Ads by Google Ads by Google

Tala o Ta’aloga Kirikiti

Se tasi o sapo mataina i le ta’aloga i le va o le ‘au a le Teine o le I’a Vai mai Malaeloa ma Teine o le Lupelele mai Iliili.  [ata: THA]Mate mai la pe na mata le sapo lea?  [ata: THA]Faatumulia le Malae i Faga’alu i ‘au ta’aalo ma le au maimoa i aso uma o le vaiaso.  [ata: THA
tusia: THA

E momoli atu le fa’afetai fa’alelava a le atunu’u ma le fa’amalo fa’ale’au’au i le kamupani o le Bluesky Communications i la outou fesoasoani e tu’u mai pea e ala i fa’asalasaluga o Tala o Ta’aloga Kirikiti o lenei Sisigafu’a 2017.

O lea e momoli atu ai se fa’afetai tele mai le atunu’u i la outou Pulega ma le ‘Aufaigaluega, alofa le Atua pule pule tetele fa’amanuia atu i la outou kamupani, i so’o se mea o le kamupani o lo’o outou faigaluega ai.

Ua amata ona lutaluta le tai, ua finau fo’i ta’aloga, ae atili ona finau ai ma lagona fete’ena’i i le va o Kapeteni o ‘au ta’a’alo ma le Komiti o fa’afoea ta’aloga. Peita’i, ia tofu maua e i tatou uma, le agaga o le filemu. O nei ta’aloga, ua faia ina ia fiafia fa’atasi i le fa’agatama ua loa ona tatou masani ai, ma ola fiafia e ta’a’alo ai, peita’i, a i ai ni fa’afitauli, alofagia e ‘au uma, ia to’a lava le tai i o outou finagalo.

Ua tatou naunau uma i le manumalo, e leai se isi e fia faiaina i le fa’agatama, peita’i, e taumafai fo’i le Komiti, ae le atoa lava ni atu i le ana o lona va’a. Ia malu ave i fale ni fa’ato’atama’i o le tatou galuega fai fa’atasi, ae alofagia, fa’amama mai le galuega mo le tatou Komiti Mamalu, ia matua atu ia te outou lenei galuega i lona atoaga.

FAGAALU (2-3) vs. FEALOFANI (1-4)

Ua atoa nei le 4 o faiaina a le Fealofani, ma ua uma ai a latou ta’aloga i lenei tausaga, i le Liki o le Fu’a 2017. E momoli atu ai le fa’amalo fa’ale’au’au i le Afioaga o Fagasa, o outou paia ma outou sa o le a le o’o i ai se fa’amatalaga, o le ta’oto fa’ai’a o tai loloto.

Malo le ta’a’alo fa’atausala, e manatu o le a toe lalaga mai le tou taleni lea o le kirikiti, o lea ua amata i lenei tausaga, lea e vaaia pea lava le naunau mai o teine laiti ia ae manomia lava le i ai o isi teine tuai e a’oa’oina ina ia lelei mai le isi tausaga ma le taumafaiga.

O le ‘au fo’i a Fagaalu, o lena ua fa’ailoa mai lava i le ulua’i tausaga lenei, o oe lea o le a auai i ‘au tuai, ia tago i ai, a leai, ia fa’atalitali loa i lea tausaga.

Fa’amalo le Afioaga, i le lagolagoina o le ‘Au a le Autalavou, e manaia fo’i lena ua i ai se mea e o atu i ai i afiafi faiso’o, ona o lenei mea e leai se mea e fai ai le tou aoga, aua o lea e fa’aaoga le malae i le ta’amilosaga.

Fa’amalo le ‘autalavou i la outou lagolagosua i le ‘au a teine, ua va’aia le to’atele o le tapua’iga ma ua i’u manuia fo’i le alofaiva o tamaita’i ona ua to’atele le tapua’iga mai le afio’aga.

TEINE O LE ASAGA (5-1) vs. MOSO’OIPALA (2-3)

O le taimi lenei ua le toe manana’o lava a le Teine o le Asaga i ‘au ae fa’alavelave mai, aua o lea ua toe maua le avanoa i luga, i ‘au o le a su’e Siamupini 2017.

O le ‘au lenei e leai lava se ‘au e lavea ai le alu ua oso ai le Asaga a le taimi nei, ua atili ai le lelei o fa’ate’a fa’atasi ai ma le ‘au ta, ua lelei fo’i le talitua’a.

Ae vagana ni polo e sapo tamo’e, ona maua ai loa i le fa’ailoga fesili, a’o le tele lava o polo e maua mai e le talitua’a. Manaia fo’i a latou mulumu, e le fa’ama’ima’i lava a latou mulumu, ma o le isi mea e manaia ai, o le vae moemoe o ‘taxi’ laiti na e polo mamao.

Ou te le iloa pe o fai ni koleniga fa’apitoa i le palapala mimiti, lea e o mai ai i le malae ta’alo, pei a o a le 7 a South Africa le mea e oo i ai le tamomo’e a le vaega lena, e tiga ona ‘ili atu le faaili ua uma se ta’aloga, ae o le la e o ma le atoa.

