Ads by Google Ads by Google

TALA MAi SAMOA

FA’AITIITIA AOFA’I TAGATA A’AFIA CHIKUNGUNYA

 

I se ripoti a tu’uina mai e le Pulesili o le Soifua Maloloina, susuga Dr. Leausa Take Naseri i le vaiaso nei, ua fa’amaonia mai ai le fa’aitiitia o le aofa’i o tagata ua a’afia i ‘auga o le fa’ama’i o le chikungunya, lea e pei ona fa’amauina i le vaiaso nei le to’a 76 o i latou sa saili togafiti i le falema’i i Moto’otua, pe a fa’atusatusa i le toa 330 sa i ai i le masina o Novema ma fa’asolo mai ai ia Tesema.

 

Talu ona amata pipisi mai lenei fa’ama’i ia Iulai 2014, e tusa ma le to’a 4,289 le aofa’i o tagata Samoa ua fa’amaonia le a’afia, tusa lea o le 2.3% o le faitau aofa’i o le atunu’u. E ui o lea ua faamaonia mai le fa’aitiitia o le aofa’i o tagata Samoa ua a’afia i le gasegase lenei, ae o lo o faaauau pea fuatuaga ma lapataiga ina ia tausisi pea i puipuiga masani ua mae’a ona tu’uina atu, ina ia fa’aauau pea le fa’aitiitia o le aofa’i o tagata e a’afia i lenei fa’ama’i.

 

TETE’E MALO TU’UAIGA UA FA’ATAU SAMOA AGA’I SAINA

 

O le vaiaso nei na tu’uina mai ai e le Failautusi o le Kapeneta se faamatalaga tusitusia mai le afioga i le ali’i Palemia o Samoa ia Tuilaepa Lupesoliai Sailele Malielegaoi, e teena ai ni fa’asalalauga ua faia e le Vaega Fa’aupufai a le Tautua Samoa e fa’apea, ua fa’atau atu e le malo ia Samoa i le atunu’u o Saina. Na taua e le malo e fa’apea, afai e usitaia e le malo le fa’afinauga a le Tautua Samoa, i le aua lea ne’i aofia Samoa i fefa’atauaiga ma malo i fafo, lona uiga o le mea moni, e le gata e le maua ni galuega fou mo tagata Samoa, leai ni suiga tetele i le atunu’u, leai fo’i se lumana’i manuia e maua e tupulaga lalovaoa.

 

Na taua e le malo e fa’apea, e le o taumafai le faigamalo e fa’atau atu Samoa ia Saina, ae o lo o faia e Samoa gaioiga o lo o faia fo’i e isi atunu’u o le lalolagi, o le inivesi lea o ana tupe ma le tamaoaiga i atunu’u tetele toe tamaoaiga o le lalolagi, ina ia maua mai ai ni fa’amanuiaga, galuega, atina’e atoa ai ma suiga fou mo lona atunu’u. O lo o fa’avae tu’uaiga le moni a le Tautua Samoa e pei ona finau le malo, i taumafaiga a le faigamalo e aumaia atina’e tetele mai Saina e fausia i Samoa, e le gata i pisinisi ae o le nono mai o tupe e faatupe ai atina’e ma galuega tetele i le atunu’u.

 

Na toe fa’atepa e le alii Palemia auala fo’i lava ia e tasi o lo o faia e Niu Sila ma Ausetalia, o le tatala lea o le avanoa e ulufale atu ai tagata mai atunuu eseese e aofia ai le Pasefika ma Samoa, e saili manuia ma nonofo i totonu o la atunu’u, e le gata e saili ai manuia mo i latou ae manuia ai fo’i o la malo.

 

UMA PUSA ONOSA’I O ALI’I MA FAIPULE TA’ELEFAGA

 

O le vaiaso nei na tasi ai le filiga i le pulega a ali’i ma faipule o le afioaga o Ta’elefaga i Fagaloa, ina ia ta-pe loa le afi o le fale eletise o lo o fa’atu i totonu o le afioaga, ina ua fiu le afioaga e fa’atali se tali mai le Pulega o le Eletise ma le Suavai (EPC), mo se fesoasoani i le manogi leaga o le suavai o lo o maua mai i le afi o lo o gaosi ai le eletise o lo o mumu ai le atu Fagaloa.

 

Na taua e le fofoga o le afioaga ia Leuta Sialafau Valoaga faapea ai le Tuua o le nuu ia Fuiavailili Masani Leiataua e faapea, o le faaiuga a le nuu e ta-pe le afi o le fale eletise, e le o se isi lava mafua’aga, ae o le naunau ia tausia le soifua maloloina o tagata o le nu’u, ina ne’i avea le fa’aauau pea o le manogi leaga o le suavai ma itu e a’afia ai tagata o le nu’u i ni fa’ama’i matuia ma le leaga i le lumana’i.

 

Ua silia i le 2 tausaga o taoto le talosaga a Ta’elefaga i le EPC, ina ua maitauina le a’afia o le gataifale o le afioaga i le malosi o le vailaau ma le manogi leaga o lo o maua mai i le suavai lea e gaosi mai ai le eletise i totonu o le fale a le EPC, ina ua vaaia le lanu enaena o le aau ma ua maitauina fo’i le mamate ai o ‘amu o lo o fa’alagolago i ai le ola lelei o i’a ma figota o le sami. Na o o lava i le alii Palemia sui o le afioaga mo se fesoasoani, peita’i o le itu e fa’anoanoa ai e leai lava se fesoasoani na aua mo i latou.

 

TOLOPO MATAUPU FA’ATONU NUSIPEPA SAVALI

 

O le aso Gafua o le vaiaso fou, Ianuari 26, 2015 lea ua toe tolopo i ai le iloiloga a le ali’i sa avea ma Fa’atonu o le Nusipepa a le malo, Le Savali, afioga Tupuola Terry Tavita, ina ua talia e le fa’amasinoga maualuga i le vaiaso nei se talosaga na fa’aulu e le itu a le malo, mo se avanoa e toe tolopo ai lenei mataupu ae se’i fa’amautu a latou ripoti ma moliaga o lo o tu’uaia ai Tupuola.

 

E na o le tasi le moliaga lea ua fa’alauiloa e le loia a le malo ia Rexona Titi mai le Ofisa o le Loia Sili ua mae’a ona faila fa’asaga ia Tupuola, o le moliaga o le taumafai lea e fa’amalosi se tama’ita’i. O le masina na te’a nei na tula’i mai ai le fa’alavelave e pei ona tu’uaia ai Tupuola, e mafua mai ina ua faila e se tama’ita’i sana tagi i le ofisa o leoleo fa’asaga ia te ia, i lona taumafai lea e fa’amalosi o ia.

 

O le tama’ita’i loia ia Diana Roma o lo o tula’i mo Tupuola, lea fo’i na auai i le taimi o lana iloiloga i le vaiaso nei.

 

fa’aliliu: AF