Ads by Google Ads by Google

Tete’e Gaoteote i le fuafuaga e fa’aa’upega Leoleo

Na fa’aalia e le ali’i peresetene o le Senate, le afioga i le Tama’ita’i o le Ao ia Gaoteote Palaie Tofau i le Komesina tofia o Leoleo i le vaiaso nei, na te le lagolagoina le fa’aiuga lea o lo o taumafai i ai le Matagaluega e fa’aa’upega leoleo, ina ia mafai ai ona puipuia i latou i le taimi e fa’atino ai a latou galuega.

 

“E le o le tali lena o le fa’afitauli o lo o tula’i mai i le va o leoleo ma le tagata solitulafono i le atunu’u, o le tofu fana o leoleo, e le o le tali fo’i lena e finagalo i ai le Fono Faitulafono”, o le saunoaga lea a Gaoteote ia Save Liuato Tuitele i le iloiloga a le Senate ma le Ofisa o leoleo e saili se auala e foia ai fa’afitauli o lo o tula’i mai i le taimi nei, i le a’afia lea o le saogalemu o leoleo i a’upega mata’utia a o fa’atino ai a latou tiute i le atunu’u.

 

Na fa’ailoa e Gaoteote ia Save e fa’apea, e fiu le malo e tau saili se isi auala e ese mai i le aganu’u e foia ai fa’afitauli o lo o tula’i mai i totonu o nu’u ma afioaga e le mafai ona foia, se’i vagana ua tapa le fesoasoani a pulega a ali’i ma faipule o afioaga ta’itasi.

 

Na fa’ailoa e Gaoteote ia Save e fa’apea, pau le auala e silafia e le fono e mafai ai ona foia fa’afitauli eseese o lo o tutupu i le atunu’u, o le tofia lea o se Vaega Fa’apitoa a Leoleo (Task Force) e galulue soosoo tauau ma afioaga ta’itasi i le atunu’u, ina ia mafai ai ona saili ma foia fa’afitauli o lo o tula’i mai.

 

Mo se fa’ata’ita’iga e pei ona saunoa Gaoteote, afai e galulue fa’atasi le Vaega Fa’apitoa a leoleo ma sui o nu’u taitasi, ona mafai lea ona fesoasoani sui o le nu’u e fa’ailoa tagata o lo o faia solitulafono i totonu o le nu’u, e pei o le toto ma le umia faasoitulafono o fualaau fa’asaina, atoa ai ma le umia o a’upega mata’utia.

 

“Ou te le toe fia vaai i se isi leoleo o tagatavaleina i luga o lana galuega, ou te le toe fia vaai i se isi toto masa’a, afai la o tatou e sailia auala e foia ai fa’afitauli nei, tatou taumafai e tu’u tu’u i le loloto le tofa ina ia maua ai se ‘ai mo le atunu’u ma ona tagata”, o le fautuaga lea a le Tama’ita’i o le Ao.

 

O le autu o le iloiloga a le Senate, lea fo’i na auai ma le Fa’atonusili o le Matagaluega o le Puipuiga o le Saogalemu Lotoifale ia Utuali’i Iuniasolua Savusa, o le taumafai lea e saili se auala e foia ai fa’afitauli ua tutupu i le atunu’u, e aofia ai ma fa’alavelave lata mai e lua na a’afia ai le ofisa o leoleo i Leone, ma le fa’alavelave na manu’a ai se ali’i leoleo i se pulufana i le fa’aiuga o le tausaga na te’a nei.

 

Na taua e Gaoteote i molimau lona talitonuina o le malosi o lo o umia e le pulega a ali’i ma faipule o afioaga ta’itasi, pau lea o le auala e mafai ai ona fa’atonutonu amioga a tagata ta’itasi o lo o nonofo i totonu o nu’u ma afioaga i le atunu’u.

 

Na lagolagoina e le afioga i le ali’i senatoa ia Mauga Tasi Asuega le finagalo o Gaoteote, e le o le fa’aa’upegaina o leoleo le fofo o le fa’afitauli o lo o tula’i mai i le taimi nei, ae o le taumafai e toe fa’aolaola pulega a ali’i ma faipule i nuu taitasi ma itumalo.

 

Saunoa Mauga e fa’apea, afai e maua tagata solitulafono i totonu o nu’u ta’itasi, o lo o i ai le malosi o le nu’u e fa’asala pe fa’atula’i ese ai lea tagata, po o le logo fo’i o leoleo pe afai e fa’amaonia o lo o faia gaioiga fa’asolitulafono e aofia ai fualaau fa’asaina.

 

Ina ua tulai mai le fa’alavelave e pei ona manu’a ai le ali’i leoleo ia Tima Loia i le fa’aiuga o le tausaga na te’a nei i se pulufana, na talosagaina ai loa e le ali’i kovana ia Lolo Matalasi Moliga fesoasoani a fa’asuaga ma fa’auluuluga o afioaga ma itumalo i le atunu’u, ina ia galulue fa’atasi ma leoleo e saili se auala e foia ai fa’alavelave matuia ia ua amata ona vaaia i le atunu’u i le taimi nei.

 

Na taua e Lolo i le ripoti a le malo lea ua tauaao e le Fono Faitulafono, lona lagolagoina o le fuafuaga e fa’aa’upega leoleo, ina ia mafai ai ona puipui e leoleo lo latou saogalemu i so o se taimi e fa’atino ai a latou tiute, aemaise lava pe afai e tula’i mai ni fa’alavelave e a’afia ai fualaau fa’asaina po o a’upega mata’utia.