Malo ta’a’alo fa’atamali’i, o le mea manaia lava o lena e ia te outou le taleni o le kirikiti. Ia fai pea i lenei taimi semanu o outou talavou.

Toe lava o le Seaula, lea e fa’atalitali mai ia te outou, e fa’ato’a iloa lava le auro i le afi, ia manuia la outou ta’aloga o loma nei, ia maua fo’i e outou se ta’aloga manaia i le matamata i le tou fetauiga ma Aoa.

MOSIULA (4-2) vs. AGA O LE PE’APE’A (2-4).

O se ripoti mai a le ta’aloga fa’auma a le Mosiula ma le Aga o le Pe’apea’ lea na tuua ina ua po le aso na ulula’i faia ai le la fetauiga, o lea na tata muamua ai tama o le Aga o le Pe’ape’a, maua a latou ‘ai e 100 ae 16 pe, ona tuli loa lea e le Mosiula, e 80 ae 12 pe, ona tu’u ai lea fa’apena.

O lea la na toe fa’auma i le aso Lua, ma ta ai ‘ai e le Mosiula, maua le 100 lena, ona toe ta fo’i la’ia o latou ‘ai mama, lea e maua ai le 37.

Ia ae tuli loa e le tama o le Aga o le Pe’ape’a, ma e maua a latou pe, ae le’i taitai ‘ai a le Mosiula ona maua. O lea la ua manumalo ai le Mosiula i lea ta’aloga.

O le ‘au lea fa’atoa toe o mai i lenei tausaga, o le Aga o le Pe’ape’a, ae leai lava se mea o leaga ai, o le toe o’o mai i le tausaga fou, ua tele fo’i se suiga, manaia fa’ate’a, lea e lelei fo’i le ‘au ta, toe lava o le talitua’a lena e masani ona tau fa’aletonu mai i isi ta’aloga.

Ia ua totoe nei o ‘au e masani ona o i le su’eina o ‘au e su’e siamupini, o lea e le toe fa’atamatama manatu i sauniuniga o ‘au uma o lo’o totoe nei.

E le toe ta’alo fa’a’ole’ole se isi, e tau fai finau lava le tagata ia, o le ta’aloga lenei o le kirikiti, o le vaai lava, e mautinoa lava tagata e lelei i le ta’aloga, i le taimi e ta mai ai.

E tau mafaufau fo’i le fa’ate’a i se faiga e fai ai le tagata ua masani leleii le kirikiti, e lelei lana ta, e ta tapoto fo’i. Ae le iloa lava le se’e ia, e le talanoa fo’i ma le ta pasi i luga ae fo’i mai, pei o le fa’ataliga o le Tupu Tonga le fa’ataliga o le polo e sapo lelei.

ASO LUA: FETULELE (4-1) vs. I’A VAI (4-2).

O se ta’aloga na mili pe ma ‘ai i le amataga, se’i o’o i le pe lona 7, ae ua 18 ‘ai, o i’ina la na sau ai loa ‘ai i luga, e o’o i le 10 pe ae ua 41 fo’i ‘ai.

Na amata lava ona finau le kapeteni a le I’a Vai, o Nu’utofia Seigafo ma le fa’amasino, le Aoao Fesoasoani o Mui, i le pe a le isi tama ta a le I’a Vai, ae ua lelei mai lana ta.

Ae tau le polo i le ‘ulu, ae sapo atu i tua e le mulumu, fa’ailoa mai e le fa’amasino, ua pe. Na umi le taimi o fai le finauga, aumai i le fale o le komiti, e leai lava se fa’ai’uga, o le tama ua pe.

E o’o mai i le taimi nei, e leai se mataupu e avatua i le komiti, e fa’apea ua toe suia ai le kolo a le fa’amasino, e ‘au lava le komiti i le mea lea ua kolo e le fa’amasino.

E le’i toe maua se tonu lelei, peita’i, ua foa’i le manumalo e le afioga Toilolo Ekueni i le afio’aga o Tula ona ua faifaitetele le finauga a le Kapeteni o le I’a Vai ma le Fa’amasino o le ta’aloga. Peita’i, e le o toe fa’atamala lava tagata uma nei, aua a le finau fo’i Kapeteni, ua faigata ona iloa mai e ana tama ta’a’alo, o lo’o manatu o ia i le mea sa’o ma tulafono e ao ina fa’amalosia, ia le sasi lava se mea e aga i ai le ta’aloga.

Ua mae’a teuteuina mea uma, ua auai mai fo’i sui o le afio’aga i le fonotaga i le Ofisa o Mataupu Tau Samoa, ina ia teuteuina mea uma, ia le fa’aletonu lava le liki o lenei tausaga. O le a fa’alauiloa mai se fa’ai’uga patino o i ai, pe ua tamau lava le fa’ai’uga na fofoga i ai le tamali’i o Malaeloa i le Komiti, pe ua suia fo’i.