Ads by Google Ads by Google

Tele aafiaga falema’i pe a taofi le lafoga o totogi 2%

Na taua e le Pulesili o le falema’i o le LBJ i luma o le Komiti o le Soifua Maloloina a le maota o sui ananafi, e matua tele le a’afiaga o le itu tau tupe a le falema’i, pe afai ae aveese le lafoga o totogi e 2% o lo o maua atu i le malo.

 

O lea saunoaga mai le tofa a Taufete’e John Faumuina, o sana tali atu lea i le fesili na fa’atula’i e le tama’ita’i faipule ia Vui Florence Tuaumu-Saulo i le taimi o le iloiloga, i se a’afiaga o le itu tau tupe a le falema’i pe afai e taofi le lafoga e 2%.

 

Saunoa le afioga a Vui e fa’apea, ua i ai ni isi o lona itumalo ua talatalanoa atu ia te ia, e fa’atatau i le tatau lea ona taofi le lafoga lenei.

 

“O la’u tala sa’o lava sa fai i le ali’i kovana, e aveese loa le lafoga e 2% ona tupu loa lea ma le fa’alavelave i le falema’i”, o le saunoaga lea a Taufete’e i luma o le komiti.

 

O tupe o lo o maua atu e le falema’i mai i le malo mo le lafoga e 2%, o le 50% o lo o fa’atupe ai le polokalame lea e ave ai gasegase i fafo mo togafitiga, ae o le isi 50% o lo o fa’atupe ai galuega fa’atino a le falema’i.

 

O le fa’afitauli tau tupe e pei ona taua e Taufete’e, na mafua mai ina ua tulai mai se fa’aletonu i le paketi sa pasia a le falema’i mo le tausaga tupe lenei 2015, ina ua pasia e le Fono Faitulafono le aofa’i e $52 miliona, ae emo ane le ata e na o le $40 miiona le tupe o lo o mafai ona maua, ae o le $12 miliona ma ona tupu sa fa’alagolago e maua mai i le polokalame a le Medicaid, e le mafai ona maua mai i le taimi nei, sei vagana ua fa’atino ni isi o vaega e tusa ai ma aiaiga o le polokalame, ona fa’atoa maua mai lea o le vaega tupe lea.

 

Na fa’amanino atili e Taufete’e i luma o le komiti e fa’apea, o lo o fesoasoani malosi le lafoga 2% e totogi ai pasese o gasegase o lo o auina atu i fafo mo togafitiga, e ui ua le toe maua se fesoasoani e totogi ai ma pili o le falema’i, ona o tulaga fa’aletonu ua i ai le itu tau tupe a le falema’i ma le malo.

 

Na fesili ni isi o faipule pe aisea ua le toe mafai ai ona totogi e le falema’i pili mo togafitiga o gasegase o lo o auina atu i fafo, ae na saunoa Taufete’e e fa’apea, pau lea o le malosi o lo o mafai ona gafatia e le falema’i i le tupe o lo o maua, e na o le pasese lava o le gasegase faapea ai le sui o le aiga e fesoasoani i le gasegase.

 

O gaseasse uma lava o lo o agava’a i le polokalame a le medicare e pei ona saunoa Taufete’e, o lo o ave i Hawaii e togafiti ai, ae o i latou e le agava’a i le polokalame lea, o lo o fautuaina e aga’i i Niu Sila mo togafitiga, e lelei fo’i foma’i ma le tautua o lo o maua ai.

 

I le ripoti a le malo sa tufatufa atu i le Fono Faitulafono i le lua vaiaso talu ai, o lo o taua ai e le alii kovana ia Lolo Matalasi Moliga se tasi o fuafuaga a le malo ua i ai, i le fa’auluina lea o se pili e fa’amuta ai le tulafono na pasia e le Fono i ni nai tausaga ua mavae, e tu’u atu ai le lafoga e 2% e fesoasoani ai i le falema’i.

 

O le agaga o le ali’i kovana, o le a sailia e le malo se isi alaga tupe e fesoasoani ai i le falema’i.