Tumau Talita "Ali'i A " i le Sinapi & Annex Boys taofi pea talita "Alii B"

O ta'aloga o le aso To'ona'i na te'a nei, Setema 30, na fa'amaonia ai le malosi o le puipuiga a le Sinapi A i le talita, aua ua toe u'umau fo'i e i latou le talita o le  Ta'amilosaga Volley Ball a "Alii A." Peita'i o Setema 23, na fa'ato'a malolo ai le "Tanoa A" i le "Sinapi A" ma latou se'ia ai le talita talu mai le amataga o le liki, sa u'umau lava e le "Tanoa A Team."

Ua toe milo mai nei le "Tanoa A" i le fa'asologa o le ta'amilosaga ma e o'o lava fo'i ina toe o'o mai e saili sona avanoa e lu'ia le "Talita Alii A" ae le'i mae'a le ta'amilosaga volleyball lenei.

Mai le ta'amilosaga "Ali'i B Teams" o lo ua fa'aauau pea ona umia le talita e le "Annex Boys" mai Fagatogo ma o lo'o i ai le fa'amoemoe maualuga o le latou Fa'atonu, "Talosia lava ae tumau ai pea le finau mai o si matou 'au laiti lea! Ae le faia se loto, o le malo lava latou e se'e, ae o le fai uso e tumau lava, e pei o le upu masani a tamaiti o lenei fo'i faiva!"

O isi ta'aloga sa fa'atautaia na amata mai ai le isi malae i ta'aloga a Tama'ita'i ma sa tatala malae ai le 'au a le CTR na fetaui ma le 'au malosi a le Pala, na malo ai lea o le Pala Team. O le Measina sa fetaui ma le 'au a tama'ita'i a le Tanoa ma sa manumalo ai le Measina. O le Mizuno sa fetaui ma le au a le Sons ua manumalo Mizuno. Ae o le ta'aloga mulimuli a tama'ita'i All4 One sa fetaui ma le BTI ma ua mau fo'i le talita i le BTI.

O ta'aloga a 'au "Ali'i U19" sa fetaui ai le 'au a le Breakers ma le Annex, lea sa manumalo le Annex. O le 'au a le Laumuatasi mai Pago Pago na fetaui ma le Usos, ma ua manumalo ai le Usos.

O le ta'amilosaga a le "Alii B Teams" na ta'a'alo ai le 'au a le Ali'itaoso ma le 'au a le Tama Samoa Moni, na manumalo ai le 'au a le Tama Samoa Moni.

O le ta'aloga i le Talita a le Alii B, sa fetaui ai Annex sa mau ai le talita ae lu'ia mai e le Uso, ua toe mau pea le talita i le Annex Boys.

O ta'aloga faitaulia a le "Alii A Teams" na muamua ai tatala malae le ta'aloga a le Uso ma le Tama Samoa Moni, ua malo ai le Tama Samoa Moni. O le fetauiga a le Ali'itaoso ma le Fagatogo Pride, ua malo ai fo'i le Fagatogo Pride.

Laumuatasi sa fetaui ma le Tanoa, ua toe suipi fo'i le Tanoa i le ta'aloga lea. E le'i o'o le ta'aloga i le va o le Sons ma le Puataunofo, ae soso'o loa ma le ta'aloga i le va o Amouli A ma le No Mercy ma sa malo ai le Amouli Youth A.

O le West Point sa fetaui ma le Sinapi, malo ai le Sinapi ma o i latou lea sa mau ai le talita.  Ona toe fa'aauau lea o taaloga mo le ta'amilosaga lava a le Alii A ma toe faia ai le ta'aloga a le Pioneer na fetaui ma le Sons ma sa suipi ai le Sons i lea fetauiga mataina.

O le 'au a le Ali'itaoso na fetaui ma Amouli Youth A ma sa malo ai  Amouli Youth. O le ta'aloga fo'i i le va o le Tama Samoa Moni ma le 'au malosi a le Tanoa, ua toe malo fo'i le Tanoa Team i le lua seti. O Fagatogo sa fetaui ma West Point, ma ua malo ai West Point ae o le Uso sa fetaui ma le CTR ua malo ai le CTR i seti e lua.

O le Laumuatasi na fetaui ma Annex ma malo ai fo'i tama mai le Annex i lea fetauiga. O le ta'aloga loa o le Talita na fetaui ai Sinapi o lo'o umia le talita ma le No Mercy, ua toe mau pea le talita a le "Alii A" i le Sinapi A.

Nisi o tala i taaloga volipolo, o le taeao ananafi sa foai ai e le Peresetene o le Asosi Volley Ball i Amerika Samoa, ASVBF se meaalofa mo le a'oga maualuga a VocTech High i Nuuuli ma sa talia ma le fiafia e le susuga le Pule A'oga Mrs Alofagia Young Alopopo, fa'apea le susuga le Faia'oga o Ta'aloga i lea aoga Mr. Alvin.

O polo nei e lua fa'atasi ai ma le a'oa'oga fa'alelei o le ta'a'alo a le fanau i le latou piliota muamua lava mo fa'amalositino po'o ta'aloga, sa fa'aaogaina e le sui o le DOE Talataina Valusia, Pona Ale ma Ben Sauvao o le ASVBF, e fefa'asoai ai ma le fanau ina ia filiga e ta'a'alo i le Volley Ball a'o taumafai ai i a'oa'oga maualuluga.

"O le aoga fo'i o le lelei o lau ta'alo i lenei ta'aloga, e masani ai lava i tatou uma i le Volley Ball, lona lua e aumalolosi o tatou tino e mafai ai ona fa'atauva, ae fafao atu loa ma le lelei o lou mafaufau i le fa'agaoioiga o le polo ma le sa'o o lou poina o le polo, o oe ua agava'a. mo le tausinioga i Kolisi ma Iunivesite,” o se tima'i fa'afaia'oga lea a le ali'i Peresetene o le Asosi, Ben Sauvao i le vasega 9 sa i le malae i le ulua'i piliota o le a'oga.

"O se lu'iga fo'i lenei va'aiga fa'amomoiloto ua va'aia ai le fanau a'oga maualuluga, o lo'o taumafai e tauva fa'atasi ma isi a'oga ua lelei faleta'alo e a'oa'o lelei ai, ae o lea e fa'atimu pe fa'ala i latou. O afea ea o le a faia ai se faleta'alo mo le Voctech?”, o le fesili lea a nisi o sui o le asosi volipolo sa auai atu e maimoa ma fesoasoani i le pasiga polo na fa'aa'oa'o ai le fanau aoga i ituaiga pasiga o le polo e mo'omia ona utagia e maua ai 'ai ae le pe ai le polo.

Ua lu'ia fa'atasi le vasega o pule ta'aloga a le DOE, le pulega o le VocTech ma le fanau a'oga, ae maise fo'i o le Asosi ina ia taumafai e una'ia se mau e fa'atula'i ai se faleta'alo mo le A'oga Maualuga o Matata Eseese.

Comment Here