le ‘au a Pago mo le talitua’a.

Na tutu loa tama’ita’i o le I’a Vai i le pate, e na’o le to’a 5 i latou na pe ae maua ‘ai ma le ‘ai fa’asili e malo ai i latou i lea ta’aloga faitaulia. O lona uiga, ua aga atu nei Pago Girls e ta’a’alo ma Teine o le Asaga mai Aunu’u e saili ai le tulaga tolu ma le tulaga fa o le Liki a Tama’ita’i i lenei tausaga.

O lea fo’i ta’aloga faitaulia ma le finau e matagofie fo’i i le maimoaga, o le a fa’ataunu’uina lea i le aso To’ona’i nei, ma e fatato’a faia pe a mae’a le ta’aloga muamua lea e ivi ai le I’a Vai a Malaeloa ma le Teine o le Seaula mai Aoa. Matauina le matagofie o lea fo’i Liki aua e foliga mai, ua saili lava le malo mai le Falelima i Sisifo, ma le Malo mai le Falelima i sasa’e.

Fa’amalo i ‘au e lua, ua va’aia le tapenaga e le o fa’avaivai, peita’i  e le manumalo uma ni ‘au se lua, o lea lava ua toe o’o fo’i i le fa’ai’uga o lenei liki, i ona toe ta’aloga, ae o lo’o mau pea le to’ovae i le tofa ma le fa’autaga loloto i pulega o ‘au ta’itasi sa aofia ma tauva i le Liki o lenei tausaga.

O tama’ita’i aisilia o le ta’aloga lenei ua tula’i mai ai e tama’ita’i o Kalala mai Pago Pago i ona ‘ai na taina e 9. O le ‘au a Malaeloa sa iloga ai ona ta ele tama’ita’i o Tina ‘ai e 23, ma o le pe lona lua lea i le ta’aloga.

O taaloga a le itupa o Alii, sa tatau ona faia i le malae o Gagamoe i Pago Pago, ua fa’ailoa mai sa tolopoina mai le afiafi o le aso Gafua ona ua le mafai se faiga i le vai ma e le sefe mo ta’aloga. O lea la ua se’e mai ai ta’aloga a tamalolo e fa’aauau i le malae i Faga’alu aua o lea ua tatalia nei le fatato’a faia o ta’aloga Kirikiti a Tamaita’i i le aso To’ona’i o le vaiaso nei.

O le afiafi ananafi lea sa fa’ato’a fa’ataunuu ai le ta’aloga i le va o le Fetulele mai Tula ma le ‘au malosi fo’i a le Seaula mai Aoa. O le e manumalo mai lea iviga mata’utia,o le a fetaui loa ma le Pisisami mai Vaitogi, lea e fa’atalitali mai mo le sailiga o le Siamupini a Tamaloloa 2017.

Ia tau ina ia mau mai le onosa’i i le mamalu o le au faitau, ae afai lava o maua sou taimi avanoa, e sili atu lava le matua pa’au ane i le Malae i Vaovai e maimoa ai i ta’aloga uma o le a fa’atautaia ai i le aso Toona’i a sau nei. O Sailiga Siamupini uma o le a fa’atautaia iina, ma ua tatau lava fo’i ona matua maimoaina nei ta’aloga, tapua’ia lau ‘au e sapaia i lenei tausaga, ma ia maua se i’uva fa’afiafialoto mo oe.