KALENA MATAUPU FA’AMASINOGA APILI

E 6 mataupu ua mae’a ona fa’atulaga e iloilo e le Fa’amasinoga Apili pe a tauaofia i le aso 23 Aperila, 2014.

O le ulua’i mataupu e i le va o le malo o Amerika Samoa ma le kamupani Inisiua a le Progressive Insurance Company,

O isi mataupu e aofia ai le mataupu i le va o le ‘Co Pago Pago Ltd,’ mataupu i le va o Eliota Siaumau Sr ma le malo; Avamua Dave Haleck ma le malo, ma mataupu savili e lua i le va o August Viena ma le Ofisa o le alii kovana ua mavae atu ia Togiola Tulafono atoa ai ma le Fa’atonusili o le Matagaluega o Tagata Faigaluega a le malo, ma le mataupu mulimuli i le va o Aiono Magalei ma le Ofisa o Lesitala.

O ali’i fa’amasino e to’alua mai fafo ua fa’atulaga e malaga mai mo le iloiloina o mataupu apili, o Justice Tashima ma Justice Pregerson.

O le a fesoasoani i le iloiloina o nei mataupu le afioga i le fa’amasino sili ia Michael Kruse ma isi ali’i fa’amasino o le fa’amasinoga e aofia ai ma afioga i Fa’amasino lagolago.

ARTHUR ‘AFA’ BLAKE

E lua vaiaso lea ua toe tolopo i ai le mataupu i le va o le malo ma Arthur ‘Afa’ Blake, ina ua faailoa e le loia a Blake ia Douglas Fiaui i luma o le fa’amasinoga maualuga i le aso Faraile na te’a nei, lona tauaaoina o le ripoti mai le Foma’i e tusa ai o se su’esu’ega sa faia i le tulaga o lo o i ai le malosi o le mafaufau o Blake, i le taimi e ono fa’ataunu’u ai sona fa’amasinoga autu.

Ina ua valaau le mataupu a Blake i luma  o le faamasinoga maualuga, sa talosagaina ai e Fiaui le toe tolopo o le mataupu mo se isi lua vaiaso, ina ia maua ai le avanoa la te talanoa ai ma Blake e fa’atatau i le ripoti a le foma’i, lea fo’i sa talia e le fa’amasinoga.

Na faailoa e Fiaui e fa’apea, e tusa ai o se fautuaga mai le ali’i foma’i sa gafa ma le suesueina o le mafaufau o Blake, e mana’omia le toe faia o ni isi suesuega atili i le tulaga o lo o i ai le malosi o le mafaufau o Blake.

A’o le i talia e le faamasinoga le talosaga a Fiaui, sa fesiligia le loia a le malo ia Tony Graf, po o fea tonu le itu lea o lo o aga’i i ai le mataupu a Blake, ae na tali le ali’i loia, o lo o fa’agasolo pea feutanaiga ma le isi itu e tusa ai o se taunuuga lelei o lenei mataupu.

O Blake o lo o tuuaia i le solitulafono mamafa o le fasioti tagata i le tulaga muamua, ona o le fa’alavelave lea na maliu ai Lopeti Lihua Veukitau i le aso 23 Iuni 2013 i Iliili, e pei ona tuuaia ai o ia i lona fa’aaogaina o se tolopa e sasa ai Lihua seia oo ina maliu o ia.

Na fa’ailoa e faamasino sili  ia Michael Kruse i le loia a le malo i le isi iloiloga o le mataupu lenei sa faia i le masina na te’a nei, afai e oo mai i le aso Faraile na te’a nei e le i tauaao lava e le ua molia ma lana loia se ripoti mai le foma’i e tusa ai o le su’esu’ega sa mana’omia, o le a solofua loa e le fa’amasinoga lenei mataupu.