Ads by Google Ads by Google

Taumafai malo foia fa’afitauli i vailaau fa’aaoga toga laau’aina

Ua i luma nei o le Fono Faitulafono se tulafono sa talosagaina e le ali’i kovana, e fa’atulaga ai le malosi o vailaau e fa’aaoga i fa’atoaga o toga laau‘aina, ma foia ai le fa’afitauli o lo o maitauina pea le a’afia ai o toga laau‘aina i le atunu’u.

 

O lenei tulafono tau fa’aofi, e le gata e aiaia ai ituaiga vailaau e fa’aaoga e le aufai fa’atoaga toga laau’aina, ae fa’atulaga ai fo’i le tele ma le malosi o le vailaau e mafai ona maua i totonu po o luga fo’i o le fualaau’aina o lo o fa’atau atu i totonu o Amerika Samoa.

 

I le fa’atomuga o lenei tulafono o lo o taua ai e fa’apea, e le i mamao tele atu sa tele ai fa’asea mai ni isi o le atuu’u e fa’atatau i le tele ma le malosi o le vailaau o lo o fa’aaoga e tausi ai fua o fa’atoaga o lo o fa’atau atu i le polokalama o taumafa mo fanau aoga a le malo (School Lunch Program), aemaise ai fo’i isi fua o fa’atoaga o lo o fa’atau atu i le lautele o le atunu’u.

 

O le tulafono o lo o i ai, e le o fa’atulaga mai ai le malosi ma le aofa’i o le vailaau e tatau ona maua i totonu o so o se fua o fa’atoaga.

 

E ui o le tulafono o lo o fa’asa pe fa’atupula’a mai ai le fa’aaogaina o vailaau, ina ia tusa ai ma le tulafono a le feterale i vailaau e tape pe fa’amamate ai manu nini’i, limu, isumu, po o isi lava fo’i manu fa’alafua, o le mea moni, e le o i ai ni a tatou mea faigaluega po o ni auala e fua ai le saogalemu o mea taumafai mai vailaau o lo o fa’aaoga e tagata fai fa’atoaga e tausi ai a latou fa’atoaga.

 

O le teuteuga la o le tulafono e pei ona taoto i luma o le fono faitulafono i le taimi nei, o le a fa’aaoga ai le maga o le tulafono ‘40 CFR 180’ a le feterale, e fai ai ma ta’iala e tatau ona usitaia e le aufai fa’atoaga uma o lo o fa’aaogaina vailaau e tausi ai a latou fa’atoaga i le atunu’u.

 

E le o aofia ai i le teuteuga lenei o le tulafono le matafaioi a le Matagaluega o le Soifua Maloloina, latou te sailia ai taumafa ua a’afia i vailaau, peita’i o le fa’amoemoe autu, ia avea le tulafono lenei ma ta’iala mo le Matagaluega, ia latou mautinoa ai o lo o tausisia pea i totonu o le teritori auala e fa’aaoga ai vailaau o lo o tausi ma teu ai fa’atoaga fualaau’aina a le aufai fa’atoaga.

 

Na taua e le Fa’atonusili o le Matagaluega o Fa’atoaga a le malo ia Lealao M. Prucell i le amataga o le masina nei, o le tulafono lenei o le a mafai ai loa ona galulue le ofisa o fa’atoaga e saili tagata fai fa’atoaga o lo o latou soona fa’aaoga vailaau e tausi ai a latou toga laau’aina, e sili atu ma le malosi fa’atulafonoina.

 

“O le fa’afitauli tele o lo o tula’i mai i le tele o taimi, o lo o tele pea fa’asea mai ni isi o le atunu’u i le masalomia lea o le soona faaaoga e ni isi o tagata fai fa’atoaga o vailaau e tausi ma faa failele ai a latou fa’atoaga, ae mafuli lava i tagata fai fa’atoaga mai Asia, o le taua la o le tulafono lea ua fuafua le malo e fa’aulu, o le a mafai ai ona taofi le toe tula’i mai o lenei fa’afitauli”, o le saunoaga lea a Lealao i le Samoa News i le lua vaiaso na te’a nei, a o lumana’i ai le fa’auluina o lenei tulafono i luma o le fono i le vaiaso nei.

 

Na fa’amanino e Lealao e fa’apea, e a’afia le soifua maloloina o tagata pe afai e ova le malosi o le vailaau e tu’u i totonu o le fualaa’aina, o le mafua’aga fo’i lea e ala ai ona tele fa’asea mai ni isi o le atunu’u, i le lapopo’a ese o tino o ni isi o fualaau’aina e pei o kukama, kapisi ma isi lava fualaau’aina ua masani ai le vaai a le atunu’u.

 

Na taua e le ali’i kovana ia Lolo Matalasi Moliga i le ripoti a le malo lea ua tauaao e le Fono Faitulafono e fa’apea, o suiga e pei ona taumafai le malo e fa’aleleia i le itu tau fa’atoaga, e le gata ia ausia ai ta’iala o lo o aiaia mai e le polokalame o taumafa mo fanau aoga o lo o fa’atupe e le feterale, ae o se auala fo’i lea e fa’aleleia ma fa’amautu atili ai tulaga o fa’atoaga i le teritori.

 

O le itula e 8:00 i le taeao nei lea ua fa’atulaga e faia ai le iloiloga a le komiti o Fa’atoaga a le Senate, mo le talanoaina o ni isi o mataupu e fa’atatau e fa’atatau i tulaga tau fa’atoaga, e aofia ai ma le tulafono taufa’aofi lenei.